ડોનાલ્ડ ટ્રમ્પનો દાવો, ભારત ટેરિફ ઘટાડવા થયુ સંમત

અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે એક નિવેદન આપ્યું કે,ભારત અમેરિકન ઉત્પાદનો પર ટેરિફ ઘટાડવા માટે સંમત થયું છે. આ નિવેદન એવા સમયે આવ્યું છે જ્યારે થોડા દિવસો પહેલા જ ટ્રમ્પે 2 એપ્રિલથી ભારત પર પારસ્પરિક ટેરિફ લાદવાની જાહેરાત કરી હતી. ટ્રમ્પે ભારત પર "અમેરિકનો માટે અન્યાયી વેપાર નીતિઓ" અપનાવવાનો આરોપ લગાવ્યો હતો.

ટ્રમ્પના આ નિવેદન પહેલા ઘણા અહેવાલોમાં દાવો કરવામાં આવ્યો હતો કે ભારત સરકાર અમેરિકન ઉત્પાદનો પર ટેરિફ ઘટાડવાનું વિચારી રહી છે. ઓટો પાર્ટ્સ, કન્ઝ્યુમર ઇલેક્ટ્રોનિક્સ, જ્વેલરી અને એપેરલ જેવા અનેક ક્ષેત્રોની ભારતીય કંપનીઓ યુએસ ટ્રેડિંગ ભાગીદારો સાથે કામ કરવા માટે નવી વ્યૂહરચના અપનાવી રહી છે.

યુએસ કોંગ્રેસને સંબોધન કરતી વખતે, ટ્રમ્પે ભારત પર 100% થી વધુ ટેરિફ લાદવાનો આરોપ લગાવ્યો. તેમણે કહ્યું, "ચીન અમારા ઉત્પાદનો પર બમણું ટેરિફ લાદે છે, દક્ષિણ કોરિયા ચાર ગણું વધુ ટેરિફ વસૂલ કરે છે. આ ફક્ત દુશ્મન દેશો દ્વારા જ નહીં પરંતુ અમારા સાથી દેશો દ્વારા પણ કરવામાં આવી રહ્યું છે. આ સિસ્ટમ અમેરિકા માટે ક્યારેય વાજબી નહોતી."

ટ્રમ્પે સ્પષ્ટતા કરી હતી કે પારસ્પરિક ટેરિફ 2 એપ્રિલથી અમલમાં આવશે અને અમેરિકા પર જે પણ ટેરિફ લાદવામાં આવશે, તે પણ તે જ ટેરિફ વસૂલ કરશે. તેમણે મજાકમાં એમ પણ કહ્યું કે તેઓ 1 એપ્રિલના રોજ નિર્ણય જાહેર કરવા માંગતા નથી કારણ કે તે "એપ્રિલ ફૂલ્સ ડે" છે.

"ભારતે વેપાર સંરક્ષણ છોડવું પડશે"
અહેવાલો અનુસાર, અમેરિકાએ કૃષિ ઉત્પાદનો સિવાય ભારતથી આયાત થતી લગભગ તમામ વસ્તુઓ પર ટેરિફ દૂર કરવાની માંગ કરી હતી. જો ભારતે આ માંગણી સ્વીકારી હોત, તો બદલામાં કોઈ છૂટ મેળવ્યા વિના તેણે પોતાનું વેપાર રક્ષણ છોડવું પડત.

ભારતના ઊંચા ટેરિફ પર પુનર્વિચાર કરવાની જરૂર છે
અમેરિકાના વાણિજ્ય સચિવ હોવર્ડ લુટનિકે ઈન્ડિયા ટુડે કોન્ક્લેવ 2025માં જણાવ્યું હતું કે ભારતના ટેરિફ દર વિશ્વમાં સૌથી વધુ છે, જે અમેરિકા અને ભારત વચ્ચેના ખાસ સંબંધોની પુનઃપરીક્ષા કરવાની માંગ કરે છે. તેમણે એમ પણ કહ્યું કે વ્યક્તિગત ઉત્પાદનો પર વાટાઘાટો કરતાં મેક્રો અભિગમ ઝડપી કરાર તરફ દોરી શકે છે.