અમેરિકાના પ્રમુખ ડોનાલ્ડ ટ્રમ્પ હવે ઈરાન સામેના સૈન્ય સંઘર્ષને વધુ લંબાવવાના પક્ષમાં નથી તેવા સંકેતો મળી રહ્યા છે. ટ્રમ્પ વહીવટીતંત્રનું માનવું છે કે જો હોર્મુઝ સ્ટ્રેટને બળજબરીથી ખોલાવવા માટે કોઈ મોટું સૈન્ય અભિયાન હાથ ધરવામાં આવે, તો આ યુદ્ધ નિર્ધારિત ચારથી છ અઠવાડિયાના સમયગાળા કરતા ઘણું લાંબુ ખેંચાઈ શકે છે. આ સંભવિત જોખમને ધ્યાનમાં રાખીને ટ્રમ્પે હવે મધ્યમ માર્ગ અપનાવવાની તૈયારી બતાવી છે.
હોર્મુઝ સ્ટ્રેટ વિના પણ શાંતિની તૈયારી :&nbsp;
તાજેતરના અહેવાલો મુજબ, ટ્રમ્પે એવા સંકેત આપ્યા છે કે તેઓ આ વ્યૂહાત્મક જળમાર્ગને તાત્કાલિક મુક્ત કરાવ્યા વિના પણ યુદ્ધ વિરામ કરવા માટે સંમત થઈ શકે છે. અમેરિકાની વર્તમાન પ્રાથમિકતા ઈરાનની નૌકાદળની શક્તિ અને તેના મિસાઈલ ભંડારને મહત્તમ નુકસાન પહોંચાડીને તેને નબળું પાડવાની છે. હોર્મુઝ સ્ટ્રેટને મુક્ત કરાવવા માટે વોશિંગ્ટન ભવિષ્યમાં કોઈ અલગ ઓપરેશન વિચારી શકે છે, પરંતુ હાલ પૂરતું તેમનું ધ્યાન સીધા સૈન્ય સંઘર્ષનો અંત લાવવા પર કેન્દ્રિત છે.
આંતરરાષ્ટ્રીય દબાણની નવી વ્યૂહરચના :&nbsp;
વોલ સ્ટ્રીટ જર્નલના રિપોર્ટ અનુસાર, અમેરિકા હવે સીધા હુમલા કરવાને બદલે ઈરાન પર રાજદ્વારી અને આર્થિક દબાણ વધારવા માંગે છે. ટ્રમ્પ ઈચ્છે છે કે ઈરાન પોતે જ આંતરરાષ્ટ્રીય જળમાર્ગમાં વેપાર અને અવરજવર ફરી શરૂ કરવાની જાહેરાત કરે. જો આ રણનીતિ સફળ નહીં થાય, તો અમેરિકા યુરોપિયન દેશો અને ખાડીના મિત્ર રાષ્ટ્રો પર દબાણ લાવશે જેથી તેઓ આ માર્ગ ખોલાવવા માટે સક્રિય ભૂમિકા ભજવે. જોકે, ટ્રમ્પ પાસે સૈન્ય વિકલ્પો હજુ પણ ખુલ્લા છે, પરંતુ તે તેમની પ્રથમ પસંદગી નથી.
વાતચીત સાથે કડક ચેતવણી :&nbsp;
ડોનાલ્ડ ટ્રમ્પે સોશિયલ મીડિયા પર દાવો કર્યો છે કે ઈરાન સરકાર સાથે તેમની ચર્ચાઓ ચાલી રહી છે. તેમ છતાં, તેમણે ઈરાનને સ્પષ્ટ ચેતવણી આપી છે કે જો કોઈ નક્કર સહમતિ નહીં સધાય, તો અમેરિકા તેહરાનના અત્યંત સંવેદનશીલ સ્થળો પર ત્રાટકી શકે છે. જેમાં તેલના કુવાઓ, પાવર સ્ટેશનો અને મુખ્ય સૈન્ય મથકોનો સમાવેશ થાય છે. આ ઉપરાંત, ટ્રમ્પે પ્રથમ વખત ઈરાનના ડીસેલિનેશન પ્લાન્ટ્સ એટલે કે દરિયાના પાણીને પીવાલાયક બનાવવાના એકમોને પણ નિશાન બનાવવાની ધમકી આપી છે, જે અત્યાર સુધી સુરક્ષિત રાખવામાં આવ્યા હતા.&nbsp;

ટ્રમ્પ ઈરાન યુદ્ધ વિરામ રણનીતિ

હોર્મુઝ સ્ટ્રેટ મુક્ત કરાવ્યા વિના જ જંગ રોકવાના સંકેત, અમેરિકા હવે નવી રણનીતિ પર કરશે કામ

March 31, 2026 | 12:38 IST