કોંગોમાં શાળા આગે મચાવી તબાહી, 300 ઘરો બળ્યા અને 26 વિદ્યાર્થીઓના મોત… કારણ શું?

Congo School Fire Tragedy: કોંગોના બુકાવુ શહેરમાં શાળામાં લાગેલી ભીષણ આગે ભારે તબાહી મચાવી છે. પૂર્વીય કોંગોના બુકાવુમાં બે શાળાઓમાં ફેલાયેલી આગમાં ઓછામાં ઓછા 26 વિદ્યાર્થીઓના મોત થયા છે. મૃતકોમાં 19 છોકરીઓ અને 7 છોકરાઓનો સમાવેશ થાય છે. ઘટનામાં અનેક વિદ્યાર્થીઓ ઘાયલ થયા છે અને 29 લોકો સારવાર હેઠળ હોવાના અહેવાલ છે. સ્થાનિક સત્તાવાળાઓએ મૃત્યુઆંક હજુ વધી શકે તેવી આશંકા વ્યક્ત કરી છે.

ઘરથી શરૂ થયેલી આગ બે શાળાઓ સુધી પહોંચી
અહેવાલો અનુસાર, બુકાવુના ગીચ વસ્તીવાળા વિસ્તારમાં એક ઘરમાં આગ લાગી હતી. આગ ઝડપથી આસપાસના વિસ્તારમાં ફેલાઈ અને ફુરાહા સેકન્ડરી સ્કૂલ તથા ઉજામા પ્રાઈમરી સ્કૂલને પોતાની ઝપેટમાં લીધી. ફુરાહા સેકન્ડરી સ્કૂલમાં કેટલાક વિદ્યાર્થીઓ આગ વચ્ચે ફસાઈ ગયા હતા. સ્થાનિક અધિકારીઓના જણાવ્યા મુજબ, કેટલાક વિદ્યાર્થીઓના શ્વાસ રૂંધાવાથી મોત થયા હતા.

સાંકડા રસ્તાના કારણે વિદ્યાર્થીઓમાં ભાગદોડ
આગ લાગ્યા બાદ શાળામાં અફરાતફરી મચી ગઈ હતી. બહાર નીકળવાનો રસ્તો સાંકડો હોવાથી વિદ્યાર્થીઓ એકસાથે બહાર દોડ્યા હતા. કેટલાક વિદ્યાર્થીઓએ બારીઓમાંથી બહાર નીકળવાનો પ્રયાસ કર્યો, જ્યારે અન્ય વિદ્યાર્થીઓ દરવાજા તરફ દોડ્યા હતા. આ દરમિયાન કેટલાક વિદ્યાર્થીઓ પડી ગયા અને ભાગદોડમાં કચડાયા હોવાના અહેવાલ છે. આ ઘટનામાં ધુમાડાથી શ્વાસ લેવામાં તકલીફ અને ગૂંગળામણના કેસ પણ સામે આવ્યા છે.

300થી વધુ લાકડાના મકાનો આગની ઝપેટમાં
બુકાવુના જે વિસ્તારમાં આગ લાગી તે ગીચ વસ્તીવાળો વિસ્તાર છે અને અહીં મોટી સંખ્યામાં મકાનો લાકડાના બનેલા છે. જેના કારણે આગ ઝડપથી આસપાસના વિસ્તારમાં ફેલાઈ હતી. અહેવાલો અનુસાર લગભગ 300 લાકડાના મકાનો પણ આગમાં બળી ગયા છે. સ્થાનિક લોકો અને બચાવકર્મીઓએ ઘાયલોને નજીકની હોસ્પિટલ અને આરોગ્ય કેન્દ્રો સુધી પહોંચાડ્યા હતા.

29 લોકો સારવાર હેઠળ, હોસ્પિટલોમાં વધ્યું દબાણ
આગમાં ઘાયલ થયેલા વિદ્યાર્થીઓ અને અન્ય લોકોને સ્થાનિક આરોગ્ય કેન્દ્રોમાં ખસેડવામાં આવ્યા હતા. શરૂઆતના અહેવાલોમાં 29 લોકો સારવાર હેઠળ હોવાનું જણાવાયું હતું. મોટી સંખ્યામાં ઘાયલો પહોંચતા સ્થાનિક તબીબી વ્યવસ્થા પર પણ દબાણ વધ્યું છે. મૃત્યુઆંક વધવાની આશંકા વચ્ચે બચાવ અને સારવારની કામગીરી ચાલુ છે.

બુકાવુમાં M23 બળવાખોરોનું નિયંત્રણ
બુકાવુ પૂર્વીય કોંગોના સંઘર્ષગ્રસ્ત દક્ષિણ કિવુ પ્રાંતનું મહત્વનું શહેર છે. ફેબ્રુઆરી 2025થી શહેર પર રવાન્ડા-સમર્થિત AFC/M23 બળવાખોર જૂથનું નિયંત્રણ છે. પૂર્વીય કોંગો લાંબા સમયથી સશસ્ત્ર સંઘર્ષથી પ્રભાવિત છે. આ વિસ્તારમાં ખનિજ સંસાધનોને લઈને વિવિધ સશસ્ત્ર જૂથો વચ્ચે સંઘર્ષ ચાલી રહ્યો છે. અહેવાલો અનુસાર પૂર્વીય કોંગોમાં 100થી વધુ સશસ્ત્ર જૂથો સક્રિય છે.

આગનું કારણ હજુ સ્પષ્ટ નથી
બુકાવુ શાળામાં આગ લાગવાનું ચોક્કસ કારણ હજુ સામે આવ્યું નથી. સ્થાનિક સત્તાવાળાઓએ ઘટનાની તપાસ શરૂ કરી છે. ગીચ વસ્તી, લાકડાના મકાનો અને મર્યાદિત બહાર નીકળવાના રસ્તાઓને કારણે આગ ઝડપથી ફેલાઈ હોવાનું અહેવાલોમાં સામે આવ્યું છે.

કિંશાસામાં પણ થોડા દિવસ પહેલાં આગમાં 22ના મોત
બુકાવુની આ ઘટના પહેલાં કોંગોની રાજધાની કિંશાસામાં લગ્ન સમારોહ દરમિયાન આગ લાગવાથી ઓછામાં ઓછા 22 લોકોના મોત થયા હતા. 4 સપ્ટેમ્બરની રાત્રે લિંગવાલા વિસ્તારમાં આવેલી ઇમારતમાં આગ લાગી હતી. સાંકડા કોરિડોર અને બહાર નીકળવાની મુશ્કેલીના કારણે લોકોને બહાર નીકળવામાં ભારે મુશ્કેલી પડી હતી. ઘટનાનું ચોક્કસ કારણ હજુ સ્પષ્ટ થયું નથી. બુકાવુની શાળા આગે કોંગોમાં સુરક્ષા વ્યવસ્થા, ઇમરજન્સી એક્ઝિટ અને ગીચ વિસ્તારોમાં ફાયર સેફ્ટીને લઈને ગંભીર સવાલો ઉભા કર્યા છે. તપાસ આગળ વધ્યા બાદ આગનું ચોક્કસ કારણ અને નુકસાન અંગે વધુ વિગતો સામે આવવાની શક્યતા છે.