કેનેડાથી મોટા સમાચાર, PM જસ્ટિન ટ્રુડો ગમે તે ઘડીએ આપી શકે છે રાજીનામું

કેનેડાના વડાપ્રધાન જસ્ટિન ટ્રુડો ટૂંક સમયમાં વડાપ્રધાન પદ પરથી રાજીનામું આપી શકે છે.  આ અંગે તેમણે એક જાહેરાત કરી છે. ધ ગ્લોબ એન્ડ મેલના અહેવાલ મુજબ, ટ્રુડો બુધવારે નેશનલ કોકસની બેઠક પહેલા લિબરલ પાર્ટીના નેતા તરીકે રાજીનામું આપશે.

પાર્ટી સાથે જોડાયેલા સૂત્રોએ જણાવ્યું કે નેશનલ કોકસની બેઠકમાં ટ્રુડોને બળવાનો સામનો કરવો પડી શકે છે. આવી સ્થિતિમાં, ટ્રુડોને લાગ્યું કે તેમણે કોકસની બેઠક પહેલાં તેમના રાજીનામા અંગે નિવેદન જારી કરવું જોઈએ જેથી એવું ન લાગે કે તેમને તેમના જ પક્ષના સાંસદોએ હાંકી કાઢ્યા છે.

સૂત્રોનું કહેવું છે કે લિબરલ પાર્ટીની કોકસ મીટિંગમાં ટ્રુડોને પાર્ટીના નેતા પદ પરથી હટાવી શકાય છે. જો કે, હજુ સુધી એ સ્પષ્ટ નથી થયું કે તેઓ (ટ્રુડો) તાત્કાલિક પદ પરથી રાજીનામું આપશે કે નવા નેતાની ચૂંટણી સુધી આ પદ પર રહેશે. સૂત્રોએ જણાવ્યું હતું કે ટ્રુડોએ નાણા પ્રધાન ડોમિનિક લેબ્લેન્ક સાથે ચર્ચા કરી હતી કે શું તેમણે પદ પર રહેવું જોઈએ કે નહીં.

મહત્વનું છે કે અમેરિકામાં ડોનાલ્ડ ટ્રમ્પ રાષ્ટ્રપતિ તરીકે ચૂંટાયા બાદ તેમના પર દબાણ ઘણું વધી ગયું હતું. ટ્રમ્પ સતત તેમના પર નિશાન સાધતા હતા. ઇલોન મસ્કે પણ ટ્રમ્પની જીત બાદ તરત જ કહ્યું હતું કે હવે ટ્રુડો માટે કાઉન્ટડાઉન શરૂ થઈ ગયું છે.

ઉલ્લેખનીય છે કે હાલમાં કેનેડાની સંસદ હાઉસ ઓફ કોમન્સમાં લિબરલ પાર્ટીના 153 સાંસદો છે. કેનેડિયન હાઉસ ઓફ કોમન્સમાં 338 સીટો છે. આમાં બહુમતનો આંકડો 170 છે. થોડા મહિનાઓ પહેલા ટ્રુડો સરકારના સહયોગી ન્યૂ ડેમોક્રેટિક પાર્ટી (NDP)એ પોતાનું સમર્થન પાછું ખેંચી લીધું હતું. NDP એ ખાલિસ્તાની તરફી કેનેડિયન શીખ સાંસદ જગમીત સિંહની પાર્ટી છે.

આવી સ્થિતિમાં ગઠબંધન તૂટવાને કારણે ટ્રુડો સરકાર લઘુમતીમાં આવી ગઈ હતી. જો કે, 1 ઓક્ટોબરના રોજ યોજાયેલા બહુમત પરીક્ષણમાં, ટ્રુડોની લિબરલ પાર્ટીને અન્ય પક્ષનું સમર્થન મળ્યું, જેના કારણે ટ્રુડોએ ફ્લોર ટેસ્ટ પાસ કર્યો હતો.

થોડા દિવસો પહેલા કેનેડાના વડાપ્રધાન જસ્ટિન ટ્રુડો સાથે મતભેદને કારણે ડેપ્યુટી પીએમ અને નાણા મંત્રી ક્રિસ્ટિયા ફ્રીલેન્ડે પણ રાજીનામું આપી દીધું હતું. ડેપ્યુટી પીએમ ક્રિસ્ટિયા ફ્રીલેન્ડના રાજીનામા બાદ ટ્રુડોનો વિરોધ ઉગ્ર બન્યો છે. ક્રિસ્ટિયાએ તે જ દિવસે રાજીનામું આપ્યું હતું જ્યારે તે બજેટ રજૂ કરવાનો હતો. તેમના રાજીનામા બાદ હવે કેબિનેટ પણ ટ્રુડો પર રાજીનામું આપવા દબાણ કરી રહ્યું છે.

ટ્રમ્પના ટેરિફ પ્લાને પણ ટ્રુડોની સમસ્યાઓમાં વધારો કર્યો છે. ટ્રમ્પે સ્પષ્ટ કર્યું છે કે તેઓ કેનેડા અને મેક્સિકોથી અમેરિકા આવતા તમામ ઉત્પાદનો પર 25 ટકા ટેરિફ લાદશે, કારણ કે આ દેશોમાંથી મોટી સંખ્યામાં ગેરકાયદેસર ઇમિગ્રન્ટ્સ અમેરિકન સરહદમાં પ્રવેશી રહ્યા છે. આ દેશોમાંથી મોટા પાયે અમેરિકાને ડ્રગ્સ પણ સપ્લાય કરવામાં આવે છે.

એવું માનવામાં આવે છે કે ટ્રમ્પના ટેરિફ હુમલાને લઈને ક્રિસ્ટિયા અને ટ્રુડો વચ્ચે મતભેદો હતા. હવે ટ્રમ્પ જાન્યુઆરીમાં ફરીથી અમેરિકાના રાષ્ટ્રપતિ બનવા જઈ રહ્યા છે ત્યારે ટ્રુડોની મુશ્કેલીઓ વધી શકે છે. જો ટ્રમ્પ ટેરિફ વધારશે તો ટ્રુડો પર રાજકીય દબાણ વધી શકે છે.