BLAએ 7 પાકિસ્તાની સૈનિકોનું કર્યું અપહરણ

પાકિસ્તાનના અશાંત પ્રાંત બલૂચિસ્તાનમાં સક્રિય અલગતાવાદી સંગઠન BLA એ ફરી એકવાર પાકિસ્તાની સુરક્ષા દળો સામે મોટું પગલું ભર્યું છે. તાજેતરના અહેવાલો મુજબ, BLA એ દાવો કર્યો છે કે, તેણે પાકિસ્તાન સુરક્ષા દળોના સાત સભ્યોને હિંસક અથડામણ બાદ પોતાની કસ્ટડીમાં લીધા છે. આ ઘટનાએ પાકિસ્તાની સૈન્ય અને સરકારની ઊંઘ ઉડાવી દીધી છે, કારણ કે સંગઠને આ કેદીઓની અદલાબદલી કરવા માટે ઈસ્લામાબાદમાં બેઠેલી સરકારને માત્ર સાત દિવસનું અલ્ટીમેટમ આપ્યું છે. BLA દ્વારા જારી કરવામાં આવેલા વીડિયો સંદેશમાં સ્પષ્ટપણે કહેવામાં આવ્યું છે કે, જો નિર્ધારિત સમયમાં કોઈ સકારાત્મક વાતચીત નહીં થાય, તો આ સુરક્ષાકર્મીઓને મૃત્યુદંડ આપવામાં આવશે.

17 પાકિસ્તાની સુરક્ષાકર્મીઓને ઝડપી લીધા

આ સમગ્ર ઘટના 'ઓપરેશન હેરોફ' ના બીજા તબક્કા દરમિયાન બની હોવાનું જાણવા મળ્યું છે. BLAના પ્રવક્તાએ જણાવ્યું હતું કે, તેમના લડાયક એકમોએ વિવિધ ઓપરેશનલ મોરચા પર કાર્યવાહી કરીને કુલ 17 પાકિસ્તાની સુરક્ષાકર્મીઓને ઝડપી લીધા હતા. જોકે, માનવતાવાદી અભિગમ અને વંશીય ઓળખના આધારે તેમાંથી 10 લોકોને ચેતવણી આપીને મુક્ત કરવામાં આવ્યા હતા, કારણ કે, તેઓ સ્થાનિક પોલીસ સાથે સંકળાયેલા હતા અને વંશીય રીતે બલૂચ હતા. બાકીના સાત સૈનિકો પાકિસ્તાની આર્મીની રેગ્યુલર યુનિટના સભ્યો છે, જેમના પર હાલ 'બલૂચ નેશનલ કોર્ટ'માં કાર્યવાહી ચાલી રહી હોવાનો દાવો કરવામાં આવ્યો છે.

સુરક્ષા એજન્સીઓમાં દોડધામ મચી

આ ગંભીર પરિસ્થિતિ વચ્ચે પાકિસ્તાની સરકાર તરફથી હજુ સુધી કોઈ સત્તાવાર પ્રતિક્રિયા કે પુષ્ટિ સામે આવી નથી. બલૂચ લિબરેશન આર્મી લાંબા સમયથી બલૂચિસ્તાનની આઝાદી અને સંસાધનો પર પોતાના હકની માંગ કરી રહ્યું છે અને આ પ્રકારના અપહરણો દ્વારા તે આંતરરાષ્ટ્રીય સ્તરે પાકિસ્તાની સરકાર પર દબાણ લાવવાનો પ્રયાસ કરે છે. સોશિયલ મીડિયા પર વાયરલ થઈ રહેલા વીડિયોમાં સંગઠને ચેતવણી આપી છે કે, ડેડલાઇન સમાપ્ત થવામાં હવે માત્ર 6 દિવસ બાકી છે, જેના કારણે સુરક્ષા એજન્સીઓમાં ભારે દોડધામ મચી ગઈ છે.