America : ભીષણ આગથી ઇમારત ખાખ, 4નાં મોત

અમેરિકાના મિલવૌકી શહેરમાં મધર્સ ડે ના દિવસે એટલે કે 11 મે, 2025ના રોજ સવારે 8:00 વાગ્યે એક ભયાનક અગ્નિકાંડની ઘટના સર્જાઈ હતી. એક ઇમારતમાં નાની જગ્યાએ શરૂ થયેલી આગ ઝડપથી ફેલાઈ, જેના કારણે એક પછી એક અનેક ફ્લોર આગની લપેટમાં આવી ગયા. આ દુર્ઘટનામાં 4 લોકોનાં મોત થયાં છે, જ્યારે 4 લોકો ગંભીર રીતે ઘાયલ થયા છે. આ ઉપરાંત, અન્ય ઘણા લોકોને પણ ઇજા થઈ છે, જેમની હોસ્પિટલમાં સારવાર ચાલી રહી છે.   મિલવૌકી ફાયર ડિપાર્ટમેન્ટના ચીફ એરોન લિપ્સકીએ પ્રેસ કોન્ફરન્સમાં જણાવ્યું કે, "આ ઇમારતમાં 85 યુનિટ હતા, પરંતુ આગના કારણે તે હવે રહેવા યોગ્ય નથી રહી. આગની લપેટમાં આવ્યા બાદ ઇમારત સંપૂર્ણપણે બળીને ખાખ થઈ ગઈ છે. 200થી વધુ લોકોને સુરક્ષિત સ્થળે ખસેડવામાં આવ્યા છે."   આગની શરૂઆત થતાં જ ઇમારતના બીજા અને ચોથા માળે રહેતા લોકો બચવા માટે નીચે કૂદવા લાગ્યા. સ્થાનિક લોકોએ આ જોઈને તાત્કાલિક ફાયર વિભાગને જાણ કરી. જોકે, ફાયર બ્રિગેડની ટીમ ઘટનાસ્થળે પહોંચે તે પહેલાં આગે વિકરાળ સ્વરૂપ ધારણ કરી લીધું હતું. લિપ્સકીએ જણાવ્યું, "ફાયર ટ્રકની મદદથી બારીઓ પાસે ઉભેલા લોકોને બચાવવામાં આવ્યા. આ સાથે, ફાયર ટીમના કેટલાક સભ્યો ઇમારતમાં પ્રવેશ્યા અને અંદર ફસાયેલા લોકોને બહાર કાઢ્યા. આ રેસ્ક્યૂ ઓપરેશન દરમિયાન લગભગ 30 લોકોનો જીવ બચાવવામાં આવ્યો."   આગ લાગવાનું ચોક્કસ કારણ હજુ સુધી સ્પષ્ટ થયું નથી. લિપ્સકીના જણાવ્યા અનુસાર, પોલીસ આ ઘટનાની તપાસ કરી રહી છે અને ટૂંક સમયમાં દુર્ઘટનાનું કારણ સામે આવશે. હાલમાં, ગંભીર રીતે ઘાયલ 4 લોકો સહિત તમામ ઇજાગ્રસ્તોને હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે.