મિડલ ઈસ્ટ તણાવથી અબુધાબી BAPS મંદિર બંધ

મધ્ય-પૂર્વમાં યુદ્ધની સ્થિતિ વધુ  તંગ બનતા UAEમાં અબુ ધાબી સ્થિત BAPS હિન્દૂ મંદિર 2 થી 9 માર્ચ સુધી પ્રવાસીઓ માટે બંધ કરવામાં આવ્યું છે. મંદિર ટ્રસ્ટ તરફથી સત્તાવાર જાહેરાતમાં કહેવામાં આવ્યું છે કે, હાલની સ્થિતિને જોતાં રાષ્ટ્રીય સુરક્ષાને ધ્યાને રાખી સાવચેતીના પગલાં રૂપે અબુ ધાબી સ્થિત BAPS હિન્દૂ મંદિર 9 માર્ચ સુધી બંધ રહેશે.

આ દરમિયાન મંદિરના સ્વામી તમામની શાંતિ, સુરક્ષા અને કલ્યાણ માટે મંદિરમાં પ્રાર્થના કરતાં રહેશે. મંદિર ટ્રસ્ટે અફવાઓથી દૂર રહેવા, શાંતિ જાળવવા અને સરકારી માર્ગદર્શિકાનું ચુસ્તપણે પાલન કરવા વિનંતી કરી છે. 

સંયુક્ત આરબ અમીરાત(UAE) તરફથી આપવામાં આવેલી જાણકારી મુજબ, ઈરાની હુમલાઓમાં 58 લોકો સામાન્ય ઈજાગ્રસ્ત થયા છે. જેમાં એક ભારતીય નાગરિકનો સમાવેશ થાય છે. અબુ ધાબી સ્થિત ભારતીય દૂતાવાસે 1 માર્ચ 2026ના રોજ કહ્યું હતું કે, એક ભારતીય નાગરિક ઘાયલ થવાની જાણકારી મળતાં તે હોસ્પિટલ તંત્ર સાથે સંપર્કમાં છે.

UAEના સંરક્ષણ મંત્રાલય તરફથી દાવો કરવામાં આવ્યો છે. યુદ્ધ શરૂ થતાં UAEની સેનાએ 165 બેલિસ્ટિક મિસાઇલો, બે ક્રુઝ મિસાઇલો અને 541 ડ્રોનથી હુમલાઓનો સામનો કર્યો છે.

આ પહેલા રવિવારે રાત્રે વડાપ્રધાન નરેન્દ્ર મોદીએ UAEના રાષ્ટ્રપતિ શેખ મોહમ્મદ બિન જાયદ અલ નાહયાન સાથે પણ વાત કરી હતી. ઈરાને UAE પર જે હુમલા કર્યા તેની ભારતે આકરા શબ્દોમાં નિંદા કરી છે.  ઈરાન-અમેરિકા યુદ્ધ પર વડાપ્રધાને કહ્યું કે, 'દુનિયામાં તણાવ ચાલી રહ્યો છે. ભારતીયોની સુરક્ષા માટે ભારત સરકાર પ્રતિબદ્ધ છે. ભારત વિશ્વમાં હંમેશા શાંતિ અને સ્થિરતાના પક્ષમાં છે. આતંકવાદ તમામ માટે પડકાર છે.'

મહત્વપૂર્ણ છે કે, UAEમાં અંદાજે 39 લાખ ભારતીયો વસે છે. યુદ્ધ વધારે ફાટી નીકળે તો તમામ નાગરિકોની સુરક્ષા ભારત માટે સૌથી મોટો પડકાર બની શકે છે. ભારત અને UAE વચ્ચે વાર્ષિક 100 અબજ ડૉલરનો વેપાર થાય છે. ભારતમાં સૌથી વધુ વિદેશી હુંડિયામણ પણ UAEમાંથી આવે છે. તેથી  યુદ્ધની અસર સીધી ભારતીય અર્થતંત્ર પર પડી શકે તેમ છે.