ઉત્તર પ્રદેશના પીલીભીત જિલ્લામાંથી એક ચોંકાવનારો કિસ્સો સામે આવ્યો છે, જ્યાં પત્નીની સમોસાની માંગણી પૂરી ન થતા મામલો એટલો વધી ગયો કે, પંચાયત બોલાવવી પડી અને પતિને જાહેરમાં માર મારવામાં આવ્યો. આ ઘટનાનો વીડિયો સોશિયલ મીડિયા પર વાયરલ થઈ રહ્યો છે. આ મામલો પોલીસ સુધી પહોંચ્યો અને પોલીસે કેસ પણ નોંધ્યો.
ગામના વડાની હાજરીમાં પંચાયત બેસાડી
આ ઘટના પીલીભીત જિલ્લાના પૂરનપુર કોતવાલી વિસ્તારની છે. મળતી માહિતી મુજબ, સંગીતા નામની મહિલાએ તેના પતિ શિવમ પાસે સમોસા લાવવાની માંગણી કરી હતી, પરંતુ શિવમ સમોસા લાવવાનું ભૂલી ગયો. આ વાતથી ગુસ્સે થઈને સંગીતાએ તેના પિયરના લોકોને બોલાવ્યા. ત્યારબાદ ગામના વડાની હાજરીમાં પંચાયત બેસાડવામાં આવી. પંચાયત દરમિયાન વાત એટલી વધી ગઈ કે, સંગીતાએ તેના પરિવારના સભ્યો સાથે મળીને પતિ શિવમ અને તેના પરિવારના સભ્યોને માર માર્યો. આ સમગ્ર ઘટનાનો વીડિયો સોશિયલ મીડિયા પર વાયરલ થઈ રહ્યો છે.
યુવકને હોસ્પિટલમાં દાખલ કરવામાં આવ્યો
પીડિત યુવકની માતા વિજય કુમારીએ આ ઘટના અંગે પોલીસ સ્ટેશનમાં ફરિયાદ નોંધાવી છે. પોલીસે જણાવ્યું કે, આ ઘટનાની શરૂઆત 30મી ઓગસ્ટે થઈ હતી જ્યારે પત્નીએ સમોસાની માંગણી કરી હતી અને 31મી ઓગસ્ટે વિવાદ પંચાયત સુધી પહોંચ્યો. પોલીસે વધુમાં જણાવ્યું કે પીડિતની માતાની ફરિયાદ પર 4 આરોપીઓ વિરુદ્ધ કેસ નોંધવામાં આવ્યો છે, જેમાં હત્યાના પ્રયાસ જેવી ગંભીર કલમો પણ સામેલ છે. ઘાયલ યુવકને હોસ્પિટલમાં દાખલ કરવામાં આવ્યો છે અને મામલાની વધુ તપાસ ચાલી રહી છે. આ ઘટના એક નાનકડી વાત પર હિંસા અને પરિવારિક વિખવાદનું ગંભીર ઉદાહરણ પૂરું પાડે છે.

ગજબ! પત્ની માટે સમોસા ન લાવ્યો તો બોલાવી પંચાયત

પત્નીએ પતિ પાસે માંગ્યો સમોસો, પતિ લાવવાનું ભૂલી ગયો તો પંચાયત બોલાવીને માર્યો માર

September 5, 2025 | 16:21 IST