PM મોદી જેમને પગે લાગ્યા એ 98 વર્ષના વૃદ્ધ કોણ છે?

પશ્ચિમ બંગાળમાં સ્પષ્ટ બહુમતી મેળવતાં ભાજપના પ્રથમ મુખ્યમંત્રી સુવેન્દુ અધિકારીનો શપથ ગ્રહણ સમારોહ યોજાયો હતો. આ સમારોહ દરમિયાન વડાપ્રધાન નરેન્દ્ર મોદીએ સ્ટેજ પર એક વૃદ્ધના ચરણ સ્પર્શ કરીને તેમના આશીર્વાદ લીધા હતા. આશરે 98 વર્ષના વૃદ્ધના વડાપ્રધાને આશીર્વાદ લેતાં અચાનક વૃદ્ધ ચર્ચામાં આવી ગયા છે. શપથવિધિ સમારોહમાં મુખ્યમંત્રી સુવેન્દુ અધિકારી અને તેમના મંત્રીઓ બાદ હવે વૃદ્ધની કાર્યકરોમાં ચર્ચા થઈ રહી છે. આ વૃદ્ધનું નામ માખનલાલ સરકાર છે. માખનલાલ સરકાર કોણ છે તે આવો જાણીએ...

પશ્ચિમ બંગાળના કોલકાતામાં બ્રિગેડ પરેડ ગ્રાઉન્ડ ખાતે આજે(9 મે) મુખ્યમંત્રી સુવેન્દુ અધિકારીનો શપથ ગ્રહણ સમારોહ યોજાયો હતો. સુવેન્દુ અધિકારીની સાથે પાંચ મંત્રીઓએ પણ શપથ લીધા છે. આ શપથ સમારોહમાં વડાપ્રધાન નરેન્દ્ર મોદી સહિત અનેક રાજ્યોના મુખ્યમંત્રીઓ ઉપસ્થિત રહ્યાં હતા. આ રાજકીય સમારોહની વચ્ચે વડાપ્રધાને સ્ટેજ પર એક વયોવૃદ્ધ વ્યક્તિના ચરણ સ્પર્શ કર્યા હતા. વૃદ્ધને  શાલ ઓઢાડી સન્માન કરવાની સાથે અને આદરપૂર્વક ભેટીને અભિવાદન કર્યું હતું.

આ તસવીર જોઈને દરેકના મનમાં સવાલ થાય તે સ્વાભાવિક છે કે આ વૃદ્ધ વ્યક્તિ કોણ છે. જેના પગે વડાપ્રધાન મોદી પડ્યા. વડાપ્રધાને પગે લાગીને તેમના આશીર્વાદ પણ મેળવ્યાં હતા. આ સજ્જન પશ્ચિમ બંગાળના ભાજપના સૌથી વરિષ્ઠ કાર્યકર છે. તેમનું નામ માખનલાલ સરકાર છે. તેઓની ઉમર આશરે 98 વર્ષ છે. માખનલાલ સરકાર સ્વતંત્રતા પછીના ભારતમાં રાષ્ટ્રવાદી ચળવળ સાથે સંકળાયેલા શરૂઆતના પાયાના નેતાઓમાંના એક છે. વર્ષ 1952માં કાશ્મીરમાં ત્રિરંગો ફરકાવવાના આંદોલન સમયે  તેમની શ્યામા પ્રસાદ મુખર્જી સાથે ધરપકડ કરવામાં આવી હતી.

વર્ષ 1980માં ભાજપની સ્થાપના થયા બાદ માખનલાલ પશ્ચિમ દિનાજપુર, જલપાઈગુડી અને દાર્જિલિંગ જિલ્લાના સંગઠનાત્મક સંયોજક બન્યા. માત્ર એક વર્ષમાં તેમણે 10 હજાર સભ્યોને પક્ષમાં જોડવામાં મદદ કરી હતી. વર્ષ 1981 થી તેમણે સતત 7 વર્ષ સુધી જિલ્લા પ્રમુખ તરીકે સેવા આપી હતી. આ એક અસાધારણ સિદ્ધિ હતી. ભાજપના નેતાઓ સામાન્ય રીતે બે વર્ષ કરતાં વધુ સમય સુધી સંગઠનના પદ ઉપર રહી શકતાં નહોતા.