વિજય માલ્યાએ કોર્ટમાં આપ્યું અજીબ કારણ

ભાગેડુ ઉદ્યોગપતિ વિજય માલ્યાએ બોમ્બે હાઈકોર્ટમાં દલીલ કરી છે કે તે ભારત પાછા ફરવા માટે કોઈ ચોક્કસ તારીખ આપી શકતા નથી. કારણ કે તેમનો ભારતીય પાસપોર્ટ 2016માં રદ કરવામાં આવ્યો છે અને ઈંગ્લેન્ડ તથા વેલ્સની કોર્ટે તેમને યુકે છોડવા પર પ્રતિબંધ લગાવ્યો છે. માલ્યાએ તેમના વકીલ અમિત દેસાઈ દ્વારા હાઈકોર્ટને જણાવ્યું કે, “ભારત ક્યાં સુધી આવીશ એ કહી ન શકું, કારણ કે મારી પાસે પાસપોર્ટ નથી અને યુકેમાંથી બહાર નીકળવાની મંજૂરી પણ નથી.”

કોર્ટની કડક ટિપ્પણી અને માલ્યાની દલીલ ગયા અઠવાડિયે મુખ્ય ન્યાયાધીશ ચંદ્રશેખર અને ન્યાયાધીશ ગૌતમ અંકરની બેન્ચે માલ્યાને સ્પષ્ટ કરવા જણાવ્યું હતું કે શું તેમનો ભારત પરત ફરવાનો ઈરાદો છે કે નહીં. કોર્ટે કહ્યું હતું કે જ્યાં સુધી માલ્યા ભારત પરત ન આવે ત્યાં સુધી તેમની ભાગેડુ આર્થિક ગુનેગાર જાહેર કરવાના આદેશ સામેની અરજી પર સુનાવણી નહીં થાય. આ પછી માલ્યાએ આ દલીલ રજૂ કરી.

વકીલ અમિત દેસાઈએ કોર્ટને જણાવ્યું કે: “જો માલ્યા ભારતમાં હાજર થાય તો આ બધી કાર્યવાહી અર્થહીન થઈ જશે, કારણ કે કાયદો કહે છે કે એકવાર ગુનેગાર સંબંધિત કોર્ટ સમક્ષ હાજર થાય છે તો આ બધા આદેશો રદ કરવામાં આવશે.”

માલ્યા પર શું આરોપ છે? વિજય માલ્યા (70) પર હજારો કરોડ રૂપિયાની બેંક લોન ચૂકવવાની બાકી રકમ, મની લોન્ડરિંગ અને છેતરપિંડીના આરોપ છે. તેઓ 2016થી યુકેમાં છે અને ભારતમાં પાછા ફરવાનું ટાળી રહ્યા છે. માલ્યાએ બે અરજીઓ દાખલ કરી છે:

1. ભાગેડુ આર્થિક ગુનેગાર જાહેર કરવાના નિર્ણયને પડકારવી.
2. ભાગેડુ આર્થિક ગુનેગાર કાયદાની માન્યતા પર સવાલ ઉઠાવવા.

કોર્ટનો આદેશ બેન્ચે કેન્દ્ર સરકારને માલ્યાના નિવેદનનો જવાબ દાખલ કરવાનો નિર્દેશ આપ્યો છે અને કેસની સુનાવણી આગામી મહિના સુધી મુલતવી રાખી છે. માલ્યાના પાસપોર્ટ રદ અને યુકે કોર્ટના પ્રતિબંધને કારણે તેઓ ભારત આવી શકતા નથી એવી દલીલ કોર્ટમાં રજૂ કરવામાં આવી છે.