વિશ્વપ્રસિદ્ધ તિરુમાલા તિરુપતિ મંદિરમાં પ્રસાદના લાડુ બનાવવા માટે વપરાતા ઘીમાં કથિત ભેળસેળના મામલે સુપ્રીમ કોર્ટે એક અત્યંત મહત્વપૂર્ણ ચુકાદો આપ્યો છે. ભાજપના નેતા સુબ્રમણ્યમ સ્વામીએ આંધ્રપ્રદેશ સરકાર દ્વારા તપાસ માટે રચાયેલી એક સભ્યની સમિતિને પડકારતી અરજી કરી હતી, જેને સર્વોચ્ચ અદાલતે ફગાવી દીધી છે. કોર્ટના આ નિર્ણય બાદ હવે વહીવટી તપાસ અને ગુનાઈત કાર્યવાહી બંને અલગ-અલગ સ્તરે આગળ વધશે.
સુપ્રીમ કોર્ટે તપાસનો માર્ગ મોકળો કર્યો :&nbsp;
ચીફ જસ્ટિસ સૂર્યકાંત અને જસ્ટિસ જોયમાલ્ય બાગચીની ખંડપીઠે ચુકાદો આપતા જણાવ્યું કે કાયદાકીય દૃષ્ટિએ વહીવટી તપાસ અને પોલીસ દ્વારા થતી ગુનાઈત તપાસના કાર્યક્ષેત્ર અલગ હોય છે. સુબ્રમણ્યમ સ્વામીની અરજીમાં પૂરતા પુરાવા કે મજબૂત આધાર ન હોવાથી કોર્ટે તેમાં હસ્તક્ષેપ કરવાનો ઈનકાર કર્યો છે. આ આદેશને કારણે હવે રાજ્ય સરકાર દ્વારા નિયુક્ત સમિતિ મંદિરના વહીવટીતંત્રમાં ક્યાં અને કેવી ક્ષતિઓ રહી ગઈ તેની ઉંડી તપાસ કરી શકશે.
SIT ની તપાસમાં ભયાનક સત્ય બહાર આવ્યું :&nbsp;
સ્પેશિયલ ઇન્વેસ્ટિગેશન ટીમ (SIT) ના અહેવાલમાં કરવામાં આવેલા ખુલાસાઓએ ભક્તોમાં ભારે આક્રોશ જગાડ્યો છે. તપાસમાં સામે આવ્યું છે કે જે પદાર્થને 'શુદ્ધ ઘી' કહીને ભગવાનના ભોગ માટે વાપરવામાં આવતો હતો, તે વાસ્તવમાં કેમિકલ પ્રોસેસ કરેલું પામોલિન તેલ અને અન્ય ઘટકોનું મિશ્રણ હતું. આ ભેળસેળ માત્ર કરોડો ભક્તોની શ્રદ્ધા સાથે ક્રૂર મજાક નથી, પરંતુ તેની પાછળ એક મોટું સંગઠિત કૌભાંડ કામ કરતું હોવાના પુરાવા મળી રહ્યા છે.
૨૫૦ કરોડનું કૌભાંડ અને ED ની તપાસ :&nbsp;
આ મામલો હવે માત્ર ધાર્મિક વિવાદ રહ્યો નથી પરંતુ આર્થિક ગુનામાં પરિવર્તિત થયો છે. એન્ફોર્સમેન્ટ ડિરેક્ટોરેટ (ED) એ આ મામલે સત્તાવાર રીતે એન્ટ્રી કરી છે. ટીટીડી (TTD) ના ચેરમેન બી. આર. નાયડુના જણાવ્યા અનુસાર, અગાઉની સરકારના પાંચ વર્ષ દરમિયાન અંદાજે 60 લાખ કિલો ભેળસેળિયું ઘી સપ્લાય કરવામાં આવ્યું હતું. જેની કુલ કિંમત અંદાજે 250 કરોડ રૂપિયાની આસપાસ થાય છે. એજન્સીને પ્રબળ શંકા છે કે આ કૌભાંડના નાણાં હવાલા નેટવર્ક દ્વારા સગેવગે કરવામાં આવ્યા હોઈ શકે છે.
વિવાદની પૃષ્ઠભૂમિ: સપ્ટેમ્બર ૨૦૨૪ થી શરૂ થયેલું ઘમસાણ&nbsp;
તિરુપતિ લાડુનો આ વિવાદ સપ્ટેમ્બર 2024માં ત્યારે વેગ પકડ્યો જ્યારે આંધ્રપ્રદેશના મુખ્યમંત્રી એન. ચંદ્રબાબુ નાયડુએ ગંભીર આરોપ લગાવ્યો કે અગાઉની જગન મોહન રેડ્ડી સરકાર દરમિયાન પવિત્ર લાડુમાં પ્રાણીઓની ચરબી ભેળવવામાં આવી હતી. આ સમાચારથી સમગ્ર દેશમાં ધાર્મિક લાગણીઓ દુભાઈ હતી. હાલમાં વિવિધ એજન્સીઓ આ મામલે કોષિત ગુનેગારોને પકડવા અને મંદિરની શુદ્ધતા પુનઃસ્થાપિત કરવા માટે રાત-દિવસ કામ કરી રહી છે.

તિરુપતિ લાડુ ઘી ભેળસેળ તપાસ

ઘીમાં ભેળસેળ મામલે સુબ્રમણ્યમ સ્વામીની અરજી ફગાવી, હવે ED પણ કૌભાંડની તપાસમાં જોડાશે

February 23, 2026 | 16:43 IST