છત્તીસગઢની રાજધાની રાયપુરમાંથી એક અત્યંત ચોંકાવનારી ઘટના સામે આવી છે. ઉર્લા વિસ્તારમાં આવેલા એક પેટ્રોલ પંપ પર બાઇકમાં પેટ્રોલ ભરાવતી વખતે સિગારેટ પીવાની ના પાડતા એક યુવકે ઉશ્કેરાઈને સળગતું લાઇટર સીધું બાઇકની ફ્યુઅલ ટેન્કમાં ફેંકી દીધું હતું.
આ આત્મઘાતી હરકતને કારણે પંપ પર અફરાતફરી મચી ગઈ હતી, જોકે કર્મચારીની સતર્કતાને કારણે મોટી જાનહાનિ ટળી હતી.
શું છે સમગ્ર મામલો?
ઘટના 18 ફેબ્રુઆરીની રાત્રે આશરે 7:40 વાગ્યે બની હતી. ઉર્લાના કર્મા ચોક પાસે આવેલા સંગીતા ફ્યુઅલ્સ પર બે યુવકો બાઇકમાં પેટ્રોલ ભરાવવા આવ્યા હતા. જ્યારે કર્મચારી પેટ્રોલ ભરી રહ્યો હતો, ત્યારે બાઇકની પાછળ બેઠેલા યુવકે ઉતરીને સિગારેટ સળગાવવાનો પ્રયાસ કર્યો હતો. પેટ્રોલ પંપના કર્મચારીએ સુરક્ષાના કારણોસર તેને ત્યાં ધૂમ્રપાન કરવાની મનાઈ કરી હતી.
આ બાબતે યુવક એટલો ગુસ્સે ભરાયો કે તેણે પોતાના હાથમાં રહેલું સળગતું લાઇટર ખુલ્લી ફ્યુઅલ ટેન્કમાં નાખી દીધું. જોતજોતામાં આગની જ્વાળાઓ ફાટી નીકળી હતી અને નોઝલ સુધી આગ પહોંચી ગઈ હતી.
આગ લાગતા જ આસપાસના લોકો ભાગવા લાગ્યા હતા, પરંતુ પંપના એક બહાદુર કર્મચારીએ સમયસૂચકતા વાપરીને તાત્કાલિક મેઈન સપ્લાય બંધ કરી દીધો અને ફાયર એક્સટિંગ્યુશર (અગ્નિશામક યંત્ર) વડે આગ પર કાબૂ મેળવ્યો. આ પ્રક્રિયામાં સળગતું પેટ્રોલ બંને યુવકો પર પણ ઉડ્યું હતું.
પોલીસ કાર્યવાહી
CCTV ફૂટેજના આધારે પોલીસે બિરોગાવના ધર્મેન્દ્ર સિંહ અને ઈમરાન કુરેશી નામના બે શખ્સોની ધરપકડ કરી છે. ઉર્લા પોલીસ સ્ટેશનના ઇન્સ્પેક્ટર રોહિત મહેલકરે જણાવ્યું કે, આરોપીઓ વિરુદ્ધ જાહેર સુરક્ષા જોખમમાં મૂકવા અને આગ લગાડવાના ગંભીર ગુના હેઠળ કેસ દાખલ કરવામાં આવ્યો છે.
આ ઘટના ફરી એકવાર પેટ્રોલ પંપ જેવા સંવેદનશીલ સ્થળોએ સુરક્ષા નિયમોનું પાલન કેટલું અનિવાર્ય છે તેની યાદ અપાવે છે.

પેટ્રોલ પંપ ઉપર જ આગ ચાંપી

કર્મચારીની સતર્કતાથી મોટી હોનારત ટળી: રાયપુરમાં બે યુવકોની ધરપકડ

February 20, 2026 | 16:58 IST