સોશિયલ મીડિયા પર કોકરોચ જનતા પાર્ટીનો ભારે ટ્રેન્ડ

Cockroach Janata Party: દેશમાં યુવા બેરોજગારી અને શાસન વ્યવસ્થા સામેનો આક્રોશ વ્યક્ત કરવા માટે સોશિયલ મીડિયા પર એક અનોખું ઓનલાઈન આંદોલન શરૂ થયું છે. ડિજિટલ પ્લેટફોર્મ્સ પર વાયરલ થઈ રહેલી 'કોકરોચ જનતા પાર્ટી' (CJP) એ કોઈ વાસ્તવિક રાજકીય પક્ષ નથી, પરંતુ દેશની વર્તમાન પરિસ્થિતિ પર કટાક્ષ કરતું એક સેટિરિકલ (વ્યંગ્યાત્મક) પેરોડી પ્લેટફોર્મ છે. આ ટ્રેન્ડે સોશિયલ મીડિયા પર યુઝર્સનું ભારે ધ્યાન ખેંચ્યું છે અને તે યુવાનોની નિરાશા પ્રગટ કરવાનું એક મોટું માધ્યમ બની ગયું છે.

સમગ્ર વિવાદ શું છે?
આ સમગ્ર વિવાદની શરૂઆત સુપ્રીમ કોર્ટના ચીફ જસ્ટિસ ઓફ ઈન્ડિયા (CJI) સૂર્યકાંતની એક કથિત ટિપ્પણી બાદ થઈ હતી. એક સુનાવણી દરમિયાન તેમણે બેરોજગાર યુવાનો વિશે ટિપ્પણી કરતા જણાવ્યું હતું કે, જે યુવાનોને નોકરી નથી મળતી તેઓ સોશિયલ મીડિયા પર સક્રિય થઈને કે આરટીઆઈ (RTI) એક્ટિવિસ્ટ બનીને સિસ્ટમ પર હુમલા કરે છે. તેમણે આવા તત્વોને 'કોકરોચ' જેવા ગણાવ્યા હતા. જોકે, વિવાદ વધતાં તેમણે સ્પષ્ટતા કરી હતી કે તેમનો ઈશારો દેશના યુવાનો તરફ નહીં, પરંતુ માત્ર ફેક ડિગ્રી ધારકો તરફ હતો.

બેરોજગારીની પીડાને મળી વાચા
ચીફ જસ્ટિસના આ નિવેદનથી નારાજ થઈને બોસ્ટન યુનિવર્સિટીના રાજકીય વ્યૂહરચનાકાર અભિજીત ડિપકે દ્વારા સોશિયલ મીડિયા પર પ્રતિકાત્મક રીતે 'કોકરોચ જનતા પાર્ટી'ની સ્થાપના કરવામાં આવી. ભલે આ પક્ષ એક મજાક તરીકે શરૂ થયો હોય, પરંતુ તેની પાછળ ગંભીર રાજકીય અને સામાજિક મુદ્દાઓ વણાયેલા છે. આ ઓનલાઈન મૂવમેન્ટે દેશના યુવા વર્ગમાં ચાલી રહેલી બેરોજગારીની પીડાને વાચા આપવાનું કામ કર્યું છે.

ઘોષણાપત્ર પણ જાહેર કર્યો
આ કાલ્પનિક પક્ષે સોશિયલ મીડિયા પર પોતાનો એક ઘોષણાપત્ર (મેનિફેસ્ટો) પણ જાહેર કર્યો છે, જેમાં દેશની વ્યવસ્થા સુધારવા માટે ત્રણ મુખ્ય માંગણીઓ મૂકવામાં આવી છે. પ્રથમ માંગણી અનુસાર, દેશના ચીફ જસ્ટિસને નિવૃત્તિ પછી રાજ્યસભાની સીટ કે અન્ય કોઈ સરકારી પુરસ્કારો મળવા પર સંપૂર્ણ પ્રતિબંધ હોવો જોઈએ. બીજી માંગણીમાં પક્ષપલટો કરતા સ્વાર્થી ધારાસભ્યો અને સાંસદો પર 20 વર્ષ સુધી ચૂંટણી લડવાનો પ્રતિબંધ મૂકવાની વાત છે. જ્યારે ત્રીજી માંગણી હેઠળ દેશની સંસદ અને કેબિનેટમાં મહિલાઓ માટે 50 ટકા અનામત આપવાની હિમાયત કરવામાં આવી છે.

રાજકીય નેતાઓ પણ રસ દાખવી રહ્યા છે
આ ડિજિટલ આંદોલનની લોકપ્રિયતા એટલી વધી ગઈ છે કે રાજકીય નેતાઓ પણ તેમાં રસ દાખવી રહ્યા છે. તૃણમૂલ કોંગ્રેસ (TMC) ના સાંસદ મહુઆ મોઇત્રા અને પૂર્વ ક્રિકેટર તથા નેતા કીર્તિ આઝાદ જેવા અગ્રણી ચહેરાઓએ પણ આ પક્ષમાં જોડાવાની ઈચ્છા વ્યક્ત કરીને સોશિયલ મીડિયા પર રમૂજી પ્રતિક્રિયાઓ આપી છે. રાજકીય વિશ્લેષકોના મતે, આ ટ્રેન્ડ દર્શાવે છે કે આજના યુવાનો પરંપરાગત વિરોધ પ્રદર્શનો છોડીને ડિજિટલ માધ્યમો દ્વારા સત્તાધીશો સામે ધારદાર કટાક્ષ કરીને પોતાનો વિરોધ નોંધાવી રહ્યા છે.