નવી દિલ્હીમાં આયોજિત 'ઇન્ડિયા AI ઇમ્પેક્ટ સમિટ' દરમિયાન આઈટી મંત્રી અશ્વિની વૈષ્ણવે ડિજિટલ સુરક્ષાને લઈને મહત્વના નિવેદનો આપ્યા છે. તેમણે સ્પષ્ટ કર્યું હતું કે સરકાર સોશિયલ મીડિયા પ્લેટફોર્મ્સ પર વય-આધારિત પ્રતિબંધો દાખલ કરવા માટે વિવિધ હિતધારકો અને કંપનીઓ સાથે પરામર્શ કરી રહી છે.
ડીપફેક સામે કડક નિયમન અનિવાર્ય
અશ્વિની વૈષ્ણવે ડીપફેક ટેકનોલોજીના વધતા જોખમો અંગે ચિંતા વ્યક્ત કરતા જણાવ્યું કે, "ડીપફેક એક એવી સમસ્યા છે જે દિવસેને દિવસે વધી રહી છે. આપણા બાળકો અને સમાજને આ નુકસાનથી બચાવવાની તાતી જરૂર છે.
આપણે ડીપફેક પર અત્યાર કરતા ઘણા કડક નિયમોની જરૂર છે અને અમે ઉદ્યોગ જગત સાથે આ અંગે સંવાદ શરૂ કર્યો છે." તેમણે ઉમેર્યું હતું કે સંસદમાં પણ આ મુદ્દે સર્વસંમતિ સાધવામાં આવશે.
વિશ્વના દેશોના પગલે ભારત
નોંધનીય છે કે ઓસ્ટ્રેલિયા, ફ્રાન્સ અને યુનાઇટેડ કિંગડમ જેવા દેશોએ યુવાનો માટે સોશિયલ મીડિયાનો ઉપયોગ મર્યાદિત કરવા અથવા કડક વય ચકાસણી કરવા માટે કાયદાઓ પ્રસ્તાવિત કર્યા છે.
ભારતમાં પણ આર્થિક સર્વેક્ષણમાં ભલામણ કરવામાં આવી છે કે ટેકનોલોજી કંપનીઓએ યુઝર્સની ઉંમરની ચકાસણી કરવા માટે જવાબદાર હોવા જોઈએ, જેથી બાળકોને વ્યસનકારક સામગ્રી અને લક્ષિત જાહેરાતોથી બચાવી શકાય.
પ્લેટફોર્મ્સ માટે ચેતવણી
આઈટી મંત્રીએ સ્પષ્ટ શબ્દોમાં કહ્યું હતું કે, "Netflix, YouTube, Meta (Facebook/Instagram) હોય કે X દરેક કંપનીએ ભારતના કાયદાકીય માળખા અને બંધારણને અનુસરવું જ પડશે." સરકારે સંકેત આપ્યો છે કે આગામી સમયમાં સોશિયલ મીડિયા, ગેમ્બલિંગ એપ્સ અને ઓટો-પ્લે ફીચર્સ પર વય-આધારિત ઍક્સેસ મર્યાદા લાગુ થઈ શકે છે.

સોશિયલ મીડિયા હવે મર્યાદિત બનશે

બાળકોને ડિજિટલ વ્યસન અને હાનિકારક સામગ્રીથી બચાવવા સરકારનો એક્શન પ્લાન

February 18, 2026 | 10:19 IST