ભાજપમાં જોડાતા જ સંદીપ પાઠક સામે ગંભીર FIR

Sandeep Pathak FIR: પંજાબના રાજકારણમાં એકાએક વળાંક આવ્યો છે. આમ આદમી પાર્ટી (AAP) ના પૂર્વ દિગ્ગજ નેતા અને હાલમાં જ ભારતીય જનતા પાર્ટીમાં સામેલ થયેલા રાજ્યસભા સાંસદ સંદીપ પાઠક વિરુદ્ધ પંજાબ પોલીસે કડક કાર્યવાહી હાથ ધરી છે. પંજાબના બે અલગ-અલગ જિલ્લાઓમાં પાઠક વિરુદ્ધ FIR દાખલ કરવામાં આવી છે. સૂત્રોના જણાવ્યા અનુસાર, આ કેસોમાં ભ્રષ્ટાચાર અને મહિલાઓના ઉત્પીડન જેવા ગંભીર અને બિનજામીનપાત્ર આરોપોનો સમાવેશ થાય છે.

વિશ્વાસ મતના બીજા જ દિવસે કાર્યવાહી
નોંધનીય છે કે પંજાબ વિધાનસભામાં ભગવંત માન સરકારે વિશ્વાસ મત જીત્યાના માત્ર 24 કલાકની અંદર જ આ પોલીસ કાર્યવાહી કરવામાં આવી છે. સંદીપ પાઠક એવા સાત સાંસદોમાંના એક છે જેમણે તાજેતરમાં અરવિંદ કેજરીવાલનો સાથ છોડીને કેસરીયો ધારણ કર્યો હતો. પાઠકને 2022ની પંજાબ વિધાનસભા ચૂંટણીમાં AAPની ઐતિહાસિક જીતના મુખ્ય રણનીતિકાર માનવામાં આવે છે. આવા કદાવર નેતા વિરુદ્ધ અચાનક થયેલી આ કાર્યવાહીથી રાજ્યમાં રાજકીય માહોલ ગરમાયો છે.

સંદીપ પાઠકનો પલટવાર
આ FIR અંગે પ્રતિક્રિયા આપતા સંદીપ પાઠકે આશ્ચર્ય વ્યક્ત કર્યું હતું. તેમણે જણાવ્યું હતું કે, તેમને આવી કોઈ FIR અંગે સત્તાવાર રીતે કોઈ જાણકારી મળી નથી કે પોલીસે પણ તેમનો સંપર્ક કર્યો નથી. પાઠકે આ કાર્યવાહીને શુદ્ધ રાજકીય બદલો ગણાવતા કહ્યું કે, "મેં આખી જિંદગી અત્યંત પ્રામાણિકતાથી દેશની સેવા કરી છે. જો મારા જેવા વ્યક્તિ વિરુદ્ધ આવી કાર્યવાહી કરવામાં આવતી હોય, તો તે સ્પષ્ટ કરે છે કે વર્તમાન સરકાર મારા પક્ષ પલટાથી કેટલી ડરેલી છે."

AAP સરકાર સામે ઝુંબેશ
સંદીપ પાઠક વિરુદ્ધ કેસ દાખલ થતા જ ભાજપ મેદાનમાં આવ્યું છે. ભાજપે આમ આદમી પાર્ટી સરકાર પર નિશાન સાધતા આરોપ લગાવ્યો છે કે પંજાબમાં હવે કાયદાનું શાસન નથી રહ્યું, પરંતુ માત્ર રાજકીય વેરઝેરની રાજનીતિ ચાલી રહી છે. ભાજપના નેતાઓએ દાવો કર્યો છે કે પાઠક ભાજપમાં જોડાયા એટલે તરત જ તેમની સામે જૂના કે ખોટા કેસો ઊભા કરવામાં આવ્યા છે. ભાજપ મુજબ, આ કાર્યવાહી મુખ્યમંત્રી ભગવંત માન અને અરવિંદ કેજરીવાલની અસુરક્ષાની ભાવના દર્શાવે છે.

રાજ્યસભામાં AAPનું કદ ઘટ્યું
આ ઘટનાક્રમ પંજાબ અને દેશના રાજકારણ માટે પણ મહત્વનો છે કારણ કે થોડા દિવસો પહેલા જ AAPના ૧૦ માંથી ૬ રાજ્યસભા સાંસદોએ સાથ છોડ્યો છે. આ જૂથમાં સંદીપ પાઠક ઉપરાંત રાઘવ ચઢ્ઢા, હરભજન સિંહ, અશોક મિત્તલ, રાજેન્દ્ર ગુપ્તા અને વિક્રમજીત સાહની જેવા મોટા નામો સામેલ છે. રાજ્યસભાના અધ્યક્ષ સી.પી. રાધાકૃષ્ણને આ સાંસદોના ભાજપમાં વિલિનીકરણને માન્યતા આપી દીધી છે, જેના કારણે ઉપલા ગૃહમાં આમ આદમી પાર્ટીનું સંખ્યાબળ હવે ઘટીને માત્ર ત્રણ રહી ગયું છે. આમ, એક સમયે જે નેતા AAPના 'ચાણક્ય' ગણાતા હતા, તે હવે કાયદાકીય ગૂંચવણોમાં ફસાયા છે, જેની સીધી અસર પંજાબના આગામી રાજકીય સમીકરણો પર જોવા મળી શકે છે.