અયોધ્યાથી પરત ફરી રહેલા પરિવારને નડ્યો અકસ્માત

Road Accident in Jalaun: ઉત્તર પ્રદેશના જાલૌન જિલ્લામાં સોમવારે વહેલી સવારે એક હૃદયદ્રાવક માર્ગ અકસ્માત સર્જાયો હતો. જાલૌન જિલ્લાના કાલ્પી કોતવાલી પોલીસ સ્ટેશન વિસ્તારની હદમાં આવેલા જોલ્હુપુર વળાંક પાસે થયેલા આ ભયાનક અકસ્માતમાં એક જ પરિવારના 6 સભ્યોના કરુણ મોત નીપજ્યા છે, જ્યારે અન્ય 4 લોકો ગંભીર રીતે ઘાયલ થયા છે. આ દુર્ઘટના ત્યારે ઘટી જ્યારે અયોધ્યામાં તીર્થયાત્રા પૂર્ણ કરીને પરિવાર પોતાના વતન પરત ફરી રહ્યો હતો.

ઊંઘનું ઝોકું કાળ સાબિત થયું
પ્રાપ્ત અહેવાલો અનુસાર, લલિતપુર જિલ્લાના મેહરોની ગામના રહેવાસી શશિકાંત તિવારી અને તેમનો પરિવાર અયોધ્યામાં ધાર્મિક યાત્રા માટે ગયા હતા. યાત્રા પૂર્ણ કર્યા બાદ તેઓ કાર દ્વારા ઓરઈ પરત ફરી રહ્યા હતા. સોમવારે સવારે અંદાજે 6:00 વાગ્યાની આસપાસ જ્યારે તેમની કાર કાલ્પી વિસ્તારના જોલ્હુપુર વળાંક પાસે પહોંચી, ત્યારે ડ્રાઈવરને અચાનક ઊંઘનું ઝોકું આવી ગયું હતું. ઊંઘ આવવાને કારણે ડ્રાઈવરે વાહન પરનો કાબુ ગુમાવ્યો હતો અને કાર તેની આગળ જઈ રહેલા અન્ય એક વાહન સાથે ધડાકાભેર અથડાઈ હતી. આ ટક્કર એટલી પ્રચંડ હતી કે કારનો કચ્ચરઘાણ નીકળી ગયો હતો. અકસ્માતના સ્થળે જ 4 લોકોના કમકમાટીભર્યા મોત નીપજ્યા હતા. જ્યારે હોસ્પિટલમાં સારવાર દરમિયાન વધુ 2 લોકોએ દમ તોડ્યો હતો, આમ કુલ મૃત્યુઆંક 6 પર પહોંચ્યો છે. અન્ય 4 ઘાયલો હાલમાં હોસ્પિટલમાં જિંદગી અને મોત વચ્ચે જંગ લડી રહ્યા છે.

બચાવ કામગીરીમાં ભારે જહેમત
અકસ્માત બાદની પરિસ્થિતિ અત્યંત ગંભીર હતી. કારના કાટમાળમાં ફસાયેલા લોકોને બહાર કાઢવા માટે સ્થાનિક લોકો અને પોલીસે ભારે જહેમત ઉઠાવવી પડી હતી. કેટલાક ઘાયલો અંદાજે એક કલાક સુધી કારના કેબિનમાં જ ફસાયેલા રહ્યા હતા. કારમાં કુલ 10 લોકો સવાર હતા, જેમની ઓળખ શશિકાંત તિવારી, કૃષ્ણકાંત, દીપક, હરિમોહન, ભૂષણ, અંશુલ, સ્વામી પ્રસાદ, મનોજ અને દેશરાજ તરીકે કરવામાં આવી છે. આ તમામ લોકો એક જ પરિવારના સભ્યો હોવાનું જાણવા મળ્યું છે, જેના કારણે સમગ્ર પંથકમાં માતમ છવાઈ ગયો છે.

મેડિકલ કોલેજની બેદરકારી આવી સામે
આ કરૂણ દુર્ઘટના વચ્ચે સ્થાનિક વહીવટીતંત્ર અને હોસ્પિટલની ગંભીર બેદરકારી પણ સામે આવી છે. અકસ્માતમાં ઘાયલ થયેલા લોકોને જ્યારે એમ્બ્યુલન્સ મારફતે મેડિકલ કોલેજના ઇમરજન્સી વોર્ડમાં લાવવામાં આવ્યા, ત્યારે ત્યાં દર્દીઓને એમ્બ્યુલન્સમાંથી ઉતારવા માટે કોઈ વોર્ડ બોય હાજર નહોતો. ગંભીર રીતે ઘાયલ દર્દીઓ 10 મિનિટ સુધી એમ્બ્યુલન્સની અંદર જ અસહ્ય પીડાથી કણસતા રહ્યા હતા. અંતે, હોસ્પિટલમાં હાજર અન્ય લોકોએ માનવતા દાખવીને જાતે જ દર્દીઓને એમ્બ્યુલન્સમાંથી બહાર કાઢી ઇમરજન્સી વોર્ડ સુધી પહોંચાડ્યા હતા. કાલ્પી કોતવાલી પોલીસે ઘટનાસ્થળે પહોંચી તમામ મૃતદેહોનો કબજો મેળવી લીધો છે અને તેમને પોસ્ટમોર્ટમ માટે મોકલી આપ્યા છે. એક હસતા-રમતા પરિવારની તીર્થયાત્રા આ રીતે લોહીયાળ અકસ્માતમાં સમાપ્ત થતા સમગ્ર વિસ્તારમાં અરેરાટી વ્યાપી ગઈ છે.