પીએમ મોદીની 'સંયમ'ની અપીલ પર રાહુલ ગાંધીનો પલટવાર

Rahul Gandhi Attacks PM Modi's Seven Appeals: મધ્ય પૂર્વ અને ગલ્ફ દેશોમાં વધતા જતા ભૂરાજકીય તણાવની સીધી અસર હવે ભારતીય રાજનીતિ અને અર્થતંત્ર પર જોવા મળી રહી છે. રવિવારે વડાપ્રધાન નરેન્દ્ર મોદીએ તેલંગાણાના સિકંદરાબાદમાં એક કાર્યક્રમ દરમિયાન દેશની જનતાને ઉર્જા, ખાદ્ય તેલ અને સોના જેવી ચીજવસ્તુઓના વપરાશમાં 'સંયમ' રાખવા કરેલી અપીલ બાદ રાજકીય ગરમાવો તેજ થયો છે. લોકસભામાં વિપક્ષના નેતા રાહુલ ગાંધીએ વડાપ્રધાનની આ સાત અપીલો પર આકરા પ્રહારો કરતા તેને સરકારની 'નિષ્ફળતાના પુરાવા' ગણાવ્યા છે.

 

मोदी जी ने कल जनता से त्याग मांगे - सोना मत ख़रीदो, विदेश मत जाओ, पेट्रोल कम जलाओ, खाद और खाने का तेल कम करो, मेट्रो में चलो, घर से काम करो।

ये उपदेश नहीं - ये नाकामी के सबूत हैं।

12 साल में देश को इस मुक़ाम पर ला दिया है कि जनता को बताना पड़ रहा है - क्या ख़रीदे, क्या न…

— Rahul Gandhi (@RahulGandhi) May 11, 2026

 

વડાપ્રધાનની 'નવી દેશભક્તિ' અને સાત અપીલ
વડાપ્રધાન મોદીએ વધતા ઉર્જા દબાણ અને વિદેશી હૂંડિયામણના ભંડાર પર પડતા બોજને ધ્યાનમાં રાખીને જનતા સમક્ષ કેટલીક વિનંતીઓ કરી હતી. તેમણે કહ્યું કે દેશભક્તિ માત્ર સરહદ પર બલિદાન આપવા સુધી મર્યાદિત નથી, પરંતુ જવાબદાર જીવન જીવવું એ પણ દેશભક્તિ છે. પીએમ મોદીની મુખ્ય અપીલો નીચે મુજબ હતી:
ઉર્જા બચત: પેટ્રોલ અને ડીઝલનો ઉપયોગ ઘટાડીને મેટ્રો, જાહેર પરિવહન, કારપૂલિંગ અને ઇલેક્ટ્રિક વાહનોનો ઉપયોગ કરવો.
વર્ક ફ્રોમ હોમ: કોવિડ-19 સમયની જેમ ફરીથી ઓનલાઈન મીટિંગ્સ અને ઘરેથી કામ કરવાનું શરૂ કરવું જેથી ઇંધણ બચે.
સોનાની ખરીદી: વિદેશી ચલણ બચાવવા માટે આગામી એક વર્ષ સુધી સોનાની બિનજરૂરી ખરીદી મુલતવી રાખવી.
ખાદ્ય તેલ અને ખેતી: આયાત પર નિર્ભરતા ઘટાડવા ખાદ્ય તેલનો વપરાશ ઓછો કરવો અને રાસાયણિક ખાતરોને બદલે કુદરતી ખેતી અપનાવવી.
લોજિસ્ટિક્સ: માલ પરિવહન માટે ખાનગી વાહનોને બદલે રેલવેને પ્રાથમિકતા આપવી.
વડાપ્રધાને ભારપૂર્વક જણાવ્યું હતું કે આ પગલાં રાષ્ટ્રીય તિજોરીના સ્વાસ્થ્ય અને પરિવારના સભ્યોના સ્વાસ્થ્ય બંને માટે ફાયદાકારક છે.

રાહુલ ગાંધીનો આકરો પ્રતિભાવ: "વડાપ્રધાન હવે જવાબદારીથી ભાગી રહ્યા છે"
પીએમ મોદીની આ અપીલના બીજા જ દિવસે રાહુલ ગાંધીએ સોશિયલ મીડિયા પ્લેટફોર્મ 'X' પર પોસ્ટ કરીને વડાપ્રધાનને 'સમાધાનકારી' (Compromised) નેતા તરીકે સંબોધ્યા હતા. રાહુલે લખ્યું, "ગઈકાલે પીએમ મોદીએ જનતા પાસેથી બલિદાન માંગ્યું. સોનું ન ખરીદો, વિદેશ ન જાઓ, પેટ્રોલ ઓછું વાપરો, ખાતર અને તેલ ઓછું વાપરો... આ ઉપદેશો નથી, પણ તેમની નિષ્ફળતાના પુરાવા છે." રાહુલ ગાંધીએ વધુમાં જણાવ્યું હતું કે, છેલ્લા 12 વર્ષના શાસનમાં દેશ એવી સ્થિતિમાં આવી ગયો છે કે જ્યાં સરકારે જનતાને તેમના અંગત જીવન અને ખરીદી વિશે સૂચનાઓ આપવી પડે છે. તેમણે આક્ષેપ કર્યો કે જ્યારે પણ દેશ પર સંકટ આવે છે, ત્યારે વડાપ્રધાન પોતાની નિષ્ફળતા છુપાવવા માટે જવાબદારી જનતા પર ઢોળી દે છે. રાહુલે તીખા શબ્દોમાં કહ્યું કે, "દેશ ચલાવવો હવે આ સમાધાનકારી વડાપ્રધાનની ક્ષમતામાં રહ્યો નથી."

વૈશ્વિક કટોકટી અને ભારત સામેના પડકારો
વડાપ્રધાનની અપીલ પાછળનું મુખ્ય કારણ ગલ્ફ દેશોમાં યુદ્ધ જેવી સ્થિતિ અને તેના કારણે ક્રૂડ ઓઈલના આસમાને પહોંચેલા ભાવો છે. ભારત પોતાની ઉર્જા જરૂરિયાતો માટે આયાત પર ખૂબ નિર્ભર છે. જો આયાત બિલ વધે છે, તો વિદેશી હૂંડિયામણ અનામત (Foreign Exchange Reserve) ઝડપથી ઘટે છે, જે રૂપિયાના મૂલ્યને પ્રતિકૂળ અસર કરે છે. પીએમ મોદીએ આ આર્થિક મજબૂતી જાળવવા માટે સામૂહિક પ્રયાસો પર ભાર મૂક્યો હતો. એકતરફ સરકાર આંતરરાષ્ટ્રીય દબાણ સામે દેશના અર્થતંત્રને સુરક્ષિત રાખવા માટે જનતાના સહયોગની અપેક્ષા રાખી રહી છે, તો બીજી તરફ વિપક્ષ તેને આર્થિક ગેરવહીવટ અને નીતિગત નિષ્ફળતા તરીકે જોઈ રહ્યો છે. વડાપ્રધાનની 'દેશભક્તિ'ની નવી વ્યાખ્યા અને રાહુલ ગાંધીના 'નિષ્ફળતાના પુરાવા' વચ્ચે હવે દેશની જનતા આ આર્થિક સંકટને કેવી રીતે જુએ છે તે જોવું મહત્વનું રહેશે. નિષ્ણાતો માને છે કે જો ગલ્ફમાં સ્થિતિ વધુ બગડશે, તો ભારત જેવા દેશો માટે ઉર્જા સુરક્ષા અને ફુગાવાને અંકુશમાં રાખવો એ સૌથી મોટો પડકાર બની રહેશે.