પુલવામા હુમલાના માસ્ટરમાઇન્ડ આતંકવાદીનું મોત

Pulawama Attacker Mastermind Killed: વર્ષ 2019માં ભારતના જમ્મુ-કાશ્મીરમાં થયેલા ભયાનક પુલવામા આતંકવાદી હુમલાના મુખ્ય માસ્ટરમાઇન્ડ્સમાંના એક હમઝા બુરહાનની પાકિસ્તાનમાં ગોળી મારીને હત્યા કરવામાં આવી છે. સૂત્રો અને વિવિધ અહેવાલો દ્વારા મળતી માહિતી અનુસાર, પાકિસ્તાન અધિકૃત કાશ્મીર (PoK)ના મુઝફ્ફરાબાદમાં એક અજાણ્યા હુમલાખોરે આતંકવાદી હમઝા બુરહાનને નિશાન બનાવ્યો હતો. આ હુમલામાં તેનું ઘટનાસ્થળે જ મોત નીપજ્યું હોવાના અહેવાલ છે.

ઓફિસમાં બેઠો હતો ત્યારે જ તરાપ મારી
મળતી વિગતો અનુસાર, આતંકવાદી હમઝા બુરહાન મુઝફ્ફરાબાદ સ્થિત પાકિસ્તાન અધિકૃત કાશ્મીરના વિસ્તારમાં આવેલી પોતાની ઓફિસમાં બેઠો હતો. તે સમયે અચાનક એક અજાણ્યો વ્યક્તિ ત્યાં ધસી આવ્યો હતો અને બુરહાન પર અંધાધૂંધ ગોળીબાર શરૂ કરી દીધો હતો. પાકિસ્તાનમાં તે પોતાની અસલી આતંકી ઓળખ છુપાવીને એક સામાન્ય 'શિક્ષક' તરીકે રહેતો હતો અને ત્યાં જ પોતાની પ્રવૃત્તિઓ ચલાવતો હતો.

શિક્ષકની આડમાં આતંકી ફેક્ટરી ચલાવતો હતો
હમઝા બુરહાન માત્ર 2019ના પુલવામા હુમલાનો ગુનેગાર નહોતો, પરંતુ તે ત્યારથી લઈને અત્યાર સુધી પાકિસ્તાનમાં રહીને અનેક આતંકવાદી ઘટનાઓનું નેટવર્ક સંભાળી રહ્યો હતો. તે PoK ક્ષેત્રમાં સક્રિય વિવિધ આતંકવાદી સંગઠનોના નવા ભરતી થયેલા આતંકીઓને સઘન તાલીમ આપવાનું કામ કરતો હતો. આ ઉપરાંત, ભારતીય સરહદના વિસ્તારોમાં આતંકવાદીઓની સુરક્ષિત ઘૂસણખોરી કરાવવામાં પણ તેની મુખ્ય ભૂમિકા રહેતી હતી.

શું હતો પુલવામા હુમલો?
14 ફેબ્રુઆરી, 2019ના રોજ બપોરે 3:15 વાગ્યે જમ્મુ-શ્રીનગર રાષ્ટ્રીય ધોરીમાર્ગ પર જમ્મુ-કાશ્મીરના પુલવામા જિલ્લામાં માનવ ઇતિહાસનો એક અત્યંત ઘાતક આતંકવાદી હુમલો થયો હતો. પાકિસ્તાન સ્થિત આતંકી સંગઠન જૈશ-એ-મોહમ્મદના સ્થાનિક આતંકવાદી આદિલ અહેમદ ડારે 300-350 કિલોગ્રામથી વધુ આઇઇડી (IED) વિસ્ફોટકોથી ભરેલી એસયુવી (SUV) કારને સીઆરપીએફ (CRPF)ના જવાનોના કાફલા સાથે અથડાવી દીધી હતી. 1989 પછી સુરક્ષિત દળો પર થયેલા આ સૌથી મોટા હુમલામાં ભારતના 40થી વધુ વીર જવાનો શહીદ થયા હતા અને આખા દેશમાં આક્રોશ ફાટી નીકળ્યો હતો.

ભારતનું જડબાતોડ ઓપરેશન બાલાકોટ
પુલવામાના શહીદોનો બદલો લેવા અને આતંકવાદીઓને પાઠ ભણાવવા ભારતીય સેનાએ 26 ફેબ્રુઆરી, 2019ના રોજ 'ઓપરેશન બાલાકોટ' હાથ ધર્યું હતું. હુમલાના બરાબર 12 દિવસ પછી ભારતીય વાયુસેનાના વિમાનોએ પાકિસ્તાનની સરહદમાં ઘૂસીને ખૈબર પખ્તુનખ્વા પ્રાંતના બાલાકોટમાં ચાલી રહેલા જૈશ-એ-મોહમ્મદના મુખ્ય આતંકવાદી તાલીમ શિબિરો પર સર્જિકલ એરસ્ટ્રાઇક કરી હતી. આ સફળ ઓપરેશનમાં સેંકડો આતંકવાદીઓનો સફાયો કરવામાં આવ્યો હતો અને તેમના અડ્ડાઓ જમીનદોસ્ત કરી દેવાયા હતા.