રાજપાલ યાદવનો પ્રેમાનંદજી સાથેનો જુનો વીડિયો વાયરલ

બોલીવુડના પ્રખ્યાત કોમેડી અભિનેતા રાજપાલ યાદવ હાલ તિહાર જેલમાં છે અને તેમના ₹9 કરોડના ચેક બાઉન્સ કેસમાં જામીન અરજી પર સુનાવણી હવે 16 ફેબ્રુઆરીએ થશે. દિલ્હી હાઈકોર્ટે 12 ફેબ્રુઆરીએ આ અરજી પર સુનાવણી સ્થગિત કરી દીધી છે. કોર્ટમાં તેમના વકીલે જણાવ્યું કે તેઓ અરજીના જવાબ માટે વધુ સમય માંગે છે અને તેઓ આગામી તારીખે પૂરા તર્ક સાથે હાજર થશે. જસ્ટિસ સ્વરણા કાંતા શર્માએ આ કેસમાં અસંતોષ વ્યક્ત કર્યો અને કહ્યું કે રાજપાલે અનેક વખત વચન આપ્યું હતું કે તેઓ લોનની રકમ ચૂકવશે, પરંતુ અત્યાર સુધી કોઈ ચુકવણી થઈ નથી. 

આ કેસની વચ્ચે રાજપાલ યાદવને બોલીવુડના અનેક સ્ટાર્સ તરફથી મદદ મળી રહી છે. તેમના મેનેજરે જણાવ્યું કે સલમાન ખાન, અજય દેવગણ, સોનુ સૂદ અને ગુરુ રંધાવા જેવા કલાકારોએ આર્થિક અને ભાવનાત્મક સમર્થન આપ્યું છે. ગુરુ રંધાવાએ તો તેમને એક મ્યુઝિક વીડિયોની ઓફર પણ કરી છે. રાજપાલની પત્ની રાધા યાદવે કહ્યું કે "દરેક વ્યક્તિ તેમની સાથે ઊભા છે અને આ મુશ્કેલ સમયમાં મદદ કરી રહ્યા છે." 

 રાજપાલે જેલમાં સરેન્ડર કરતા પહેલા એક ભાવુક વીડિયોમાં કહ્યું હતું કે "મારી પાસે પૈસા નથી અને મિત્રો પણ છોડી ગયા છે," પરંતુ હવે તેમને અનેક તરફથી સમર્થન મળી રહ્યું છે.

આ બધાની વચ્ચે ડિસેમ્બર 2025માં વૃંદાવનમાં પ્રેમાનંદ મહારાજ સાથેની તેમની મુલાકાતનો વીડિયો સોશિયલ મીડિયા પર વાયરલ થઈ રહ્યો છે. આ વીડિયોમાં રાજપાલ યાદવ હસીને મહારાજ પાસે જાય છે અને મહારાજ તેમને પૂછે છે, "ઠીક છો?" તો રાજપાલ કહે છે, "આજે ઠીક છું." આ સાંભળીને મહારાજ હસી પડે છે અને કહે છે કે રાજપાલ ભારતવાસીઓને હસાવે છે અને મનોરંજન કરે છે, જે સારી વાત છે. 

રાજપાલે તેમના ગુરુ શ્રી પંડિત દેવ પ્રભાકર જી શાસ્ત્રીનો ઉલ્લેખ કર્યો, જેઓ 2020માં બ્રહ્મલીન થયા હતા. તેમણે જણાવ્યું કે 1999માં તેમને દીક્ષા મળી અને ગુરુજી સાથે વિશ્વ કલ્યાણ માટે સવા કરોડ પાર્થિવ શિવલિંગ, મહારુદ્ર યજ્ઞ અને અન્ય અનુષ્ઠાન કર્યા હતા. તેઓ અભિનય કરતા રહ્યા પરંતુ ગુરુજી સાથે જોડાયેલા રહ્યા. 

પ્રેમાનંદ મહારાજે જીવનની વાસ્તવિકતા પર ઊંડી વાત કરી અને કહ્યું કે જીવનનો અસલી ફાયદો એ છે કે મન ભગવાન સાથે જોડાયેલું રહે. જીવનમાં મુશ્કેલી, દુખ આવે તો મુશ્કેલ થઈ જાય. આર્થિક પરેશાની, સંબંધોમાં મુશ્કેલીમાં માત્ર ભગવાન જ સાથ આપે છે. સારા સમયમાં લોકો સાથે રહે છે પરંતુ મુસીબતમાં કોઈ સાથ આપતું નથી. એટલે ભગવાનનું સ્મરણ કરો અને જીવનને આનંદથી ભરી દો. દરેક મુશ્કેલીથી લડતા શીખો અને ક્યારેય હાર ન માનો. 

રાજપાલ ભાવુક થઈને કહે છે, "તમને જોઈને મને ખાતરી થઈ ગઈ છે કે ભગવાન અસ્તિત્વમાં છે. હું ઘણું બધું કહેવા માંગતો હતો, પરંતુ હવે કંઈ કહી શકતો નથી." આ વીડિયોને જોઈને લોકો કોમેન્ટ કરી રહ્યા છે કે મહારાજને કદાચ પહેલેથી જ આવનારી મુશ્કેલીનો અણસાર હતો અને તેમના શબ્દો હવે ભવિષ્યવાણી જેવા લાગી રહ્યા છે. 

આ કેસની પૃષ્ઠભૂમિમાં, રાજપાલ યાદવને 6 મહિનાની જેલની સજા ફટકારવામાં આવી હતી અને દિલ્હી હાઈકોર્ટે તેમની રાહત અરજી ફગાવી દીધી હતી. તેઓ 5 ફેબ્રુઆરીએ જેલમાં સરેન્ડર કર્યા હતા.તેમના ચાહકો અને બોલીવુડ તેમની પાછળ ઊભા છે અને આશા છે કે 16 ફેબ્રુઆરીની સુનાવણીમાં તેમને જામીન મળી જશે.