નાગૌર: શાળામાં રમતા-રમતા 9 વર્ષની બાળકીનું મોત

રાજસ્થાનના નાગૌર જિલ્લાના ગોટન શહેરમાંથી એક અત્યંત આઘાતજનક સમાચાર સામે આવ્યા છે. અહીંની એક ખાનગી શાળામાં અભ્યાસ કરતી માત્ર 9 વર્ષની બાળકીનું હૃદયરોગના હુમલાને કારણે નિધન થયું છે. આ ઘટનાએ તબીબી જગત અને વાલીઓ માટે ચિંતાના ગંભીર પ્રશ્નો ઊભા કર્યા છે.

પ્રાર્થના સભા પહેલા જ સર્જાયો કાળમુખો ખેલ : 

ગોટન ઇન્ટરનેશનલ સ્કૂલમાં અભ્યાસ કરતી દિવ્યા નામની બાળકી દરરોજની જેમ 23 ફેબ્રુઆરીના રોજ સવારે 7 વાગ્યે શાળાએ પહોંચી હતી. હજુ તો શાળાની સવારની પ્રાર્થના શરૂ થાય તે પહેલાં તે પોતાના મિત્રો સાથે મેદાનમાં રમી રહી હતી. આ આનંદની પળો દરમિયાન અચાનક દિવ્યા બેભાન થઈને જમીન પર ઢળી પડી હતી. શાળાના સ્ટાફ દ્વારા તાત્કાલિક તેને નજીકની સરકારી હોસ્પિટલમાં લઈ જવામાં આવી હતી, પરંતુ ફરજ પરના તબીબોએ તેને મૃત જાહેર કરી હતી. તબીબી તપાસમાં મૃત્યુનું કારણ કાર્ડિયાક અરેસ્ટ હોવાનું સામે આવ્યું છે.

સીસીટીવીમાં કેદ થઈ અંતિમ પળો : 

આ સમગ્ર ઘટના શાળાના સીસીટીવી કેમેરામાં કેદ થઈ ગઈ છે. ફૂટેજમાં જોઈ શકાય છે કે દિવ્યા અન્ય બાળકો સાથે એકદમ સામાન્ય રીતે દોડી રહી હતી અને અચાનક એક પળમાં તેનું શરીર શાંત થઈ ગયું. ચોંકાવનારી વાત એ છે કે બાળકીને અગાઉ કોઈ બીમારી નહોતી કે તેના શરીર પર કોઈ ઈજાના નિશાન પણ જોવા મળ્યા નથી. સોશિયલ મીડિયા પર આ વીડિયો વાઈરલ થતા લોકોમાં ભારે અરેરાટી વ્યાપી ગઈ છે.

એક જ પરિવારમાં ચાર મહિનામાં બીજો આઘાત : 

દિવ્યાના નિધનથી બાપીડિયા પરિવાર પર આભ ફાટ્યું છે. આ પરિવાર માટે નિયતિ ખૂબ જ ક્રૂર સાબિત થઈ છે, કારણ કે માત્ર ચાર મહિના પહેલા જ દિવ્યાના મોટા ભાઈનું પણ આ જ રીતે અચાનક હાર્ટ એટેકથી અવસાન થયું હતું. ટૂંકા ગાળામાં પોતાના બે વહાલસોયા સંતાનો ગુમાવતા માતા-પિતાની સ્થિતિ વર્ણવી શકાય તેમ નથી. પરિવારની વિનંતી અને કોઈ શંકાસ્પદ કારણ ન જણાતા પોસ્ટમોર્ટમ વગર જ બાળકીના અંતિમ સંસ્કાર કરવામાં આવ્યા હતા.

નિષ્ણાતોની ચિંતા: નાના બાળકોમાં વધતું જોખમ 

છેલ્લા કેટલાક સમયથી નાની ઉંમરના બાળકો અને યુવાનોમાં હાર્ટ એટેકના કિસ્સાઓમાં ચિંતાજનક વધારો જોવા મળી રહ્યો છે. ડોક્ટરોનું માનવું છે કે બદલાતી જીવનશૈલી, માનસિક તણાવ અથવા જન્મજાત હૃદયની ખામી આ માટે જવાબદાર હોઈ શકે છે. આ ઘટના બાદ વાલીઓમાં પણ પોતાના બાળકોના સ્વાસ્થ્યને લઈને ફાળ પડી છે.