ભારત અને બ્રાઝિલ વચ્ચેના સંબંધોમાં આજે એક નવો અધ્યાય જોડાયો છે. વડાપ્રધાન નરેન્દ્ર મોદી અને બ્રાઝિલના રાષ્ટ્રપતિ લુઈઝ ઈનાસિયો લુલા ડી સિલ્વા વચ્ચે દિલ્હીમાં યોજાયેલી ઉચ્ચ સ્તરીય બેઠકમાં 'ક્રિટિકલ મિનરલ્સ' (મહત્વપૂર્ણ ખનિજો) અને 'રેર અર્થ' (દુર્લભ ખનિજો) માટેના સમજૂતી કરાર (MoU) પર હસ્તાક્ષર કરવામાં આવ્યા છે. આ કરાર ભારત માટે વ્યૂહાત્મક રીતે અત્યંત મહત્વનો માનવામાં આવે છે.
સપ્લાય ચેઈનને મજબૂત બનાવવાની દિશામાં મોટું પગલું
સંયુક્ત પત્રકાર પરિષદને સંબોધતા PM મોદીએ જણાવ્યું હતું કે, "ક્રિટિકલ મિનરલ્સ અને રેર અર્થ પરનો આ કરાર એક સ્થિતિસ્થાપક સપ્લાય ચેઈન બનાવવા માટેનું મુખ્ય પગલું છે. ભારત અને બ્રાઝિલ વચ્ચે સંરક્ષણ અને સુરક્ષા ક્ષેત્રે પણ સહયોગ સતત વધી રહ્યો છે, જે પરસ્પર વિશ્વાસનું ઉત્તમ ઉદાહરણ છે."
પીએમ મોદીએ બ્રાઝિલને સસ્તી અને ગુણવત્તાયુક્ત દવાઓ પૂરી પાડવા માટે હેલ્થ સેક્ટરમાં પણ સહયોગ વધારવાની ખાતરી આપી હતી.
વૈશ્વિક સ્તરે રેર અર્થ મિનરલ્સના ઉત્પાદનમાં અત્યારે ચીનનો એકાધિકાર છે. ઈલેક્ટ્રિક વાહનો (EV), સોલર પેનલ્સ, સ્માર્ટફોન અને મિસાઈલ ટેકનોલોજી માટે આ ખનિજો અનિવાર્ય છે.
બ્રાઝિલ પાસે વિશ્વનો બીજા ક્રમનો સૌથી મોટો ખનિજ ભંડાર છે. આ કરાર દ્વારા ભારત હવે ચીન પરની પોતાની નિર્ભરતા ઘટાડી શકશે અને ઘરઆંગણે આધુનિક ટેકનોલોજીના ઉત્પાદનને વેગ આપી શકશે.
ભારતની મુલાકાતે આવેલા રાષ્ટ્રપતિ લુલાએ ભારતની IT, આર્ટિફિશિયલ ઇન્ટેલિજન્સ (AI), બાયોટેકનોલોજી અને સ્પેસ એક્સપ્લોરેશન ક્ષેત્રે થયેલી પ્રગતિના મુક્તકંઠે વખાણ કર્યા હતા.
તેમણે કહ્યું કે, "ભારત અને બ્રાઝિલ વચ્ચેની વ્યૂહાત્મક ભાગીદારીના 20 વર્ષની ઉજવણીના અવસરે અમે સંરક્ષણ, ઉર્જા અને ડિજિટલ ટ્રાન્સફોર્મેશન જેવા પાંચ મુખ્ય ક્ષેત્રોમાં એક્શન મોડમાં આવી ગયા છીએ."
ઉલ્લેખનીય છે કે રાષ્ટ્રપતિ લુલા દિલ્હીમાં આયોજિત 'ઈન્ડિયા AI ઈમ્પેક્ટ સમિટ 2026' માં ભાગ લેવા માટે ડઝનથી વધુ મંત્રીઓ અને ઉદ્યોગપતિઓના પ્રતિનિધિમંડળ સાથે ભારત આવ્યા છે.

ભારત-બ્રાઝિલ વચ્ચે MOU

રેરઅર્થ મિનરલ્સ અને સંરક્ષણ અને હેલ્થ સેક્ટરમાં માટે વ્યૂહાત્મક કરાર, સપ્લાયચેઈન થશે મજબૂત

February 21, 2026 | 17:52 IST