ઉત્તર પ્રદેશના કાનપુરમાં રવિવારે બપોરે એક ભયાનક અકસ્માત સર્જાયો હતો. શહેરના પ્રતિષ્ઠિત તમ્બાકુ ઉદ્યોગપતિ કે.કે. મિશ્રાના પુત્ર શિવમ મિશ્રાએ પોતાની અંદાજે ₹10 કરોડની લેમ્બોર્ગિની કાર પરનો કાબૂ ગુમાવતા રસ્તા પર ચાલતા રાહદારીઓ અને ટુ-વ્હીલર સવારોને કચડી નાખ્યા હતા. આ ગમખ્વાર અકસ્માતમાં 6 લોકો ગંભીર રીતે ઇજાગ્રસ્ત થયા છે.
ઘટનાનો ભયાનક મંજર
VIP રોડ પર રેવ-3 મોલ પાસે બનેલી આ ઘટનાના સીસીટીવી ફૂટેજ પણ સામે આવ્યા છે. પ્રત્યક્ષદર્શીઓના જણાવ્યા અનુસાર, પૂરપાટ ઝડપે આવી રહેલી લેમ્બોર્ગિનીએ પહેલા એક ઓટો-રિક્ષાને ટક્કર મારી અને ત્યારબાદ રસ્તાના છેડે ઉભેલી રોયલ એનફિલ્ડ બાઈકને જોરદાર હિટ કરી હતી.
આ અથડામણ એટલી ભયાનક હતી કે બાઈક સવાર હવામાં 10 ફૂટ ઉંચો ઉછળીને નીચે પટકાયો હતો. કાર બાઈકના આગળના વ્હીલ પર ચડી ગઈ હતી અને વીજળીના થાંભલા સાથે અથડાઈને અટકી હતી.
લોકોનો રોષ અને પોલીસની કાર્યવાહી
અકસ્માત બાદ તરત જ સ્થાનિક લોકોએ કારને ઘેરી લીધી હતી. આક્ષેપ છે કે શિવમ મિશ્રા સાથેના ખાનગી સુરક્ષા ગાર્ડોએ લોકો સાથે ગેરવર્તન કર્યું હતું. ઘટનાની જાણ થતા જ પોલીસે ડ્રાઈવર અને ઇજાગ્રસ્તોને ખાનગી હોસ્પિટલમાં ખસેડ્યા હતા. ઇજાગ્રસ્તોમાં મોહમ્મદ તૌફીક નામના યુવકને પગમાં ગંભીર ઈજાઓ પહોંચી છે.
FIR અને વિવાદ
લોકોએ આક્ષેપ કર્યો હતો કે ડ્રાઈવર હાઈ-પ્રોફાઈલ પરિવારનો હોવાથી પોલીસે FIR નોંધવામાં વિલંબ કર્યો છે. જોકે, DCP અતુલ કુમાર શ્રીવાસ્તવે સ્પષ્ટ કર્યું કે ભારતીય ન્યાય સંહિતા (BNS)ની વિવિધ કલમો હેઠળ ગુનો નોંધવામાં આવ્યો છે.
ડ્રાઈવરના પક્ષે દાવો કરવામાં આવ્યો છે કે તેને ચાલુ કારે 'મૃગી' (Seizure) નો હુમલો આવતા અકસ્માત સર્જાયો હતો, જેની હાલ પોલીસ તપાસ કરી રહી છે.

લેમ્બોર્ગિનીએ 6ને અડફેટે લીધા

લેમ્બોર્ગિનીની ટક્કર બાદ રાઇડર 10 ફૂટ હવામાં ઉંચે ઉછળ્યો; લોકોએ નબીરાને ઘેર્યો

February 9, 2026 | 14:25 IST