ભારત ખરીદશે 114 નવા રાફેલ, ₹3.60 લાખ કરોડની મંજૂરી

ભારતીય સંરક્ષણ ક્ષેત્રે એક મોટો અને ઐતિહાસિક નિર્ણય લેવામાં આવ્યો છે. સંરક્ષણ સંપાદન પરિષદ (DAC) એ ભારતીય વાયુસેના માટે ફ્રાન્સની દસોલ્ટ એવિએશન પાસેથી 114 નવા રાફેલ લડાયક વિમાનો ખરીદવાના પ્રસ્તાવને મંજૂરી આપી દીધી છે. આશરે ₹3.60 લાખ કરોડના આ મેગા પ્રોજેક્ટ હેઠળ વાયુસેનાની લડાયક ક્ષમતાઓને નવી ઊંચાઈ પર લઈ જવામાં આવશે.

મેક ઇન ઇન્ડિયા હેઠળ થશે નિર્માણ : 

આ સોદાની સૌથી મહત્વની બાબત એ છે કે ખરીદવામાં આવનારા મોટાભાગના મલ્ટી-રોલ ફાઇટર એરક્રાફ્ટ (MRFA) ભારતની અંદર જ બનાવવામાં આવશે. આ ઉપરાંત, આ સોદામાં અત્યંત ચોકસાઈથી હુમલો કરી શકે તેવી કોમ્બેટ મિસાઇલો અને હાઇ-એલ્ટિટ્યુડ સ્યુડો-સેટેલાઇટ (AS-HAPS) નો પણ સમાવેશ થાય છે. આ ટેકનોલોજીની મદદથી ભારતની જાસૂસી, દેખરેખ અને રિમોટ સેન્સિંગ ક્ષમતાઓમાં ઘણો સુધારો થશે.

વાયુસેનાની ઘટતી શક્તિને મળશે બૂસ્ટર ડોઝ : 

હાલમાં ભારતીય વાયુસેનાની ફાઇટર સ્ક્વોડ્રનની સંખ્યા ઘટીને 29 થઈ ગઈ છે, જે નિર્ધારિત 42 સ્ક્વોડ્રન કરતા ઘણી ઓછી છે. મિગ-21 જેવા જૂના વિમાનો નિવૃત્ત થતા અને આગામી સમયમાં મિરાજ 2000 તથા જગુઆર વિમાનો પણ નિવૃત્ત થવાના હોવાથી, નવા રાફેલ જેટનો ઉમેરો ભારતની હવાઈ સુરક્ષા માટે અત્યંત અનિવાર્ય બની ગયો હતો. ફ્રાન્સના રાષ્ટ્રપતિ ઇમેન્યુઅલ મેક્રોનની ભારત મુલાકાત પહેલા મળેલી આ મંજૂરી વ્યૂહાત્મક રીતે પણ મહત્વની છે.

સેના અને નૌકાદળ માટે પણ મોટા નિર્ણયો : 

માત્ર વાયુસેના જ નહીં, પરંતુ ભારતીય સેના માટે પણ એન્ટી-ટેન્ક માઇન્સ 'વિભાવ' અને T-72 ટેન્કોના અપગ્રેડેશનને મંજૂરી અપાઈ છે. આ સાથે જ ભારતીય નૌકાદળ માટે પાવર જનરેટર અને P8I લોંગ રેન્જ મેરીટાઇમ એરક્રાફ્ટના અપગ્રેડેશનને ક્લિયરન્સ મળ્યું છે. આ પગલાંથી એન્ટિ-સબમરીન યુદ્ધ અને દરિયાઈ દેખરેખમાં નૌકાદળની તાકાત વધશે.

આ તમામ ખરીદી અને અપગ્રેડેશનનો મુખ્ય ઉદ્દેશ્ય વિદેશી ઉત્પાદકો પરની નિર્ભરતા ઘટાડીને સંરક્ષણ ક્ષેત્રે 'આત્મનિર્ભરતા' હાંસલ કરવાનો છે.