ભાવનગરમાં 115 કિમી રેલવે ટ્રેક પર AI સિસ્ટમ મુકાશે

ગુજરાતના ગૌરવ સમાન એશિયાઈ સિંહોની સુરક્ષા માટે રેલવે મંત્રાલયે એક અત્યંત મહત્વનો અને ટેકનોલોજી આધારિત નિર્ણય લીધો છે. રાજ્યસભાના સાંસદ પરિમલ નથવાણી દ્વારા ઉઠાવવામાં આવેલા પ્રશ્નના પ્રત્યુત્તરમાં કેન્દ્રીય રેલવે મંત્રીએ જણાવ્યું કે, ભાવનગર રેલવે ડિવિઝન હેઠળ આવતા દામનગરથી પીપાવાવ સુધીના અંદાજે 115 કિલોમીટર લાંબા રેલવે ટ્રેક પર હવે AI આધારિત 'ઇન્ટ્રુઝન ડિટેક્શન સિસ્ટમ' કાર્યરત કરવામાં આવશે. 

માત્ર ડિજિટલ જ નહીં પણ ભૌતિક સુરક્ષા પર પણ ધ્યાન

આ હાઈટેક સિસ્ટમ ખાસ કરીને એવા વિસ્તારોમાં તૈનાત કરવામાં આવશે જ્યાં સિંહોની અવર-જવર વધુ હોય છે, જેથી ભૂતકાળમાં થયેલા ગમખ્વાર અકસ્માતોને અટકાવી શકાય. આ પ્રોજેક્ટ હેઠળ સિંહ જેવો જ રેલવે ટ્રેકની નજીક આવશે કે તરત જ AI કેમેરા અને સેન્સર્સ તેને ઓળખી લેશે અને રિયલ ટાઈમમાં લોકો પાયલટ, સ્ટેશન માસ્ટર અને કંટ્રોલ રૂમને એલર્ટ મોકલશે. આ ટેકનોલોજીનો મુખ્ય હેતુ સિંહોના જીવ બચાવવાનો છે, કારણ કે એલર્ટ મળતા જ ટ્રેન ચાલક સમયસર ઝડપ ઘટાડી શકશે અથવા ટ્રેન ઉભી રાખી શકશે. આ રેલવે ટ્રેક પર માત્ર ડિજિટલ જ નહીં પણ ભૌતિક સુરક્ષા પર પણ ધ્યાન આપવામાં આવી રહ્યું છે.

સિંહો માટે 'ડેથ ટ્રેપ' બનવાને બદલે સુરક્ષિત કોરિડોર

રેલવે મંત્રીના જણાવ્યા અનુસાર, સિંહોને સુરક્ષિત રીતે પસાર થવા માટે રેલવે ટ્રેકની નીચે બે અંડરપાસ તૈયાર કરવામાં આવ્યા છે અને આગામી સમયમાં બીજા 5 નવા અંડરપાસ બનાવવાનું આયોજન છે. સાંસદ પરિમલ નથવાણીની રજૂઆત બાદ લેવાયેલો આ નિર્ણય ગીરના વન્યજીવો માટે આશીર્વાદરૂપ સાબિત થશે. ભાવનગર ડિવિઝનનો આ 115 કિમી લાંબો રેલવે ટ્રેક હવે સિંહો માટે 'ડેથ ટ્રેપ' બનવાને બદલે સુરક્ષિત કોરિડોર તરીકે ઓળખાશે, જે વન્યજીવ સંરક્ષણ ક્ષેત્રે ભારતનું એક મોટું કદમ છે. આ આધુનિક સિસ્ટમથી ભવિષ્યમાં રેલવે ટ્રેક પર થતા અકસ્માતોનું પ્રમાણ નહિવત થઈ જવાની આશા છે.