અલ્હાબાદ હાઈકોર્ટે શુક્રવારે જ્યોતિષપીઠના શંકરાચાર્ય સ્વામી અવિમુક્તેશ્વરાનંદ સરસ્વતીને એક મોટી કાયદાકીય રાહત આપી છે. કોર્ટે તેમની ધરપકડ પર વચગાળાની રોક લગાવી દીધી છે અને સ્પષ્ટ કર્યું છે કે આગામી સુનાવણી સુધી તેમની સામે કોઈ પણ પ્રકારની દંડાત્મક કાર્યવાહી કરી શકાશે નહીં. હાઈકોર્ટે આ આદેશ આપતા સંબંધિત અધિકારીઓને શંકરાચાર્ય સામે તાત્કાલિક પગલાં ન લેવાનો નિર્દેશ આપ્યો હતો.
જાતીય સતામણી અને પોક્સો એક્ટ હેઠળ નોંધાઈ હતી FIR :&nbsp;
આ સમગ્ર વિવાદ જાતીય સતામણીના આક્ષેપો સાથે જોડાયેલો છે. ગત 21 ફેબ્રુઆરીના રોજ શંકરાચાર્ય અવિમુક્તેશ્વરાનંદ અને તેમના શિષ્ય મુકુન્દાનંદ બ્રહ્મચારી વિરુદ્ધ એક સગીર સહિત બે વ્યક્તિઓ દ્વારા ગંભીર આરોપો લગાવવામાં આવ્યા હતા. આ મામલે પોલીસ મથકે પોક્સો (POCSO) એક્ટ સહિતની વિવિધ કલમો હેઠળ એફઆઈઆર દાખલ કરવામાં આવી હતી. આ કેસમાં રાહત મેળવવા માટે શંકરાચાર્ય દ્વારા હાઈકોર્ટના દ્વાર ખખડાવવામાં આવ્યા હતા.
સત્ય સાબિત કરવા નાર્કો ટેસ્ટની તૈયારી :&nbsp;
પોતાના પર લાગેલા ગંભીર આરોપો બાદ શંકરાચાર્યએ જાહેરમાં પોતાની પ્રતિક્રિયા આપી હતી. તેમણે આક્ષેપોને પાયાવિહોણા ગણાવતા જણાવ્યું હતું કે જો સત્ય બહાર લાવવા માટે નાર્કો ટેસ્ટ જરૂરી હોય તો તેઓ તેના માટે સંપૂર્ણ રીતે તૈયાર છે. તેમણે આત્મવિશ્વાસ સાથે કહ્યું હતું કે સત્યને ઉજાગર કરવા માટે ઉપલબ્ધ તમામ વૈજ્ઞાનિક પદ્ધતિઓનો ઉપયોગ થવો જોઈએ જેથી દૂધનું દૂધ અને પાણીનું પાણી થઈ શકે.
ષડયંત્રનો આક્ષેપ અને શંકરાચાર્યનો પક્ષ :&nbsp;
સ્વામી અવિમુક્તેશ્વરાનંદે આ સમગ્ર ઘટનાક્રમને એક ઘડાયેલી વાર્તા ગણાવી હતી. તેમણે ઉમેર્યું હતું કે જે બાળક ક્યારેય તેમની પાસે આવ્યું જ નથી, તેને તેમના નામ સાથે જોડીને ખોટો કેસ બનાવવામાં આવ્યો છે. તેમના મતે, જૂઠાણું લાંબો સમય ટકી શકતું નથી અને જેમ જેમ તપાસ આગળ વધશે તેમ તેમ આ બનાવટી કેસનું સત્ય લોકોની સામે આવી જશે.
હાલમાં હાઈકોર્ટે આપેલી આ રાહત બાદ શંકરાચાર્યના સમર્થકોમાં હર્ષની લાગણી જોવા મળી રહી છે. કોર્ટ હવે આગામી દિવસોમાં આ મામલે વધુ સુનાવણી હાથ ધરશે અને બંને પક્ષોની દલીલોને આધારે અંતિમ નિર્ણય લેશે.

સ્વામી અવિમુક્તેશ્વરાનંદ

જાતીય સતામણીના કેસમાં અલ્હાબાદ હાઈકોર્ટની મોટી રાહત, આગામી સુનાવણી સુધી ધરપકડ સામે રક્ષણ

February 27, 2026 | 18:35 IST