રાજસ્થાનના રાજકારણના દિગ્ગજ નેતા અને પૂર્વ કેબિનેટ મંત્રી હેમ સિંહ ભડાનાનું સોમવારે સવારે નિધન થયું છે. તેઓ છેલ્લા 5 મહિનાથી કેન્સર જેવી ગંભીર બીમારી સામે ઝઝૂમી રહ્યા હતા. માત્ર 55 વર્ષની વયે તેમણે અંતિમ શ્વાસ લીધા હતા. તેમની સારવાર જયપુરની એક ખાનગી હોસ્પિટલમાં ચાલી રહી હતી, પરંતુ તબિયતમાં સુધારો ન થતાં તેમને હાલમાં જ અલવર સ્થિત તેમના નિવાસસ્થાને લાવવામાં આવ્યા હતા. આજે સવારે આશરે 7 વાગ્યે હેમ સિંહ ભડાના એ અંતિમ શ્વાસ લેતા તેમના પરિવાર અને સમર્થકોમાં ઘેરા શોકની લાગણી પ્રસરી ગઈ છે.
રાજકીય સફર BJP સાથે જોડાયેલી
હેમ સિંહ ભડાના રાજસ્થાનના અલવર જિલ્લાની થાનાગાજી વિધાનસભા બેઠક પરથી ધારાસભ્ય તરીકે ચૂંટાયા હતા. તેમણે રાજ્ય સરકારમાં કેબિનેટ મંત્રી તરીકે રહીને વિવિધ મહત્વના વિભાગોની જવાબદારી સંભાળી હતી. ખાસ કરીને ગુર્જર સમાજના એક પ્રભાવશાળી નેતા તરીકે તેમની ઓળખ હતી. હેમ સિંહ ભડાના એ તેમના કાર્યકાળ દરમિયાન પ્રાદેશિક વિકાસ, ખેડૂત કલ્યાણ અને સામાજિક ન્યાયના મુદ્દાઓ પર સક્રિયપણે કામ કર્યું હતું. તેમની રાજકીય સફર મુખ્યત્વે BJP સાથે જોડાયેલી રહી હતી અને તેમણે અલવર પંથકમાં પક્ષને મજબૂત બનાવવામાં મહત્વની ભૂમિકા ભજવી હતી.
કાર્યકર્તાઓ અને ચાહકોના ટોળેટોળા ઉમટી પડ્યા
હેમ સિંહ ભડાનાના નિધનના સમાચાર વાયુવેગે ફેલાતા થાનાગાજી અને સમગ્ર અલવર જિલ્લામાં શોકનો માહોલ જોવા મળી રહ્યો છે. તેમના નિવાસસ્થાને કાર્યકર્તાઓ અને ચાહકોના ટોળેટોળા ઉમટી પડ્યા છે. રાજ્યના અનેક મોટા નેતાઓએ તેમના નિધન પર શ્રદ્ધાંજલિ અર્પણ કરી છે. હેમ સિંહ ભડાના એ કેન્સર સામેની જંગમાં લડત આપી હતી, પરંતુ અંતે તેઓ જિંદગીની જંગ હારી ગયા. તેમના નિધનથી રાજસ્થાનના રાજકારણમાં અને ખાસ કરીને ગુર્જર સમુદાયમાં ક્યારેય ન પુરાય તેવી ખોટ પડી છે. હેમ સિંહ ભડાના હંમેશા તેમના સાદગીપૂર્ણ સ્વભાવ અને જનસેવા માટે યાદ રાખવામાં આવશે.

પૂર્વ કેબિનેટ મંત્રી હેમ સિંહ ભડાનાનું 55 વર્ષની વયે કેન્સરની લાંબી બીમારી બાદ નિધન થયું

February 2, 2026 | 10:41 IST