દરેક રાષ્ટ્રના ઇતિહાસમાં એવા દિવસો હોય છે જે તેના માનસપટ પર કાયમ માટે અંકિત થઈ જાય છે. ભારત માટે 14 ફેબ્રુઆરી 2019નો એ દિવસ 'બ્લેક ડે' તરીકે ઓળખાયો, જ્યારે પુલાવમામાં સીઆરપીએફના 40 જવાનોના બલિદાને સમગ્ર માનવતાને હચમચાવી દીધી હતી. પરંતુ છ વર્ષ પછી, 2026માં જ્યારે આપણે આ દિવસને યાદ કરીએ છીએ, ત્યારે તે માત્ર એક શોકનો દિવસ નથી રહ્યો, પણ ભારતની રણનીતિમાં આવેલા 'ઇન્ફ્લેક્શન પોઇન્ટ' (પરિવર્તન બિંદુ) તરીકે ઉભરી આવ્યો છે.
પીડામાંથી જન્મેલો મક્કમ નિર્ધાર
14 ફેબ્રુઆરી 2019ના રોજ જમ્મુ-શ્રીનગર હાઈવે પર થયેલા ભયાનક આત્મઘાતી હુમલાએ ભારતને આતંકવાદ સામેનો નરમ અભિગમ છોડવા મજબૂર કર્યું. પુલાવમાના ધુમાડા અને વિખરાયેલા સ્ટીલના ટુકડાઓએ ભારતને એક નવી દિશા આપી. તેના પરિણામે 'બાલાકોટ એરસ્ટ્રાઈક' થઈ, જેણે વિશ્વને સંકેત આપ્યો કે ભારત હવે ઘર આંગણે બેસીને આતંક સહન કરશે નહીં.
નવું ભારત: ઓપરેશન સિંદૂર અને સિંધુ જળ સંધિ
પુલાવમાના પડઘા હજુ શાંત થયા નથી ત્યાં ગત વર્ષે પહલગામમાં પ્રવાસીઓ પર થયેલા હુમલાએ ફરી સુરક્ષા એજન્સીઓને સતર્ક કરી. ભારતે તેના જવાબમાં 'ઓપરેશન સિંદૂર' (Op Sindoor) દ્વારા આતંકવાદી ઈન્ફ્રાસ્ટ્રક્ચરને નેસ્તનાબૂદ કર્યું. એટલું જ નહીં, ભારતે 'લોહી અને પાણી સાથે ન વહી શકે' તેવા મક્કમ વલણ સાથે દાયકાઓ જૂની 'સિંધુ જળ સંધિ' (Indus Water Treaty)ને મોકૂફ રાખીને આર્થિક અને વ્યૂહાત્મક સ્તરે પાકિસ્તાનને ઘેર્યું છે.
પરિવર્તનનો અહેસાસ
બ્લેક ડેની યાદોને જીવંત રાખવાનો ખરો હેતુ માત્ર શાળાઓ કે યુનિવર્સિટીઓમાં વાર્ષિક કાર્યક્રમો કરવા પૂરતો સીમિત નથી. આ દિવસ આપણને યાદ અપાવે છે કે આતંકવાદ સામેની લડાઈમાં જનતા અને સુરક્ષા દળો વચ્ચેનો સમન્વય કેટલો જરૂરી છે. જમ્મુ-કાશ્મીરના સામાન્ય લોકો, જેઓ દરરોજ નાકાબંધી અને પેટ્રોલિંગ વચ્ચે જીવે છે, તેમના માટે શાંતિની કિંમત શું છે તે આ દિવસ સમજાવે છે.
નવેમ્બર 2025માં લાલ કિલ્લા પાસે થયેલા બ્લાસ્ટના તાર ફરી પુલાવમા સાથે જોડાયેલા જોવા મળ્યા, જે સાબિત કરે છે કે આતંકના અંગારાઓ હજુ સંપૂર્ણ ઓલવાયા નથી. આથી જ, 'બ્લેક ડે' એ માત્ર ઇતિહાસ નથી, પણ એક સતત ચાલતી જાગૃતિ છે. મીડિયાએ પણ આ સંવેદનશીલ મુદ્દે ભડકાઉ રિપોર્ટિંગને બદલે તથ્યો અને માનવીય સંવેદનાઓને મહત્વ આપવાની જરૂર છે.
&nbsp;

આતંક સામે ઝીરો ટોલરન્સ

પુલાવમા અકસ્માત માત્ર પીડા નહીં, પણ ભારતના શૌર્યની નવી શરૂઆત બની, આતંક સામે ઝીરો ટોલરન્સ

February 14, 2026 | 10:24 IST