દિલ્હી: પત્ની-પુત્રીની હત્યા કરી લાશ બેડમાં છુપાવી

રાજધાની દિલ્હીના સરિતા વિહાર વિસ્તારમાં આવેલા આલી વિહારમાં શુક્રવારની રાત એક પરિવાર માટે કાળી સાબિત થઈ છે. 35 વર્ષીય મહિલા જ્યોતિ અને તેની 6 વર્ષની દીકરીની ગળું દબાવી હત્યા કરવામાં આવી છે. હત્યારાઓએ પુરાવા છુપાવવા માટે બંનેના શવ ઘરના પલંગના સ્ટોરેજ બોક્સ (બેડ બોક્સ) માં છુપાવી દીધા હતા.

ઘટનાનો ખુલાસો કઈ રીતે થયો?

પીડિતા જ્યોતિના પતિ સુંદરેશન શુક્રવારે રાત્રે ૯:૩૦ વાગ્યાની આસપાસ જ્યારે ઓફિસેથી પરત ફર્યા ત્યારે ઘરનો દરવાજો અંદરથી બંધ હતો. તેમના બે મોટા બાળકો સ્કૂલે ગયા હોવાથી તે સમયે સુરક્ષિત હતા.

પત્નીએ આખો દિવસ ફોન ન ઉપાડતા સુંદરેશન ચિંતિત હતા. જ્યારે ઘણો સમય સુધી દરવાજો ન ખુલ્યો ત્યારે પાડોશીઓની મદદથી દરવાજો તોડવામાં આવ્યો હતો.

અંદર જઈને તપાસ કરતા ઘરનો સામાન વેરવિખેર હતો. જ્યારે સુંદરેશને બેડ બોક્સ ખોલ્યું ત્યારે તેમની પત્ની અને નાની દીકરીની લાશ જોઈને તેમના પગ નીચેથી જમીન સરકી ગઈ હતી. પોલીસને રાત્રે 10:30 વાગ્યે જાણ કરવામાં આવી હતી.

શનિવારે થયેલા પોસ્ટમોર્ટમ રિપોર્ટ મુજબ, માતા અને દીકરી બંનેનું મોત ગળું દબાવવાને કારણે થયું છે. શરીર પર બહારથી કોઈ ગંભીર ઈજાના નિશાન દેખાયા નથી, જે દર્શાવે છે કે હત્યારાએ ખૂબ જ ચાલાકીથી આ કૃત્ય આચર્યું છે.

પાડોશી જ નીકળ્યો મુખ્ય શંકાસ્પદ

પોલીસની પ્રાથમિક તપાસમાં તે જ ઇમારતમાં રહેતા દીપ દયાલ નામના એકાઉન્ટન્ટ પર શંકાની સોય તાકવામાં આવી છે. પાડોશીઓના જણાવ્યા મુજબ, દીપ દયાલ પીડિતના પતિનો ભત્રીજો પણ થાય છે.

ઘટના બાદથી તે ફરાર છે. પોલીસે તેની સામે ભારતીય ન્યાય સંહિતા (BNS)ની કલમ 103(1 ) હેઠળ હત્યાનો ગુનો નોંધી તેની શોધખોળ શરૂ કરી છે.

ક્રાઈમ અને ફોરેન્સિક ટીમે ઘટનાસ્થળેથી પુરાવા એકત્ર કર્યા છે. જોકે, ઘરમાંથી કોઈ વસ્તુની ચોરી થઈ હોવાના સંકેત મળ્યા નથી, તેથી પોલીસ હવે હત્યા પાછળના અંગત અદાવત કે અન્ય કોઈ કારણની તપાસ કરી રહી છે.