મોબાઈલમાં અચાનક ઈન્ટરનેટ બંધ થયું… થોડીવાર પછી રૂમમાંથી આવી એવી ખબર કે પરિવાર ચોંકી ગયો!

Chhattisgarsh News: છત્તીસગઢના કોરબા જિલ્લામાં મોબાઈલ ઈન્ટરનેટ બંધ થવાના મામલે એક ચોંકાવનારી ઘટના સામે આવી છે. કરતલા પોલીસ સ્ટેશન વિસ્તારના કેરાકાચર ગામમાં મંગલો બાઈ નામની મહિલાએ મોબાઈલ ફોન પર રીલ અને ટીવી શો જોતી વખતે ઈન્ટરનેટ કનેક્શન બંધ થઈ જતાં કથિત રીતે જંતુનાશક દવા પી લીધી હતી. ગંભીર હાલતમાં મહિલાને કરતલા કોમ્યુનિટી હેલ્થ સેન્ટર બાદ કોરબા જિલ્લા હોસ્પિટલમાં ખસેડવામાં આવી હતી, જ્યાં સારવાર દરમિયાન તેનું મોત થયું હતું. જોકે, મહિલાના મોતનું ચોક્કસ કારણ જાણવા પોલીસ સમગ્ર ઘટનાની તપાસ કરી રહી છે.

ઈન્ટરનેટ બંધ થતાં મહિલા પરેશાન થઈ હોવાનો પરિવારનો દાવો
પરિવાર અને પોલીસ પાસેથી મળેલી પ્રાથમિક માહિતી મુજબ, મંગલો બાઈ ઘટનાના સમયે પોતાના મોબાઈલ ફોનનો ઉપયોગ કરી રહી હતી. આ દરમિયાન અચાનક ઈન્ટરનેટ કનેક્શન બંધ થઈ ગયું હતું. પરિવારના જણાવ્યા અનુસાર, નેટવર્ક ન મળતાં મહિલા પરેશાન થઈ હતી અને ગુસ્સામાં મોબાઈલ ફોન ફેંકી દીધો હતો. ત્યારબાદ મંગલો બાઈ રૂમમાં જતી રહી અને દરવાજો બંધ કરી દીધો હતો. થોડા સમય બાદ તેની તબિયત અચાનક બગડી હતી અને તેને ઉલટી થવા લાગી હતી. પરિવારજનોને શંકા જતા તેમણે તપાસ કરી હતી. આ દરમિયાન જંતુનાશક દવાની ગંધ આવતાં મહિલાએ દવા પીધી હોવાની જાણ થઈ હતી.

કોરબા જિલ્લા હોસ્પિટલમાં સારવાર દરમિયાન મોત
પરિવારજનો મંગલો બાઈને તાત્કાલિક કરતલા કોમ્યુનિટી હેલ્થ સેન્ટર લઈ ગયા હતા. તેમની સ્થિતિ ગંભીર હોવાથી તબીબોએ પ્રાથમિક સારવાર આપ્યા બાદ વધુ સારવાર માટે કોરબા જિલ્લા હોસ્પિટલમાં રિફર કરી હતી. હોસ્પિટલમાં સારવાર દરમિયાન મહિલાનું મોત થયું હતું. મંગલો બાઈના મોતની જાણ થતાં કરતલા પોલીસે તપાસ શરૂ કરી છે. કોરબાના સીએસપી પ્રતીક ચતુર્વેદીના જણાવ્યા મુજબ, મૃતક કેરાકાચર ગામની રહેવાસી હતી અને પ્રાથમિક માહિતીમાં તેણે જંતુનાશક દવા પીધી હોવાનું સામે આવ્યું છે. પોલીસે પરિવારજનોની પૂછપરછ પણ શરૂ કરી છે.

મહિલા લાંબા સમયથી સ્વાસ્થ્ય સમસ્યાથી પરેશાન હતી
પોલીસને આપેલી માહિતીમાં પરિવારજનોએ જણાવ્યું હતું કે મંગલો બાઈ છેલ્લા કેટલાક સમયથી સ્વાસ્થ્ય સંબંધિત સમસ્યાઓથી પરેશાન હતી. તેના હાથ અને પગમાં સોજો રહેતો હતો અને તેની સારવાર પણ ચાલી રહી હતી. આ સ્વાસ્થ્ય સમસ્યાઓને કારણે તે માનસિક રીતે પરેશાન હતી કે નહીં, તે અંગે પણ તપાસ કરવામાં આવી રહી છે.

મોબાઈલ અને ઈન્ટરનેટના વધતા ઉપયોગ વચ્ચે નિષ્ણાતની સલાહ
નિષ્ણાંતોના જણાવ્યા મુજબ, મોબાઈલ ફોન અને ઈન્ટરનેટનો વધુ પડતો ઉપયોગ કેટલાક લોકોમાં ચિંતા, ગુસ્સો અથવા અસ્વસ્થતા વધારી શકે છે. જોકે, દરેક વ્યક્તિની સ્થિતિ અલગ હોય છે અને કોઈ ચોક્કસ માનસિક કારણનું મૂલ્યાંકન નિષ્ણાત દ્વારા જ થઈ શકે છે. કોરબા પોલીસ હવે ઈન્ટરનેટ બંધ થવાની ઘટના, મહિલાની સ્વાસ્થ્ય સ્થિતિ અને અન્ય સંબંધિત પાસાઓને ધ્યાનમાં રાખીને તપાસ કરી રહી છે. પોલીસ તપાસ પૂર્ણ થયા બાદ જ મહિલાના મોત પાછળનું ચોક્કસ કારણ વધુ સ્પષ્ટ થઈ શકશે.