આંધ્રપ્રદેશના કાકીનાડા જિલ્લાના વેટલાપલેમ ગામમાં શનિવારે બપોરે 2 વાગ્યે એક ફટાકડા બનાવવાની ફેક્ટરીમાં ભયાનક વિસ્ફોટ થયો હતો. આ દુર્ઘટનામાં અત્યાર સુધીમાં 18 કામદારોના મોત થયા છે, જ્યારે 6 લોકો ગંભીર રીતે ઘાયલ થયા છે. વિસ્ફોટ સમયે ફેક્ટરીમાં 20થી વધુ કર્મચારીઓ કામ કરી રહ્યા હતા.
ઘટનાની વિગતો:
સ્થાનિક લોકોના જણાવ્યા અનુસાર, બપોરે બરાબર 2 વાગ્યે થયેલો આ વિસ્ફોટ એટલો પ્રચંડ હતો કે તેનો અવાજ 5 કિલોમીટર દૂર સુધી સંભળાયો હતો. ધડાકા બાદ ફેક્ટરીમાં ભીષણ આગ લાગી હતી અને જોતજોતામાં આખું યુનિટ બળીને રાખ થઈ ગયું હતું.
આસપાસના ગ્રામીણો તાત્કાલિક ઘટનાસ્થળે દોડી આવ્યા હતા અને કાટમાળ નીચે દબાયેલા તેમજ દાઝી ગયેલા લોકોને બહાર કાઢી હોસ્પિટલ પહોંચાડવાની કામગીરી શરૂ કરી હતી.
વિસ્ફોટ એટલો તીવ્ર હતો કે કામદારો ઘટનાસ્થળે જ જીવતા બળી ગયા હોવાનું કહેવાય છે, અને ઘણા મૃતદેહો ગંભીર રીતે વિકૃત થઈ ગયા હતા. લગભગ 15 લોકો ફસાયેલા હોવાની અથવા ગંભીર રીતે ઘાયલ થયા હોવાની આશંકા છે. હાલમાં બચાવ કામગીરી ચાલી રહી છે.
રાજ્યના ગૃહમંત્રી વંગાલપુડી અનીતાએ આ ઘટનામાં મૃત્યુઆંક વધવાની આશંકા વ્યક્ત કરી છે, કારણ કે ઈજાગ્રસ્તોની હાલત અત્યંત નાજુક છે. મુખ્યમંત્રી એન. ચંદ્રબાબુ નાયડુએ આ દુર્ઘટના પર ઊંડા શોકની લાગણી વ્યક્ત કરી છે અને વરિષ્ઠ અધિકારીઓને તાત્કાલિક ઘટનાસ્થળે પહોંચીને પરિસ્થિતિ પર નજર રાખવા આદેશ આપ્યા છે.
પ્રશાસન દ્વારા હાલ રાહત અને બચાવ કાર્ય યુદ્ધના ધોરણે ચલાવવામાં આવી રહ્યું છે અને વિસ્ફોટનું ચોક્કસ કારણ જાણવા તપાસના આદેશ આપવામાં આવ્યા છે.

ફટાકડાની ફેક્ટરીમાં બ્લાસ્ટ

આંધ્રપ્રદેશના વેટલાપલેમ ગામમાં ફટાકડા બનાવતી ફેક્ટરી રાખમાં ફેરવાઈ; 6ની હાલત ગંભીર

February 28, 2026 | 17:24 IST