અલ્હાબાદ હાઈકોર્ટે કાનપુર નગર નિગમને ઠપકો આપ્યો

નામની સ્પેલિંગમાં એક નાનકડી ભૂલને કારણે એક મહિલાને ફેમિલી પેન્શન મેળવવા માટે 45 વર્ષ સુધી અધિકારીઓના ધક્કા ખાવા પડ્યા. આ મામલામાં અલ્હાબાદ હાઈકોર્ટે કાનપુર મ્યુનિસિપલ કોર્પોરેશનના અધિકારીઓને આકરો ઠપકો આપ્યો છે અને એક અઠવાડિયાની અંદર આ મુદ્દો ઉકેલવાનો સખત આદેશ આપ્યો છે. જસ્ટિસ વિક્રમ ડી. ચૌહાણે મંજુ રાયની અરજી પર આ આદેશ આપ્યો છે.

અરજદાર મંજુ રાયના પિતા શેખર નાથ શુક્લા (સર્વિસ રેકોર્ડમાં શિખર નાથ શુક્લા) કાનપુર મ્યુનિસિપલ કોર્પોરેશનમાં કર્મચારી હતા. તેઓ 1975માં નિવૃત્ત થયા અને 1980માં તેમનું અવસાન થયું. તેમની સેવા દરમિયાન અને નિવૃત્તિ પછી નિયમિત પેન્શન મળતું હતું, પરંતુ તેમના મૃત્યુ બાદ પરિવારે ફેમિલી પેન્શન માટે અરજી કરી ત્યારે વિભાગે ફાઈલ બ્લોક કરી દીધી. વિવાદનું મુખ્ય કારણ નામની સ્પેલિંગમાં થયેલી ભૂલ હતી. વિભાગીય રેકોર્ડમાં નામ "શિખર નાથ શુક્લા" તરીકે નોંધાયેલું હતું, જ્યારે અરજી ફોર્મ અને કેટલાક દસ્તાવેજોમાં "શેખર નાથ શુક્લા" તરીકે દર્શાવાયું હતું. અંગ્રેજી જોડણીમાં "i" અને "ee"ના તફાવતને કારણે વિભાગે ફેમિલી પેન્શન આપવાનો ઇનકાર કર્યો હતો.

આ મામલો 45 વર્ષથી પેન્ડિંગ રહ્યો અને અરજદારે હાઈકોર્ટમાં અરજી દાખલ કરી. અરજદારના વકીલ વિનય શર્માએ દલીલ કરી હતી કે નામના સ્પેલિંગમાં માત્ર એક અક્ષરનો ફેરફાર છે અને તે એક જ વ્યક્તિના છે. આ અંગે સોગંદનામું, સક્સેશન સર્ટિફિકેટ અને અન્ય નક્કર દસ્તાવેજો રજૂ કરવામાં આવ્યા હતા. કોર્ટે બંને પક્ષોને સાંભળ્યા બાદ પ્રશાસનના વલણથી નારાજગી વ્યક્ત કરી. કોર્ટે નોંધ્યું કે અરજદારે પોતાની ઓળખ સાબિત કરવા માટે પૂરતા પુરાવા રજૂ કર્યા છે અને આટલા લાંબા સમય સુધી પેન્શન અટકાવવું અન્યાય છે.

હાઈકોર્ટે કાનપુર મ્યુનિસિપલ કોર્પોરેશનને એક અઠવાડિયાનો સમય આપ્યો છે કે આદેશનું પાલન કરીને ફેમિલી પેન્શનની બાકી રકમ સહિત તમામ લાભ આપવા જોઈએ. જો આદેશનું પાલન ન કરવામાં આવે તો મ્યુનિસિપલ કમિશનરે 26 ફેબ્રુઆરી 2026ના રોજ આગામી સુનાવણીમાં કોર્ટમાં રૂબરૂ હાજર રહીને સ્પષ્ટતા આપવી પડશે. કોર્ટે આદેશમાં સ્પષ્ટ કર્યું છે કે આવી નાની ટેક્નિકલ ભૂલને કારણે લાંબા સમય સુધી પેન્શન અટકાવવું યોગ્ય નથી અને તે અરજદારના હક્કનું ઉલ્લંઘન છે.

આ ઘટનાએ ફરી એક વાર સરકારી કચેરીઓમાં થતી ટેક્નિકલ ભૂલો અને તેના કારણે સામાન્ય નાગરિકોને પડતી મુશ્કેલીઓને ઉજાગર કરી છે. ઘણા લોકોને નાની ભૂલોને કારણે વર્ષો સુધી પેન્શન, પ્રોવિડન્ટ ફંડ કે અન્ય લાભ મળતા નથી. હાઈકોર્ટના આ આદેશથી આવા કેસોમાં ઝડપી નિર્ણય અને ન્યાય મળવાની આશા વધી છે.