હરિયાણાના ફરીદાબાદમાં આવેલી જાણીતી અલ-ફલાહ યુનિવર્સિટી ફરી એકવાર વિવાદોના વમળમાં ફસાઈ છે. દિલ્હી પોલીસની ક્રાઈમ બ્રાન્ચે યુનિવર્સિટીના ચેરમેન જવાદ અહેમદ સિદ્દીકીની કરોડો રૂપિયાના નાણાકીય કૌભાંડ અને આતંકવાદી પ્રવૃત્તિઓ સાથેના કથિત સંબંધોના આરોપમાં ધરપકડ કરી છે. કોર્ટે આ કેસની ગંભીરતાને ધ્યાનમાં રાખીને આરોપીને ચાર દિવસના પોલીસ રિમાન્ડ પર સોંપ્યો છે.
શંકાસ્પદ નાણાકીય વ્યવહારો અને હવાલા નેટવર્ક :&nbsp;
તપાસ એજન્સીઓને આશંકા છે કે યુનિવર્સિટીના વહીવટી માળખા અને ટ્રસ્ટની આડમાં મોટા પાયે ગેરકાયદેસર ભંડોળની હેરાફેરી કરવામાં આવતી હતી. રિમાન્ડ દરમિયાન પોલીસ આરોપીના નાણાકીય વ્યવહારો અને શંકાસ્પદ હવાલા નેટવર્ક અંગે ઊંડી પૂછપરછ કરશે. આ કેસમાં અત્યાર સુધીમાં બે અલગ-અલગ પોલીસ ફરિયાદો નોંધવામાં આવી છે.
લાલ કિલ્લા વિસ્ફોટ સાથેની કડીઓ :&nbsp;
અલ-ફલાહ યુનિવર્સિટીનું નામ માત્ર આર્થિક ગુનાઓમાં જ નહીં, પણ આતંકવાદ સાથે પણ જોડાયું છે. નવેમ્બર 2025 માં દિલ્હીના લાલ કિલ્લા પાસે થયેલા કાર બોમ્બ વિસ્ફોટની તપાસમાં યુનિવર્સિટી સાથે સંકળાયેલા એક ડૉક્ટરની સંડોવણી બહાર આવી હતી. આ ખુલાસા બાદ સુરક્ષા એજન્સીઓ યુનિવર્સિટીના વહીવટીતંત્ર પર સતત નજર રાખી રહી છે.
EDની કાર્યવાહી: 140 કરોડની સંપત્તિ જપ્ત :&nbsp;
એન્ફોર્સમેન્ટ ડિરેક્ટોરેટ (ED) એ પણ આ મામલે સકંજો કસ્યો છે. PMLA હેઠળ કાર્યવાહી કરતા ED એ આશરે 139.97 કરોડની કિંમતની 54 એકર જમીન અને અન્ય સ્થાવર મિલકતો જપ્ત કરી છે. તપાસ મુજબ, સિદ્દીકી તમામ સંસ્થાઓનો મુખ્ય સૂત્રધાર હતો અને ગેરકાયદેસર કમાણીનો સીધો લાભાર્થી હતો.
મેડિકલ કોલેજની મંજૂરીમાં છેતરપિંડી :&nbsp;
નેશનલ મેડિકલ કાઉન્સિલ (NMC) ના નિયમોને નેવે મૂકીને ખોટા દસ્તાવેજોના આધારે મેડિકલ કોલેજની મંજૂરી મેળવવાનો પણ ગંભીર આરોપ સિદ્દીકી પર છે. સત્તાધિકારીઓના મતે, આ એક મોટા શિક્ષણ અને આરોગ્ય કૌભાંડનો ભાગ છે. આગામી દિવસોમાં આ કેસમાં વધુ લોકોની ધરપકડ થવાની પૂરેપૂરી શક્યતા છે.

અલ ફલાહ યુનિવર્સિટી

મની લોન્ડરિંગ અને આતંકવાદી કનેક્શનના આરોપમાં દિલ્હી પોલીસની મોટી કાર્યવાહી

February 5, 2026 | 15:13 IST