અજીત પવાર પ્લેન ક્રેશ: ભત્રીજાઓએ માંગી FIR

મહારાષ્ટ્રના પૂર્વ ડેપ્યુટી સીએમ અજીત પવારના પ્લેન ક્રેશ મામલે વિવાદ વકર્યો છે. ગુરુવારે સવારે અજીત પવારના બંને ભત્રીજાઓ, ધારાસભ્ય રોહિત પવાર અને યોગેન્દ્ર પવાર બારામતી ગ્રામીણ પોલીસ સ્ટેશન પહોંચ્યા હતા.

તેમણે નાગરિક ઉડ્ડયન મહાનિદેશાલય (DGCA) અને એરક્રાફ્ટ કંપની VSR વેન્ચર્સ સામે ગુનો નોંધવાની માંગ કરી છે.

તપાસ એજન્સીઓની ભૂમિકા પર શંકા 

પોલીસ સ્ટેશનની બહાર રોહિત પવારે મીડિયાને જણાવ્યું કે, "અમે બે કલાક સુધી પોલીસ સાથે ચર્ચા કરી, પરંતુ તેઓ FIR નોંધવા તૈયાર નથી. પોલીસનું કહેવું છે કે આ માત્ર એક્સિડન્ટલ રિપોર્ટ છે. અમને DGCA, નાગરિક ઉડ્ડયન મંત્રાલય અને CIDની ભૂમિકા પર શંકા છે. એવું લાગે છે કે કંપનીને બચાવવા માટે પુરાવાનો નાશ કરવામાં આવી રહ્યો છે અને પોલીસ પર દબાણ છે."

ષડયંત્રના ગંભીર આરોપો:
રોહિત પવારે અગાઉ દિલ્હીમાં પ્રેસ કોન્ફરન્સ કરીને કેટલાક ચોંકાવનારા મુદ્દા ઉઠાવ્યા હતા:

બહુવિધ વિસ્ફોટો: દુર્ઘટના વખતે માત્ર એક નહીં પણ અનેક વિસ્ફોટો થયા હતા.

વધારાનું પેટ્રોલ: વિમાનમાં સામાન રાખવાની જગ્યાએ પેટ્રોલના વધારાના ડબ્બા રાખવામાં આવ્યા હોવાનો દાવો કરાયો છે, જેના કારણે આગ વધુ ભભૂકી હતી.

VSRના માલિકો સાથે સંબંધ: રોહિત પવારે આક્ષેપ કર્યો કે કેન્દ્રીય નાગરિક ઉડ્ડયન મંત્રી અને TDPના નેતાઓ VSR કંપનીના માલિકોના નજીકના મિત્રો છે, તેથી તપાસ દબાવવામાં આવી રહી છે.

સંજય રાઉતનો ટેકો

શિવસેના (UBT)ના નેતા સંજય રાઉતે પણ આક્ષેપ કર્યો છે કે મહારાષ્ટ્ર સરકાર DGCA અને VSR વેન્ચર્સને બચાવી રહી છે. તેમણે દાવો કર્યો કે મુંબઈ પોલીસ પર 'ઉપર' થી ફોન આવતા FIR નોંધવાની પ્રક્રિયા અટકાવી દેવામાં આવી છે.

28 જાન્યુઆરીના રોજ બારામતી પાસે થયેલા આ લિયરજેટ ૪૫ ક્રેશમાં અજીત પવાર સહિત 5 લોકોના મોત થયા હતા. હવે પવાર પરિવારના જ સભ્યો દ્વારા આ મામલે FIRની માંગણી કરવામાં આવતા મહારાષ્ટ્રના રાજકારણમાં નવો વળાંક આવ્યો છે.