એન્ફોર્સમેન્ટ ડિરેક્ટોરેટ (ED)એ અમદાવાદમાં મોટી કાર્યવાહી કરીને જાણીતા અનસ ગ્રુપ અને તેના ભાગીદારો સાથે સંકળાયેલા કુલ 9 સ્થળો પર એકસાથે દરોડા પાડ્યા છે. આ કાર્યવાહી વિદેશી હૂંડિયામણના વ્યવહાર (FEMA) અને મની લોન્ડરિંગ સંબંધિત કાયદા હેઠળ કરવામાં આવી છે. દરોડા દરમિયાન EDને મોટા પ્રમાણમાં રોકડ, વિદેશી ચલણી નોટો, સોનું અને ચાંદી જપ્ત કરવામાં આવી છે.
પ્રાપ્ત વિગતો અનુસાર, EDએ નીચે મુજબના મુદ્દામાલ જપ્ત કર્યા છે:
<ul dir="auto">
<li>રોકડ: કુલ ₹1.01 કરોડની ભારતીય ચલણી નોટો</li>
<li>વિદેશી ચલણ: ₹33.34 લાખની કિંમતની વિદેશી કરન્સી</li>
<li>સોનું: 1.6 કિલો વજન ધરાવતા વિદેશી માર્કિંગવાળા 16 સોનાના બાર (કિંમત આશરે ₹2.5 કરોડ)</li>
<li>ચાંદી: 80 કિલો વજન ધરાવતા 168 ચાંદીના બાર (કિંમત આશરે ₹2 કરોડ)</li>
</ul>
આ ઉપરાંત EDને અનેક ગુનાહિત દસ્તાવેજો, ડિજિટલ પુરાવા અને બેનામી સંપત્તિના રેકોર્ડ મળ્યા છે. તપાસમાં સામે આવ્યું છે કે અનસ ગ્રુપ મુખ્યત્વે તમાકુ ઉત્પાદન અને પેકેજિંગના વ્યવસાય સાથે સંકળાયેલું છે. આ ગ્રુપ દ્વારા એમ્બર ટોબેકો, ઉમદા ટોબેકો અને સમા ફિલ્ટર ખૈની જેવી જાણીતી બ્રાન્ડ હેઠળ ઉત્પાદન અને વેચાણ કરવામાં આવે છે. તપાસમાં શંકા વ્યક્ત થઈ રહી છે કે આ વ્યવસાયોના માધ્યમથી મોટા પાયે નાણાકીય ગેરરીતિઓ અને હવાલા મારફતે વિદેશમાં રોકાણ કરવામાં આવ્યું હોઈ શકે છે.
સૌથી ચોંકાવનારી વાત એ છે કે અનસ ગ્રુપના ભાગીદારો અને તેમના પરિવારના સભ્યોના નામે દુબઈમાં પણ મિલકતો હોવાના પુરાવા મળ્યા છે. EDની ટીમને દરોડા દરમિયાન અનેક ગુનાહિત દસ્તાવેજો અને ડિજિટલ પુરાવા હાથ લાગ્યા છે. હાલમાં આ તમામ મુદ્દામાલ અને દસ્તાવેજોની ઝીણવટભરી તપાસ શરૂ કરવામાં આવી છે. આગામી દિવસોમાં ગ્રુપના સભ્યોની પૂછપરછમાં વધુ મોટા ખુલાસા થવાની શક્યતા છે.
આ કાર્યવાહીએ અમદાવાદના વેપારી વર્ગ અને ખાસ કરીને તમાકુ ઉદ્યોગમાં ભ્રષ્ટાચાર અને ગેરરીતિઓના મુદ્દાને ફરી ઉજાગર કર્યો છે. EDએ આ મામલે FEMA (વિદેશી વિનિમય વ્યવસ્થાપન અધિનિયમ) હેઠળ કડક તપાસ શરૂ કરી છે અને આગળના તબક્કામાં વધુ ધરપકડ અને જપ્તીની શક્યતા વ્યક્ત કરી છે. તપાસ ચાલુ છે અને વધુ વિગતો સામે આવવાની રાહ જોવાઈ રહી છે. આ કેસ ગુજરાતમાં ભ્રષ્ટાચાર વિરોધી કાર્યવાહીનું એક મહત્વનું પગલું ગણાઈ રહ્યું છે.

EDની મોટી કાર્યવાહી

અનસ ગ્રુપના 9 સ્થળો પર રેડ કરી, 1.01 કરોડ રોકડ, 33.34 લાખ વિદેશી ચલણી નોટો

February 26, 2026 | 13:30 IST