52 વર્ષ બાદ નાસા ફરી ચંદ્રની ધરતી પર માનવી મોકલશે

માનવજાત ફરી એકવાર ચંદ્રના રહસ્યો ઉકેલવા તૈયાર છે. નાસાએ સત્તાવાર રીતે જાહેરાત કરી છે કે તેઓ આગામી 6 માર્ચ, 2026ના રોજ તેમનું બહુપ્રતિક્ષિત 'આર્ટિમિસ II' (Artemis II) મિશન લોન્ચ કરવાનું લક્ષ્ય રાખી રહ્યા છે. વર્ષ 1972માં એપોલો 17 મિશન બાદ આ પ્રથમ વખત હશે જ્યારે મનુષ્ય પૃથ્વીની ભ્રમણકક્ષા છોડીને ચંદ્ર સુધી જશે.

મિશનની મુખ્ય વિગતો:

• લોન્ચિંગ વિન્ડો: 6 માર્ચ (સૌથી વહેલી તક)

• મિશનનો સમયગાળો: 10 દિવસની સફર

• રોકેટ અને સ્પેસક્રાફ્ટ: 98 મીટર લાંબુ 'સ્પેસ લોન્ચ સિસ્ટમ' (SLS) રોકેટ અને 'ઓરિઅન' (Orion) કેપ્સ્યુલ.

• ક્રૂ મેમ્બર્સ: ત્રણ અમેરિકન (રીડ વાઈઝમેન, વિક્ટર ગ્લોવર, ક્રિસ્ટીના કોચ) અને એક કેનેડિયન (જેરેમી હેન્સન).

મિશન પ્લાન શું?

આર્ટિમિસ II મિશનમાં અવકાશયાત્રીઓ ચંદ્રની સપાટી પર ઉતરશે નહીં, પરંતુ તેઓ ચંદ્રની ફરતે ભ્રમણ કરીને પાછા આવશે.

1. લોન્ચિંગ બાદ 1 દિવસ પૃથ્વીની ભ્રમણકક્ષામાં રહેશે.

2. ચંદ્ર સુધી પહોંચતા 4 દિવસ લાગશે.

3. ચંદ્રની સપાટીથી 6,500 થી 9,500 કિમી ઉપર ઉડાન ભરીને 'ફાર સાઈડ' (ચંદ્રનો ન દેખાતો ભાગ) ની મુલાકાત લેશે.

4. ત્યારબાદ 4 દિવસની પરત મુસાફરી અને અંતે પેસિફિક મહાસાગરમાં સ્પ્લેશડાઉન (લેન્ડિંગ) થશે.

સફળ 'વેટ ડ્રેસ રિહર્સલ' બાદ લીલી ઝંડી

ફેબ્રુઆરીમાં લિક્વિડ હાઇડ્રોજન લીકના કારણે એક પ્રયાસ અટકાવવો પડ્યો હતો. જોકે, તાજેતરમાં ફ્લોરિડાના કેનેડી સ્પેસ સેન્ટર ખાતે કરવામાં આવેલ 'વેટ ડ્રેસ રિહર્સલ' સફળ રહ્યું છે.

એન્જિનિયરોએ રોકેટમાં બળતણ ભરીને સંપૂર્ણ કાઉન્ટડાઉન ટેસ્ટ સફળતાપૂર્વક પૂર્ણ કર્યો છે, જેના કારણે લોન્ચિંગનો માર્ગ મોકળો થયો છે.

ચંદ્ર પર જવાની વૈશ્વિક સ્પર્ધા

આર્ટિમિસ IIની સફળતા બાદ 'આર્ટિમિસ III' મિશન દ્વારા નાસા 2028 સુધીમાં ચંદ્રના દક્ષિણ ધ્રુવ પર માનવ ઉતારવાનું લક્ષ્ય રાખે છે. આ માટે ઈલોન મસ્કની 'સ્પેસએક્સ' (SpaceX) લુનર લેન્ડર બનાવી રહી છે.

બીજી તરફ, ચીન પણ 2030 સુધીમાં ચંદ્ર પર પહોંચવાની તૈયારી કરી રહ્યું છે. ચંદ્રના દક્ષિણ ધ્રુવ પર બરફ સ્વરૂપે પાણી હોવાની સંભાવના હોવાથી બંને દેશો ત્યાં પહોંચવા આતુર છે.