આગ્રામાં દબંગોનો ત્રાસ 40 પરિવારો પલાયન કરવા મજબૂર

ઉત્તર પ્રદેશના આગ્રામાં કમલાનગર પોલીસ સ્ટેશન હેઠળ આવતા ભગવાનનગર વિસ્તારમાં દબંગોના આતંકને કારણે ગંભીર પરિસ્થિતિ સર્જાઈ છે. સ્થાનિક રહીશો એટલી હદે ડરી ગયા છે કે તેઓએ પોતાના ઘર છોડવાનો નિર્ણય લીધો છે. વિસ્તારના 40 થી વધુ મકાનો પર 'આ મકાન વેચવાનું છે' તેવા પોસ્ટરો લાગતા સમગ્ર શહેરમાં ચકચાર મચી ગઈ છે.

સ્થાનિક યુવકોના આતંકથી રહીશો ત્રાહિમામ : 

સ્થાનિક લોકોનો આરોપ છે કે વિસ્તારમાં રહેતા કેટલાક દબંગ યુવકો અવારનવાર રહેવાસીઓ સાથે મારપીટ અને ગાળાગાળી કરે છે. ખાસ કરીને શહેઝાદ અને તેનો પુત્ર સની નામનો યુવક સોસાયટીમાં ભયનો માહોલ ઉભો કરી રહ્યો છે. રહીશોના જણાવ્યા અનુસાર, ગત 2 ફેબ્રુઆરીના રોજ એક પરિવારમાં લગ્ન પ્રસંગ દરમિયાન પણ આરોપીઓએ ઘરમાં ઘૂસીને તોફાન કર્યું હતું અને મહિલાઓ સાથે અભદ્ર વર્તન કરી સોનાની ચેઈન તોડવાનો પ્રયાસ કર્યો હતો.

પોલીસની નિષ્ક્રિયતા સામે રોષ : 

પીડિત પરિવારોનું કહેવું છે કે આ અંગે અગાઉ પણ અનેક વખત પોલીસમાં રજૂઆત કરવામાં આવી છે, પરંતુ આરોપીઓ વિરુદ્ધ કોઈ નક્કર કાર્યવાહી કરવામાં આવતી નથી. સ્થાનિક કોર્પોરેટર હરિઓમ ગોયલે પણ આ બાબતની પુષ્ટિ કરતા જણાવ્યું છે કે આરોપીઓ એટલા બેફામ છે કે તેઓ લોકપ્રતિનિધિઓ પર પણ હુમલો કરતા અચકાતા નથી. પોલીસની ઢીલી નીતિને કારણે હવે લોકોએ કાયમી સમાધાન ન આવે ત્યાં સુધી પોસ્ટરો ન હટાવવાની જીદ પકડી છે.

સુરક્ષાને લઈને ઉઠ્યા સવાલો : 

આ ઘટનાને પગલે પોલીસ કાફલો ઘટનાસ્થળે પહોંચ્યો હતો અને લોકોને સમજાવવાનો પ્રયાસ કર્યો હતો. જોકે, સ્થાનિક લોકો હવે સુરક્ષાની ખાતરી ન મળે ત્યાં સુધી ત્યાં રહેવા તૈયાર નથી. લોકોનું કહેવું છે કે દરરોજની હેરાનગતિ અને જીવના જોખમે રહેવા કરતા ઘર વેચીને અન્યત્ર સ્થળાંતર કરવું વધુ સુરક્ષિત છે.