પારસ દેસાઈ FAITTAના નવા ચેરમેન તરીકે ચૂંટાયા

વાઘ બકરી ટી ગ્રુપના એક્ઝિક્યુટિવ ડાયરેક્ટર પારસ દેસાઈની ભારતના ચાના વેપારીઓના સર્વોચ્ચ રાષ્ટ્રીય સંગઠન, FAITTAના નવા ચેરમેન તરીકે સર્વાનુમતે વરણી કરવામાં આવી છે. આ સંગઠન સરકાર, ચા બોર્ડ અને અન્ય સંબંધિત સંસ્થાઓ સાથે મળીને ચાના ખરીદદારો અને વેપારીઓના હિતોનું રક્ષણ કરવા માટે કાર્ય કરે છે. આ સાથે જ, વાઘ બકરી ટી ગ્રુપના ડિરેક્ટર વિદિશા દેસાઈનો પણ FAITTAની એક્ઝિક્યુટિવ કમિટીમાં સમાવેશ કરવામાં આવ્યો છે.

24 રાજ્યો અને 60થી વધુ દેશોમાં નિકાસ

પારસ દેસાઈ વાઘ બકરી ચા પરિવારની ચોથી પેઢીના ઉદ્યોગસાહસિક છે અને 1993થી આ ગ્રુપ સાથે જોડાયેલા છે. તેમના નેતૃત્વ હેઠળ, વાઘ બકરી ગ્રુપ ભારતના સૌથી મોટા પેકેજ્ડ ચાના વ્યવસાયોમાંથી એક બન્યું છે, જે 24 રાજ્યોમાં હાજરી ધરાવે છે અને 60થી વધુ દેશોમાં ચાની નિકાસ કરે છે. તેમણે વાઘ બકરીમાં NABL-માન્યતા પ્રાપ્ત ઈન-હાઉસ ટેસ્ટિંગ લેબોરેટરીની સ્થાપના કરવામાં, ઈન્સ્ટન્ટ ટી પ્રીમિક્સ, વેલનેસ બ્લેન્ડ્સ અને વાઘ બકરી ટી લાઉન્જ જેવી નવીનતાઓ લાવવામાં મહત્ત્વપૂર્ણ ભૂમિકા ભજવી છે. તેઓ વેસ્ટર્ન ઈન્ડિયા ટી ડીલર્સ એસોસિએશનના પ્રમુખ તરીકે પણ સેવા આપે છે.

આ પણ વાંચો: શું ખાલી પેટે ગરમ ચા કે કોફી પીવાથી કેન્સર થાય છે?

ગ્રાહકોની બદલાતી રુચિઓ અને ક્લાઈમેટ ચેન્જ

પોતાની વરણી પર ટિપ્પણી કરતાં દેસાઈએ જણાવ્યું કે, 'FAITTAનું નેતૃત્વ કરવું મારા માટે ગૌરવની વાત છે. હું મારા પર વિશ્વાસ રાખવા બદલ તમામ સભ્યોનો આભાર માનું છું. ચા ઉદ્યોગ આજે ગ્રાહકોની બદલાતી રુચિઓ અને ક્લાઈમેટ ચેન્જ જેવા પડકારોને કારણે નોંધપાત્ર પરિવર્તનમાંથી પસાર થઈ રહ્યો છે. મારું મુખ્ય ધ્યાન ઉદ્યોગના સભ્યો, સરકાર અને નિયમનકારો સાથે મળીને ચા ઉદ્યોગને વધુ મજબૂત બનાવવા પર રહેશે. હું તમામ હિતધારકો સાથે મળીને ભવિષ્યની તકો અને પડકારોનો સામનો કરવા માટે ઉત્સુક છું.'

3 દાયકાથી વધુનો ચા ટેસ્ટિંગનો અનુભવ

પારસ દેસાઈએ USની ઓહિયો સ્ટેટ યુનિવર્સિટીમાંથી મેનેજમેન્ટ સ્ટડીઝનો ડિપ્લોમા મેળવ્યો છે અને તેમને 3 દાયકાથી વધુનો ચા ટેસ્ટિંગનો અનુભવ છે. તેઓ ખાસ કરીને મહિલા સશક્તિકરણ, શિક્ષણ અને પુનર્વસન ક્ષેત્રે કોર્પોરેટ સોશિયલ રિસ્પોન્સિબિલિટી (CSR) પહેલોને સક્રિયપણે ટેકો આપે છે.

FSSAIના નિયમોનું પાલન સુનિશ્ચિત કરવું

2014માં સ્થપાયેલી FAITTA હરાજી, જથ્થાબંધ અને છૂટક વેપાર, પેકેજિંગ, વેરહાઉસિંગ અને નિકાસ સંબંધિત મુદ્દાઓને સંબોધવા માટે સમગ્ર ભારતના ચા વેપારી સંગઠનોને એક મંચ પર લાવે છે. આ સંગઠન ખાદ્ય સુરક્ષાના ધોરણો, ખાસ કરીને FSSAIના નિયમોનું પાલન સુનિશ્ચિત કરવા અને હરાજીની પ્રક્રિયાઓમાં પારદર્શિતાને પ્રોત્સાહન આપવા માટે પણ કામ કરે છે.