કૃષિ યુનિવર્સિટીઓના VCનાં ભથ્થાં કૌભાંડનો પર્દાફાશ

આણંદ કૃષિ યુનિવર્સિટીના વર્તમાન કુલપતિને પેન્શન મળતું હોવા છતાં પગાર ઉપરાંત અન્ય ભથ્થાં મેળવી લેવાનું કૌભાંડ બહાર આવ્યું છે. આ મામલે રાજ્યના કૃષિ વિભાગને રજૂઆત કરવામાં આવી હતી. જેના કારણે આણંદ, દાંતીવાડા, નવસારી અને જૂનાગઢ કૃષિ યુનિવર્સિટીઓના કુલપતિઓ ભેખડે ભરાયા છે. મળવાપાત્ર ન હોવા છતાં પોતાના ખિસ્સામાં સેરવી લીધેલી મસમોટી રકમ વસૂલવાનો કૃષિ, ખેડૂત કલ્યાણ અને સહકાર વિભાગે આદેશ કરતાં ખળભળાટ મચી ગયો છે.

આણંદ કૃષિ યુનિવર્સિટીના કુલપતિ ડો. કે.બી.કથીરિયા પાસેથી ઓગષ્ટ મહિનાના પગારમાંથી વસૂલાત કરવામાં આવી છે. જેમાં તેઓને અગાઉ મળતાં રૂપિયા 2.10 લાખ પગારમાંથી 1 લાખ પગાર ઓછો ચુકવી પગારમાંથી વસૂલાત શરૂ કરવામાં આવી છે. કૃષિ વિભાગના આદેશના પગલે હવે તેઓને માત્ર 1.10 લાખ પગાર દર મહિને ચુકવવામાં આવી રહ્યો છે. રાજ્ય સરકારના કૃષિ વિભાગને જાણ કરાતાં કુલપતિઓ સામે વસૂલાતનો આદેશ કરાયો છે. કૃષિ વિભાગના લેખિત આદેશના કારણે કુલપતિઓ કસૂરવાર ઠર્યા હોવાનું પ્રત્યક્ષ કે પરોક્ષ રીતે પુરવાર થયું હોવાનું બહાર આવ્યુ છે.

રાજ્યની કૃષિ યુનિવર્સિટીમાં મોભાદાર કુલપતિના પદ માટે દિલ્હી સુધી શિક્ષણવિદો લોંમ્બિંગ કરીને યેનકેન પ્રકારે રાજકીય આકાઓની મહેરબાનીથી ખુરશી પર ચીપકી જાય છે. યુનિવર્સિટીમાં નિમણૂક પામ્યા બાદ કુલપતિ પોતાની મનમાની કરી મનસ્વીપણે યુનિવર્સિટીનો વહીવટ કરતા હોવાની વ્યાપક ફરિયાદો ઉઠી રહી છે. આણંદ, દાંતીવાડા, નવસારી અને જૂનાગઢ કૃષિ યુનિવર્સિટીના કુલપતિઓને ફિક્સ પગાર અને માત્ર 5 હજાર સુધીનું સ્પેશિયલ એલાઉન્સ મળવાપાત્ર છે.

પરંતુ સત્તાના નશામાં સરકારી નાણાં ઉલેચી લેવા માટે ફિક્સ પગાર ઉપરાંત મોંઘવારી ભથ્થું, મેડિકલ ભથ્થું લઈ રહ્યા છે. જે તેઓને મળવાપાત્ર નથી. તેમ છતાં દર મહિને લઈને કુલપતિઓએ પોતાના ખિસ્સા ભર્યા છે. કુલપતિઓએ લીધેલી રકમ નિમણૂકથી લઈને અત્યાર સુધી રકમ વસૂલાત કરવા હુકમ કરાયો છે. જેને લઇને રાજ્યની ચારેય યુનિવર્સિટીના કુલપતિઓ શંકાના દાયરામાં આવ્યા છે.

કૃષિ, ખેડૂત કલ્યાણ અને સહકાર વિભાગ દ્વારા કરાયેલા વસૂલાતના આદેશને લઈ આણંદ કૃષિ યુનિવર્સિટીના વર્તમાન કુલપતિના ઓગષ્ટ મહિનાથી ચૂકવાતા પગારમાંથી દર મહિને 1 લાખ રૂપિયાની વસુલાત શરૂ કરવામાં આવી છે. તેઓના માર્ચ સુધીના કાર્યકાળ દરમિયાન તેઓએ મેળવી લીધેલી વધારાની રકમને દર મહિને પગારમાંથી કાપીને સરકારી તિજોરીમાં જમા કરવામાં આવનાર છે.

એકસાથે રકમની વસૂલાતની માંગ

ગુજરાત કોંગ્રેસના પ્રવક્તા મનહર પટેલે બેનિફિટ ન્યૂઝને જણાવ્યું કે, કૃષિ, ખેડૂત કલ્યાણ અને સહકાર વિભાગે કૃષિ યુનિવર્સિટીઓના કુલપતિઓને મળવાપાત્ર ન હોવા છતાં ફિક્સ પગાર ઉપરાંત દર મહિને મોંઘવારી ભથ્થાના નામે 1 લાખ ઉપરાંતની રકમ મેળવી લીધી છે. આ બાબત અમારા ધ્યાને આવતાં અમે કરેલી લેખિત રજૂઆતના કારણે કૃષિ વિભાગે રિકવરીનો આદેશ કર્યો છે.

આદેશના કારણે આણંદ કૃષિ યુનિવર્સિટીના કુલપતિને દર મહિને ચૂકવાતા પગારમાંથી વસૂલાત શરૂ કરાઈ છે. જો કે, તેઓનો કાર્યકાળ 3 માર્ચ, 2026 ના રોજ પૂર્ણ થવાનો હોય ત્યાં સુધીમાં અંદાજે 7 લાખ રૂપિયાની રીકવરી થઇ શકે તેમ છે. જ્યારે બાકીની રકમની વસૂલાત અધ્ધરતાલ રહેવાની શક્યતા છે. તેથી એકસાથે રકમની વસૂલાત કરીને હાલમાં મળતું પેન્શન પણ અટકાવવું જોઈએ.