Vadodara :વાઘોડિયાનો ગોઝારો અકસ્માત, કાર ચાલકની બેદરકારી, માસૂમ બાળકીનું કરુણ મોત

વડોદરા જિલ્લાના વાઘોડિયામાં ફરી એકવાર બેફામ ડ્રાઇવિંગનો ભોગ એક માસૂમ બાળકી બની છે. ઘર આંગણે રમી રહેલી માત્ર બે વર્ષની બાળકીને કાર ચાલકે અડફેટે લઈને કચડી નાખતા કરુણ મોત નીપજ્યું છે. આ ગોઝારો અકસ્માત સર્જી કાર ચાલક ઘટના સ્થળે કાર મૂકી ફરાર થઈ ગયો હતો, જેને પગલે રોષે ભરાયેલા લોકોએ કારમાં તોડફોડ કરી હતી. આ હૃદયદ્રાવક ઘટનાએ સમગ્ર વિસ્તારમાં શોક અને આક્રોશની લાગણી ફેલાવી દીધી છે.

શું હતી ઘટના?

પ્રાપ્ત માહિતી અનુસાર, વાઘોડિયાના જરોદ પોલીસ સ્ટેશન વિસ્તારમાં આવેલા એક ગામમાં બે વર્ષની માસૂમ બાળકી પોતાના ઘર આંગણે રમી રહી હતી. તે સમયે બેફામ ગતિએ આવતી એક કારના ચાલકે બાળકીને અડફેટે લીધી હતી. કારના ટાયર નીચે કચડાઈ જતાં બાળકીનું ઘટના સ્થળે જ કમકમાટીભર્યું મોત નીપજ્યું હતું. આ અકસ્માત એટલો ભયાવહ હતો કે બાળકીના માતા-પિતા અને સ્થાનિક લોકો સ્તબ્ધ થઈ ગયા હતા.

કાર ચાલક ફરાર, લોકોમાં રોષ...

અકસ્માત સર્જીને કાર ચાલક પોતાની કાર ઘટના સ્થળે જ છોડીને ફરાર થઈ ગયો હતો. આ ઘટનાને પગલે લોકોના ટોળા ઉમટી પડ્યા હતા અને કાળમુખા કાર ચાલક પ્રત્યે ભારે રોષ વ્યક્ત કર્યો હતો. રોષે ભરાયેલા લોકોએ કારના કાચની તોડફોડ કરી પોતાનો આક્રોશ ઠાલવ્યો હતો. મૃતક બાળકીના પિતા પિયુષ પરમારે જણાવ્યું હતું કે તેમની પુત્રી નિર્દોષ હતી અને કાર ચાલકની બેદરકારીને કારણે તેમનું ઘર ઉજ્જડ બન્યું છે.

પોલીસની કાર્યવાહી...

ઘટનાની જાણ થતાં જ જરોદ પોલીસ ઘટના સ્થળે પહોંચી હતી. પોલીસે બાળકીના મૃતદેહનો કબજો લઈ પોસ્ટમોર્ટમ અર્થે વડોદરાની સયાજી હોસ્પિટલ ખાતે ખસેડ્યો હતો. ફરાર કાર ચાલક વિરુદ્ધ ગુનો નોંધી, પોલીસે તેને ઝડપી પાડવા માટે જુદી જુદી દિશાઓમાં તપાસના ચક્રો ગતિમાન કર્યા છે. પોલીસે CCTV ફૂટેજ અને અન્ય પુરાવાઓના આધારે કાર ચાલકને શોધી કાઢવાની કવાયત હાથ ધરી છે.

અવારનવાર બનતા અકસ્માતો...

વડોદરા સહિત રાજ્યભરમાં બેફામ ડ્રાઇવિંગને કારણે અકસ્માતોનું પ્રમાણ ચિંતાજનક રીતે વધી રહ્યું છે. વાહન ચાલકો ટ્રાફિકના નિયમોની ઐસીતૈસી કરીને નિર્દોષ લોકોના જીવ લઈ રહ્યા છે. આવી ઘટનાઓ વારંવાર બનતી હોવા છતાં, કડક કાર્યવાહીના અભાવે કે બેદરકારીને કારણે આવા તત્વોને જાણે કોઈ ડર જ નથી. આ ઘટના ફરી એકવાર વાહન ચાલકોમાં સંયમ અને ટ્રાફિક નિયમોના પાલનની આવશ્યકતા પર ભાર મૂકે છે.