વડોદરા નજીક બસ-ટ્રક વચ્ચે ગોઝારો અકસ્માત

Vadodara Bus Accident: વડોદરા શહેરના કોટંબી સ્ટેડિયમ નજીક આજે (17 જૂન, 2026) વહેલી સવારે એક અત્યંત હૃદયદ્રાવક અને ભયાનક માર્ગ અકસ્માત સર્જાયો હતો. રાજસ્થાનથી સુરત જઈ રહેલી એક ખાનગી લક્ઝરી બસ રોડ પર ઊભેલી ટ્રકની પાછળ ધડાકાભેર અથડાતાં ચીસાચીસ મચી ગઈ હતી. આ ગોઝારી દુર્ઘટનામાં એક 9 વર્ષના નિર્દોષ બાળક સહિત કુલ 6 લોકોના દર્દનાક મોત નીપજ્યા છે, જ્યારે 31 જેટલા મુસાફરો ગંભીર રીતે ઈજાગ્રસ્ત થયા છે. અકસ્માતની તીવ્રતા એટલી વધારે હતી કે બસના કુરચેકુરચા ઊડી ગયા હતા અને મુસાફરો અંદર ફસાઈ ગયા હતા. તમામ ઈજાગ્રસ્તોને તાત્કાલિક સારવાર માટે વડોદરાની એસ.એસ.જી. (SSG) હોસ્પિટલમાં ખસેડવામાં આવ્યા છે.

પરોઢિયે સર્જાયો કાળમુખો અકસ્માત
મળતી માહિતી મુજબ, બાલાજી ટ્રાવેલ્સની આ લક્ઝરી બસ રાજસ્થાનના બાસવાડાથી શ્રમિકો અને મુસાફરોને લઈને સુરત તરફ જઈ રહી હતી. વહેલી સવારે આશરે 3:30 થી 4:00 વાગ્યાની વચ્ચે જ્યારે બસ વડોદરા-હાલોલ રોડ પર આવેલા કોટંબી સ્ટેડિયમ પાસેથી પસાર થઈ રહી હતી, ત્યારે ચાલકે સ્ટીયરિંગ પરથી કાબૂ ગુમાવ્યો અને બસ રોડ કિનારે ઊભેલી ટ્રકમાં પાછળથી જોરદાર રીતે ઘૂસી ગઈ હતી. અકસ્માતના જોરદાર અવાજને પગલે સ્થાનિક ગ્રામજનો અને અન્ય વાહનચાલકો તાત્કાલિક બચાવ કામગીરી માટે દોડી આવ્યા હતા. આ અકસ્માતને કારણે હાઈવે પર 4 થી 5 કિલોમીટર લાંબો ટ્રાફિક જામ સર્જાયો હતો.

 

#વડોદરા

વહેલી સવારે કોટંબી પાસે ઉભેલી ટ્રક પાછળ લક્ઝરી બસ ધડાકાભેર અથડાઈ
આ બસ રાજસ્થાનના બાંસવાડાથી સુરત જઈ રહી હતી
અકસ્માતમાં 1 બાળક સહિત 6 ના મોત, 31 જેટલા મુસાફરો ઈજાગ્રસ્ત
NDRF, SDRF અને પોલીસે બસમાં ફસાયેલા લોકોને બહાર કાઢ્યા
તમામ ઈજાગ્રસ્તો વડોદરાની SSG હોસ્પિટલમાં દાખલ… pic.twitter.com/WbMHwLazZe

— Benefit News 24 (@BenefitNews24) June 17, 2026

 

NDRF, SDRF અને ફાયર વિભાગનું મેગા રેસ્ક્યૂ ઓપરેશન
ઘટનાની ગંભીરતાને જોતાં વડોદરા ફાયર બ્રિગેડની પાણીગેટ અને ઈમરજન્સી રિસ્પોન્સ સેન્ટરની ટીમો સહિત NDRF અને SDRFની ટુકડીઓ યુદ્ધના ધોરણે ઘટનાસ્થળે પહોંચી ગઈ હતી. NDRFની છઠ્ઠી બટાલિયનના કમાન્ડન્ટ સુરેન્દ્રસિંહે જણાવ્યું હતું કે, વહેલી સવારે 4:40 વાગ્યે કંટ્રોલ રૂમ દ્વારા માહિતી મળતાં જ તેમની ટીમો આધુનિક કટિંગ ટૂલ્સ સાથે રવાના થઈ હતી. બસ અને ટ્રક એકબીજામાં એટલી ખરાબ રીતે ફસાઈ ગયા હતા કે જેસીબી (JCB) મશીનની મદદથી બંને વાહનોને અલગ કરવા પડ્યા હતા. ત્યારબાદ બસના પતરા કાપીને ફસાયેલા મુસાફરોને બહાર કાઢવામાં આવ્યા હતા. આ સંયુક્ત ઓપરેશન દ્વારા 24 લોકોને સુરક્ષિત બચાવી લેવાયા હતા અને હાઈવે ક્લિયર કરવામાં આવ્યો હતો.

હોસ્પિટલમાં ઈમરજન્સી એલર્ટ: તબીબો એલર્ટ મોડ પર
વડોદરાના ડેપ્યુટી મેયર આદિત્ય પટેલ અને મેયર ગીતાબેન મકવાણા તાત્કાલિક એસ.એસ.જી. હોસ્પિટલના ટ્રોમા સેન્ટર ખાતે પહોંચ્યા હતા અને સારવારની સમીક્ષા કરી હતી. ડેપ્યુટી મેયરે જણાવ્યું કે હોસ્પિટલ લાવવામાં આવ્યા ત્યારે 3 લોકોના મોત નીપજ્યા હતા અને સારવાર દરમિયાન કુલ મૃત્યુઆંક 6 થયો છે. હાલમાં 26 થી વધુ ગંભીર ઈજાગ્રસ્તોની ટ્રોમા સેન્ટરમાં સઘન સારવાર ચાલી રહી છે, જેમાંથી 5 દર્દીઓની હાલત અત્યંત નાજુક હોવાથી તેમને આઈસીયુ (ICU) માં શિફ્ટ કરવામાં આવી રહ્યા છે. હોસ્પિટલના સુપરિન્ટેન્ડન્ટ અને મુખ્ય ડોક્ટરો સાથે વાત કરીને દવાનો પૂરતો જથ્થો, સર્જિકલ સાધનો અને બ્લડ બેંકમાં લોહીની પૂરતી ઉપલબ્ધતા સુનિશ્ચિત કરવામાં આવી છે.

'અકસ્માત થયો ત્યારે જાણે કરંટ લાગ્યો'
આ અકસ્માતમાં આબાદ બચેલા અને ઈજા પામેલા રાજસ્થાનના પ્રવાસીએ હોસ્પિટલના બિછાનેથી પોતાની આપવીતી જણાવતાં કહ્યું કે, તે પોતાના સાથી મિત્રો સાથે રોજગાર અર્થે સુરત જઈ રહ્યો હતો. વહેલી સવારે જ્યારે બસમાં મોટાભાગના મુસાફરો ગાઢ નિદ્રામાં હતા, ત્યારે અચાનક એક પ્રચંડ ધડાકો થયો હતો. જ્યારે અકસ્માત થયો ત્યારે એક ક્ષણ માટે એવું લાગ્યું કે જાણે આખી બસમાં જોરદાર કરંટ લાગ્યો હોય. પોલીસ હાલમાં ગુનો નોંધીને અકસ્માતના ચોક્કસ કારણોની તપાસ કરી રહી છે.