ઉત્તરાયણના તહેવારને હવે ગણતરીના કલાકો જ બાકી છે ત્યારે પતંગ રસિકોમાં પવનની ગતિને લઈને ભારે ઉત્સુકતા જોવા મળી રહી છે. ગુજરાતના જાણીતા હવામાનશાસ્ત્રી પરેશ ગોસ્વામીએ આ વર્ષે ઉત્તરાયણ પર પવનની આગાહી કરતા જણાવ્યું છે કે, પતંગબાજો માટે વાતાવરણ એકંદરે સાનુકૂળ રહેશે. જોકે, ગત વર્ષની સરખામણીએ આ વર્ષે પવનની ગતિમાં થોડો ઘટાડો જોવા મળી શકે છે, પરંતુ દિવસભર આકાશ ખુલ્લું રહેવાની શક્યતા હોવાથી તહેવારનો આનંદ બમણો થઈ જશે.
સવારથી જ આકાશ પતંગોથી છવાઈ જશે
ઉત્તરાયણની વહેલી સવારે ગુજરાતના શહેરી અને ગ્રામ્ય વિસ્તારોમાં ધુમ્મસભર્યું વાતાવરણ જોવા મળી શકે છે. સવારના સમયે હવામાં થોડી ઝાકળ પણ અનુભવાશે, પરંતુ જેવો દિવસ ચઢશે તેમ વાતાવરણ એકદમ ખુલ્લું થઈ જશે. મોસમ પતંગબાજી માટે સંપૂર્ણપણે અનુકૂળ રહેવાની ધારણા છે, જેના કારણે સવારથી જ આકાશ રંગબેરંગી પતંગોથી છવાઈ જશે.
આ પણ વાંચો: <a href="https://www.benefitnews24.com/gujarati/gujarat/what-kind-of-thread-can-be-used-to-fly-a-kite-in-uttarayan-/24672" target="_blank" rel="noopener">ઉત્તરાયણમાં કેવા દોરાથી પતંગ ચગાવી શકાશે?</a>
10થી 11 કિમી પ્રતિ કલાકે પવન ફૂંકાશે
પવનની આગાહી મુજબ ગુજરાતના અલગ-અલગ વિસ્તારોમાં પવનની ગતિમાં થોડો તફાવત જોવા મળશે. ઉત્તર ગુજરાતમાં પવન 10 થી 12 કિમી પ્રતિ કલાકની ઝડપે ફૂંકાશે, જ્યારે સૌરાષ્ટ્રના વિસ્તારોમાં પવનની ગતિ થોડી વધુ એટલે કે 12થી 14 કિમી પ્રતિ કલાક રહેવાની શક્યતા છે. દક્ષિણ ગુજરાતમાં 13થી 14 કિમી પ્રતિ કલાક અને મધ્ય ગુજરાતમાં 10થી 11 કિમી પ્રતિ કલાકની ઝડપે પવન ફૂંકાવાનું અનુમાન વ્યક્ત કરવામાં આવ્યું છે.
પવનની ગતિ ગત વર્ષની તુલનામાં થોડી ઓછી
આ વર્ષે પવનની ગતિ ગત વર્ષની તુલનામાં થોડી ઓછી રહી શકે છે. સામાન્ય રીતે 10થી 15 કિમીની ઝડપ પતંગ ઉડાડવા માટે મધ્યમ ગણાય છે, તેથી પતંગ રસિકોએ નિરાશ થવાની જરૂર નથી. સમગ્ર રાજ્યમાં પવનની આગાહી મુજબ પવનની દિશા અને ગતિ પતંગબાજોને સાથ આપશે, જેથી પેચ લડાવવાની મજા બકરાર રહેશે.

ઉત્તરાયણ પર પવનની ગતિ 7થી 14 કિમી પ્રતિ કલાક રહેશે અને વાતાવરણ પતંગબાજી માટે સાનુકૂળ રહેશે

January 13, 2026 | 15:18 IST