વડોદરા પાસે નર્મદા કેનાલમાં ડૂબી જતા 2 વિદ્યાર્થીના થયા કરૂણ મોત, ચંપલ લેવા જતાં ગુમાવ્યો જીવ

વડોદરા જિલ્લાના અંકોડીયા ગામ પાસે ગુરુવારે નર્મદા કેનાલમાં ચંપલ લાવવાનો પ્રયાસ કરનાર 2 મેડિકલ વિદ્યાર્થી ડૂબી જતાં દુઃખદ ઘટના સર્જાઈ હતી. બંને ગોત્રી મેડિકલ કોલેજમાં MBBSના ત્રીજા વર્ષમાં અભ્યાસ કરતા હતાં.

મૃતક વિદ્યાર્થીઓનો પરિચય

મૃતક વિદ્યાર્થીઓમાં સુરતના રહેવાસી આદિત્ય રામાકૃષ્ણન ઐયર (ઉ.વ. 21) અને જામનગરના પ્રેમ પ્રવિણભાઈ માતંગ (ઉ.વ. 21)નો સમાવેશ થાય છે. બંને ગોત્રી મેડિકલ કોલેજના વિદ્યાર્થી હતા.

મિત્રો સાથે ગયા હતા ફરવા

આદિત્ય અને પ્રેમ તેમના અન્ય 2 સહાધ્યાયી મિત્રો સંકેત નહટો અને અંશ પારગી સાથે નર્મદા કેનાલ પાસે ફરવા ગયા હતા. ત્યાં એક વિદ્યાર્થીનું ચંપલ કેનાલમાં પડી જતા તેને લાવવાનો પ્રયાસ કર્યો ત્યારે આ દુર્ઘટના સર્જાઈ હતી.

કેનાલમાં ડૂબી ગયા

ચંપલ લાવવા કેનાલમાં ઉતરતા આદિત્ય અને પ્રેમ પાણીના પ્રવાહમાં ફસાઈ ગયા. બહાર ઉભેલા મિત્રો ભયભીત બની બૂમાબૂમ કરતાં આસપાસના લોકો દોડી આવ્યા અને તાત્કાલિક ફાયર બ્રિગેડને જાણ કરાઈ.

મૃતદેહોની શોધખોળ અને કાર્યવાહી

ફાયર બ્રિગેડની ટીમ ઘટના સ્થળે પહોંચી અને ભારે શોધખોળ બાદ બંનેના મૃતદેહ કેનાલમાંથી બહાર કાઢવામાં આવ્યા. તાલુકા પોલીસ પણ સ્થળ પર પહોંચી હતી અને આગળની કાર્યવાહી હાથ ધરી હતી. બંનેના મૃતદેહો પોસ્ટમૉર્ટમ માટે સયાજી હોસ્પિટલ મોકલવામાં આવ્યા છે. હોસ્પિટલના સૂત્રોના જણાવ્યા પ્રમાણે, મૃતકોના પરિવારોને જાણ કરી દેવાઈ છે.