Surat માં હૃદયદ્રાવક ઘટના: રજા પર આવેલા આર્મી જવાનનું પાંચમા માળેથી પટકાતા કરુણ મોત!

સુરતમાં આજે એક હૃદય કંપાવી દેનારી ઘટના બની છે, જેણે સમગ્ર શહેરને શોકમાં ગરકાવ કરી દીધું છે. દેશની રક્ષા કરતા એક આર્મી જવાન, પ્રકાશ શામજીભાઈ ગોહિલ, રજા પર સુરત આવ્યા હતા અને 7 જૂને ફરજ પર પરત ફરવાના હતા, તે પહેલાં જ કાળ તેમને ભરખી ગયો. એપાર્ટમેન્ટના પાંચમા માળેથી પટકાતા તેમનું કમકમાટીભર્યું અવસાન થયું છે.

પ્રાથમિક માહિતી અનુસાર, આ દુર્ભાગ્યપૂર્ણ ઘટના ત્યારે બની જ્યારે લિફ્ટ બંધ હોવાથી પ્રકાશભાઈ દાદર ચડી રહ્યા હતા. પાંચમા માળે પહોંચતી વખતે, અચાનક તેમણે પેસેજમાં સંતુલન ગુમાવ્યું અને નીચે પટકાયા. આ કરુણ અકસ્માતમાં પ્રકાશભાઈનું ઘટના સ્થળે જ મોત નિપજ્યું હતું. તેમને તાત્કાલિક સ્મીમેર હોસ્પિટલ ખસેડવામાં આવ્યા હતા, જ્યાં ડોકટરોએ તેમને મૃત જાહેર કર્યા હતા.

આ ઘટનાથી પ્રકાશભાઈના પરિવારમાં શોકનું મોજું ફરી વળ્યું છે. તેમની બે દીકરીઓ સહિત સમગ્ર પરિવાર આ આઘાતથી ભાંગી પડ્યો છે. જે જવાન દેશની સેવા કરી રહ્યો હતો, તેનું આ રીતે અણધાર્યું અવસાન થતાં સમાજમાં પણ દુઃખ અને રોષની લાગણી પ્રવર્તી રહી છે.

આ પણ વાંચો : Vadodara માં નશાખોરો બેફામ, "મેં નશો કર્યો છે, તમારાથી થાય તે કરી લો"... Video

આ ઘટના એપાર્ટમેન્ટમાં સુરક્ષા વ્યવસ્થા અને જાળવણીના અભાવ પર ગંભીર પ્રશ્નાર્થ ઊભા કરે છે. લિફ્ટ બંધ હોય ત્યારે દાદરનો ઉપયોગ કેટલો સુરક્ષિત છે તે અંગે પણ સવાલો ઉઠી રહ્યા છે. આ ઘટના ફરી એકવાર યાદ અપાવે છે કે શહેરમાં ઇમારતોની સલામતી કેટલી મહત્વની છે અને તેમાં કોઈ પણ પ્રકારની બેદરકારી જીવલેણ સાબિત થઈ શકે છે. તંત્ર દ્વારા આવી ઘટનાઓનું પુનરાવર્તન ન થાય તે માટે તાત્કાલિક યોગ્ય પગલાં ભરવામાં આવે તે અનિવાર્ય છે.

આ પણ વાંચો : Surat ની પ્રજા ભયભીત, નશેડીઓનો આતંક, ક્યારે થશે કડક કાર્યવાહી?