અમદાવાદ ડિવિઝનના રેલવે સ્ટેશન પર QR કોડથી ટિકિટનું ભાડુ ચુકવી શકાશે

વર્તમાન સમયમાં મોટાભાગની દુકાનો પર વેપારીઓ QR કોડથી ઓનલાઈન પેમેન્ટ મેળવી રહ્યા છે. દેશના તમામ સ્ટ્રીટ વેન્ડર્સ પેમેન્ટની ચુકવણી કરવા QR કોડ ડિજિટલ માધ્યમનો ઉપયોગ કરી રહ્યા છે. ત્યારે અમદાવાદ ડિવિઝનના રેલવે સ્ટેશન પર QR કોડથી ટિકિટનું ભાડું સ્વીકારવાની સુવિધા શરૂ કરવામાં આવી છે. રેલવે બોર્ડની સૂચનાથી અમદાવાદ ડિવિઝનના તમામ કાઉન્ટરો ઉપર QR કોડ ડિવાઈસ લગાવી દેવામાં આવ્યા છે.    

રેલવેમાં મુસાફરી કરતા મુસાફરોને ટિકિટનું ભાડું ચૂકવવા QR કોડ ડિજિટલ માધ્યમની સુવિધા શરૂ કરાઈ છે. NPCI, MASTER CARD અને VISA દ્વારા વિકસિત કરાયેલી Bharat QR સિસ્ટમ મોબાઈલ માટે ચુકવણી સિસ્ટમ છે. આ સિસ્ટમ સપ્ટેમ્બર 2016માં લોન્ચ કરવામાં આવી હતી.

આ નવી પહેલ હેઠળ અમદાવાદ ડિવિઝનના અમદાવાદ, મણિનગર, અસારવા, સાબરમતી અને સરદાર ગ્રામ સ્ટેશનના તમામ આરક્ષિત અને અનરિઝર્વ્ડ ટિકિટ કાઉન્ટર પર રેલવે ટિકિટ માટે પેમેન્ટ સ્વીકારવાની સુવિધા શરૂ કરવામાં આવી છે. ડિવિઝનના અન્ય સ્ટેશનો પર બિનઆરક્ષિત અને આરક્ષિત કાઉન્ટરો QR કોડ દ્વારા પેમેન્ટની સુવિધા ઉપલબ્ધ કરાવવામાં આવશે.

રેલવેની અખબારી યાદી મુજબ નવી ડિજિટલ પેમેન્ટ સિસ્ટમથી મુસાફરો QR કોડ દ્વારા ટિકિટનું ભાડું ચૂકવી શકશે. કોઈપણ યાત્રી સરળતાથી અને કોઈપણ મુશ્કેલી વિના ટિકિટનું ભાડું ચૂકવી શકશે. તેથી ભાડાની ચુકવણી માટે QR કોડનો ઉપયોગ કરવા રેલવે વિભાગે તમામ મુસાફરોને વિનંતી કરી છે.