સુરતમાં આભ ફાટ્યું, બે કલાકમાં સાડાપાંચ ઈંચ વરસાદ

હવામાન વિભાગની આગાહી મુજબ, સુરત શહેરમાં ચોમાસાની ધમાકેદાર શરૂઆત થઈ ચૂકી છે. ગઈકાલે રાત્રે પણ મુશળધાર વરસાદ ખાબક્યા બાદ આજે પણ વહેલી સવારથી જ મેઘરાજા મન મૂકીને વરસી રહ્યાં છે. સુરતના અનેક વિસ્તારો ભારે વરસાદને કારણે પાણીમાં ગરકાવ થઇ ગયા છે. સવારના 6 વાગ્યાથી 8 વાગ્યા દરમિયાન એટલે કે 2 કલાકમાં જ શહેરમાં સાડા પાંચ ઈંચ વરસાદ ખાબક્યો હતો. તો બીજી તરફ સુરતના ડભોલી વિસ્તારમાં ભારે વરસાદને પગલે રસ્તાઓ નદીઓ બની ગયા હતા. અવર જવર કરતા લોકો હેરાન પરેશાન થઇ રહ્યા છે. વધુ પાણી ભરાતા સુરતમાં અનેક રસ્તાઓ આવવા જવા માટે બંધ કરવામાં આવ્યા છે. 

સુરતને મેઘરાજા ધમરોળતા બે કલાકમાં પાંચ ઇંચથી વધુ વરસાદ ખાબક્યો છે. સવારે 8:00થી 10 વાગ્યા સુધીમાં ધોધમાર વરસાદ પડ્યો છે. સુરત શહેરમાં બે કલાકમાં 135 મિમી વરસાદ ખાબક્યો છે. સુરતના તમામ વિસ્તારોના રસ્તાઓ નદીઓ બની ગયા છે. લોકો અને વાહનચાલકોને પરેશાનીનો સામનો કરવો પડી રહ્યો છે. ઠેર-ઠેર રસ્તાઓ બંધ થવાના કારણે ટ્રાફિકજામના દૃશ્યો સર્જાયા છે. હજુ પણ વરસાદ વરસી રહ્યો છે.

ગુજરાત રાજ્યમાં આજે વ્યાપક રીતે વરસાદની આગાહી છે. ખાસ કરીને અમરેલી, ભાવનગર અને બોટાદ સહિત કુલ 12 જિલ્લામાં ભારે વરસાદની શક્યતા વ્યક્ત કરવામાં આવી છે, તે જિલ્લાઓમાં હવામાન વિભાગે ઓરેન્જ એલર્ટ જાહેર કર્યું છે. 24 જૂને રાજ્યના ઘણા વિસ્તારોમાં વરસાદ વરસવાની શકયતા છે. જેમાં અરવલ્લી, મહીસાગર, આણંદ, પંચમહાલ, દાહોદ, વડોદરા, ભરૂચ, નવસારી, વલસાડ, બનાસકાંઠા, સાબરકાંઠા, મહેસાણા, ગાંધીનગર, અમદાવાદ, ખેડા, છોટાઉદેપુર, નર્મદા, સુરત, ડાંગ, તાપી, સુરેન્દ્રનગર, રાજકોટ, જૂનાગઢ અને ગીર સોમનાથ જિલ્લામાં વરસાદની આગાહી છે.