રાજ્યમાં આગામી 24 કલાક સુધી વાવાઝોડા સાથે ભારે વરસાદનો ખતરો યથાવત

વાતાવરણમાં સર્જાયેલું ડીપ ડિપ્રેશન હાલમાં કચ્છના ભુજ નજીક સ્થિર થયુ છે અને આગળ વધી તે અરબ સાગરમાં સમાઈ જશે તેમ હવામાન વિભાગે જણાવ્યુ છે. આગામી 24 કલાક સુધી ગુજરાતમાં વાવાઝોડા સાથે વરસાદનો ખતરો યથાવત છે. આ વાવાઝોડુ દક્ષિણ પશ્ચિમ દિશા તરફ આગળ વધી રહ્યુ હોવાથી ઉત્તર, મધ્ય કે દક્ષિણ ગુજરાત અસર થવાની શક્યતા નહિવત છે. જ્યારે સૌરાષ્ટ્ર-કચ્છના જિલ્લાઓમાં તેની આંશિક અસર થાય તેવી શક્યતા છે. વાવાઝોડાની અસરથી કેટલાક જિલ્લામાં ભારે પવન ફૂંકાવાની સાથે વરસાદ વરસી શકે છે.

સૌરાષ્ટ્ર-કચ્છ પરનું ડીપ ડિપ્રેશન ત્રણ કિલોમીટર પ્રતિ કલાકની ઝડપે ધીમે-ધીમે પશ્ચિમ દિશા તરફ આગળ વધી રહ્યું છે. રાજકોટને બાદ કરતાં અમદાવાદ, વડોદરા અને સુરતમાં અસના વાવાઝોડાની અસર થશે નહીં. રાજકોટ સહિત સમગ્ર સૌરાષ્ટ્રમાં અસના વાવાઝોડાના કારણે ભારે પવન ફૂંકાવવાની સાથે હળવો વરસાદ થઈ શકે છે. ભૂતકાળમાં જમીન પર સક્રિય થઈ ડીપ ડિપ્રેશન 1944, 1964 અને 1976ના વર્ષોમાં અરબી સમુદ્રમાં સમાઈ ગયુ હતુ.

આગામી 24 કલાક સુધી 4 જિલ્લામાં ઓરેન્જ એલર્ટ :

હવામાન વિભાગે આગામી 24 કલાક સુધી સૌરાષ્ટ્રના મોરબી, જામનગર અને દેવભૂમિ દ્વારકા તેમજ કચ્છ મળી 4 જિલ્લામાં વાવાઝોડા સાથે વરસાદની આગાહીના પગલે ઓરેન્જ એલર્ટ જાહેર કર્યુ છે. જ્યારે સૌરાષ્ટ્રના રાજકોટ, પોરબંદર અને જૂનાગઢ જિલ્લામાં યલો એલર્ટ જાહેર કર્યુ છે. બાકીના 26 જિલ્લામાં કોઈ ચેતવણી જાહેર કરી નથી. 31 ઓગષ્ટથી સમગ્ર રાજ્યમાં વરસાદ વિરામ લે તેવી શક્યતા છે.

સૌરાષ્ટ્ર-કચ્છમાં 65 કિલોમીટરની ઝડપે પવન ફૂંકાશે :

હવામાન વિભાગે રાજ્યના મોટાભાગના સ્થળે હળવાથી મધ્યમ વરસાદની આગાહી કરી છે. આજે એટલે કે શુક્રવારે છૂટાછવાયા સ્થળોએ ભારેથી અતિભારે વરસાદ પડશે. 31 ઓગસ્ટને શનિવારે ગુજરાતના દરિયાકાંઠાના જિલ્લાઓમાં ભારે વરસાદ પડશે. શુક્રવારે દક્ષિણ ગુજરાત, સૌરાષ્ટ્ર અને કચ્છમાં 65 કિલોમીટરની ઝડપે પવન ફૂંકાશે. માછીમારોને શનિવાર સુધી દરિયો નહી ખેડવાની સૂચના આપવામાં આવી છે.

રાજ્યમાં અત્યાર સુધી 109 ટકા વરસાદ વરસ્યો :

રાજ્યમાં સરેરાશ 883 મીમી વરસાદ વરસે છે. તેની સરખામણીએ 30 ઓગષ્ટ સુધીમાં 966 મીમી એટલે કે 109 ટકા વરસાદ વરસ્યો છે. સૌથી વધુ કચ્છ ઝોનમાં 154 ટકા અને સૌથી ઓછો ઉત્તર ગુજરાત ઝોનમાં 86 ટકા વરસાદ વરસ્યો છે. જ્યારે સૌરાષ્ટ્રમાં 123 ટકા, દક્ષિણ ગુજરાતમાં 110 ટકા અને મધ્ય ગુજરાતમાં 104 ટકા વરસાદ ખાબક્યો છે. 251 તાલુકા પૈકી 1 તાલુકામાં 126 થી 250 મીમી, 41 તાલુકામાં 251 થી 500 મીમી, 125 તાલુકામાં 501 થી 1000 મીમી અને 84 તાલુકામાં 1000 મીમીથી વધુ વરસાદ વરસ્યો છે.

રાજ્યના 125 ડેમ હાઈએલર્ટ પર :

રાજ્યના કુલ 206 ડેમ પૈકી 125 ડેમ છલકાતા હાઈએલર્ટ પર મૂકાયા છે. જ્યારે 18 એલર્ટ પર અને 5 વોર્નિંગ સ્ટેજ ઉપર છે. 103 ડેમ 100 ટકા ભરાઈ ગયા છે. 45 ડેમ 70 થી 100 ટકા, 23 ડેમ 50 થી 70 ટકા, 21 ડેમ 25 થી 50 ટકા અને 14 ડેમ 25 ટકાથી નીચે ભરાયા છે. સરદાર સરોવર ડેમમાં દર કલાકે 2.49 લાખ ક્યૂસેક પાણીની આવક થઈ રહી છે. ભયજનક સપાટી 454.98 ફૂટની સામે 440.64 ફૂટ જળ સપાટી નોંધાઈ છે. એટલે કે 85.59 ટકા ડેમ ભરાયો છે. ડેમનું રૂલ લેવલ જાળવવા દર કલાકે 1.92 લાખ ક્યૂસેક પાણી નદીમાં છોડવામાં આવી રહ્યુ છે.

ગુરૂવારે 13 હજાર લોકોનું સલામત સ્થળે સ્થળાંતર કરાયુ :

રાજ્યમાં ઉદભવેલી પૂરની પરિસ્થિતિના કારણે નીચાણવાળા વિસ્તારોમાં પાણી ભરાતા ગુરૂવારે 13183 લોકોનું સ્થળાંતર કરાયુ છે. વડોદરામાં 6969, જામનગરમાં 1955, ખેડામાં 1519, આણંદમાં 604, પોરબંદરમાં 474, અમદાવાદમાં 437, દેવભૂમિ દ્વારકામાં 414, મહેસાણામાં 235, રાજકોટમાં 207, ગાંધીનગરમાં 109, બોટાદમાં 95, ભરૂચમાં 54 અને પાટણમાં 30 વ્યક્તિઓનું સ્થળાંતર કરાયુ છે. જ્યારે 1785 લોકોને અલગ-અલગ સ્થળ ઉપરથી રેસ્ક્યૂ કરાયા હતા.

રાજ્યમાં 5 નેશનલ હાઈવે અને 64 સ્ટેટ હાઈવે બંધ :

ગુજરાત સ્ટેટ ઈમરજન્સી ઓપરેશન સેન્ટરના જણાવ્યા મુજબ 29 ઓગષ્ટ સાજે 6 વાગ્યાની સ્થિતિએ રાજ્યમાં 5 નેશનલ હાઈવે, 64 સ્ટેટ હાઈવે, 85 અન્ય હાઈવે અને 711 પંચાયતના રસ્તાઓ મળીને કુલ 865 રસ્તાઓ બંધ છે.