રવિવારે 22 ડિસેમ્બરે રાજ્યમાં લેવાશે રાજ્ય વેરા નિરીક્ષક પરીક્ષા

GPSC અધ્યક્ષ હસમુખ પટેલની આજે યોજાયેલી પત્રકાર પરિષદમાં તેમણે કહ્યું હતું કે આવતીકાલે 22 ડિસેમ્બરે રવિવારે રાજ્યના 54 કેન્દ્ર પર રાજ્ય વેરા નિરીક્ષક પરીક્ષા યોજાશે.

તેમણે કહ્યું કે પરીક્ષાના દરેક કેન્દ્ર પર વર્ગ 1 અને 2 ના અધિકારી  હાજર રહેશે. તેમણે  RAC સહિતના અધિકારીઓને આ માટે  લેખિત સૂચના પણ આપી છે. તેમણે કહ્યું કે  એસટી નિગમ દ્વારા ઉમેદવારો માટે બસ સેવાની વ્યવસ્થા કરવામાં આવી છે. દરેક પરીક્ષા કેમ્પસમાં ઉમેદવારોનો સામાન રાખવા વ્યવસ્થા કરાઇ છે. 

તેમણે કહ્યું કે ઉમેદવારો  સાદી કાંડા ઘડિયાળ, રાઈટિંગ પેડ, પારદર્શક નાનું પાઉચ પરીક્ષા ખંડમાં લઈ જઈ શકાશે. આવતીકાલે 300 જગ્યાઓ માટે 1.85 લાખ ઉમેદવારો પરીક્ષા આપશે. પરીક્ષા પૂર્ણ થયા બાદ આન્સરશીટ રાખવા માટે સ્ટોંગ રૂમની પણ  વ્યવસ્થા કરવામાં આવી છે.

તેમણે માહિતી આપી હતી કે રવિવારે ઉમેદવારને પરીક્ષા કેન્દ્ર પર સવારે  10 વાગે પહોંચી ઓળખ પત્ર, કોલ લેટર બંનેમાં ફોટા મેચ કરી પરીક્ષા ખંડમાં જવા દેવામાં આવશે. આ ઉપરાંત પરીક્ષામાં પ્રથમ વખત ઉમેદવારોના આંગળાની છાપ પણ લેવામાં આવશે.

આ ઉપરાંત  ગુજરાત રાજ્ય નાગરિક પુરવઠા નિગમના આસિસ્ટન્ટ મેનેજરની 19 જાન્યુઆરીએ પરીક્ષા લેવાશે તેવી માહિતી પણ તેમણે આપી હતી. ગઇ કાલથી ઉમેદવારના સંમતિ પત્ર ભરવાની શરૂઆત થઇ છે. 27 ડિસેમ્બર સવારે 10 વાગ્યા સુધી  સંમતિપત્રક ભરી શકાશે. પરીક્ષામાં ઓછા ઉમેદવારો હોવાથી અમદાવાદ અથવા  ગાંધીનગર બંનેમાંથી એક શહેરમાં લેવાશે પરીક્ષા . તેમણે કહ્યું કે  જનરલ ઉમેદવારે 500 રૂપિયા ડિપોઝિટ ભરવાની રહેશે. અનામત ઉમેદવારોએ 400 રૂપિયા ડિપોઝિટ ભરવાની રહેશે 

જે ઉમેદવારો પરીક્ષા આપશે તેમને 15 દિવસમાં ડિપોઝિટ પરત આપવામાં આવશે. પરીક્ષા કેન્દ્ર દૂર છે એવું વિચારી પરીક્ષા નહિ આપવાનું ઉમેદવાર ના વિચારે તેમ તેમણે કહ્યું હતું.  પરીક્ષા આપવા માંગતા ઉમેદવારો વહેલી તકે સંમતિપત્રક ભરે, સમય મર્યાદા લંબાશે નહિ તેમ તેમણે કહ્યું હતું.