ગુજરાત વિધાનસભાનું સત્ર બુધવારથી થશે શરૂ ત્રિદિવસીય સત્રમાં પાંચ વિધેયકો થશે રજૂ 

ગાંધીનગર : ગુજરાત વિધાનસભાના ત્રિદિવસીય સત્રનો પ્રારંભ બુધવારથી થશે. આ ત્રણ દિવસના કામકાજની ચર્ચા કરવા માટે વિધાનસભાના અધ્યક્ષ શંકરભાઈ ચૌધરી ની અધ્યક્ષતામાં કામકાજ સલાહકાર સમિતિની બેઠક મંગળવારે મળી હતી.

રાજ્યના સંસદીય બાબતોના મંત્રી ઋષિકેશ પટેલે પત્રકારોને જણાવ્યું હતું કે સરકાર ચાંદીપુરા વાયરસ,વરસાદની સ્થિતિને પહોંચી વળવા ની કામગીરી તથા અન્ય અગત્યના વહીવટી કામમાં વ્યસ્ત હોવાના પગલે ટૂંકી મુદતના પ્રશ્નો પર આ સત્રમાં ચર્ચા કરવાનો સમય ફાળવી શકતા નથી. આમ છતાં આ સત્રમાં પાંચ જેટલા વિધેયક પર વિધાનસભામાં ચર્ચા કરી પસાર કરવામાં આવશે. 

ટૂંકી મુદતના પ્રશ્નો ની ચર્ચા કરવા સમય નથી ફળવાયો, તેને ખોટી રીતે મુદ્દો બનાવી રાજ્ય ગેરમાર્ગે દોરવાનું કામ કોંગ્રેસ પક્ષ કરી રહ્યું છે. જ્યાં સુધી એમપોક્સ રોગને નાથવા માટે આગોતરા આયોજન ની વાત છે, કેન્દ્ર સરકારે આ માટે જરૂરી માર્ગદર્શિકા જાહેર કરી છે, તેનું પાલન કરવામાં આવશે. અને આંતરરાષ્ટ્રીય હવાઈ મથકે સર્વેલન્સની કામગીરી શરૂ કરી દેવામાં આવી છે.

કામકાજ સલાહકાર સમિતિની બેઠકમાં ભાગ લીધા બાદ, પત્રકારો સાથે વાત કરતાં,કોંગ્રેસ પક્ષના નેતા અમિત ચાવડાએ આક્ષેપ કર્યો છે કે સરકાર પ્રજાને પરેશાન કરતા મુદ્દાઓની ચર્ચા કરવાનું ટાળી રહી છે, એટલે જ તેમણે માત્ર ત્રણ દિવસનું સત્ર બોલાવ્યું છે.

કોંગ્રેસ પક્ષની માંગણી હતી કે ઓછા માં ઓછું ૧૦ દિવસનું સત્ર હોવુ જોઇએ અને ટૂંકી મુદતના સવાલ વિધાનસભાના સદનમાં ચર્ચાવા જ જોઇએ. તદઉપરાંત વિધાનસભાનું સત્ર બોલાવવા માટે ઓછામાં ઓછો ૨૧ દિવસનો સમય આપવો જોઇએ, તે પણ અવગણ્યુ છે.

ચાવડાએ એવો પણ આક્ષેપ કર્યો કે બહુમતીના જોરે શાસક પક્ષ વિરોધ પક્ષનો અવાજ દબાવવાની કોશિશ કરી રહ્યું છે.