અમદાવાદમાં ક્રેશ થયેલા એર ઇન્ડિયાના વિમાન વિશે એક ચોંકાવનારી વાત સામે આવી છે. લગભગ 12 વર્ષ જૂના આ વિમાનના રાઇડ સાઇડ એન્જિનનું તાજેતરમાં જ સમારકામ કરવામાં આવ્યું હતું અને ત્રણ મહિના પહેલા માર્ચ 2025માં તેને બદલવામાં આવ્યું હતું. ઉલ્લેખનિય છે કે અમદાવાદથી લંડન જતું આ વિમાન ટેકઓફ થયાની થોડી મિનિટો પછી ક્રેશ થયું હતું અને તેમાં 12 ક્રૂ સભ્યો સહિત 242 મુસાફરો હતા. આ અકસ્માતમાં એક મુસાફર સિવાય તમામ 241 લોકોના મોત થયા હતા.
અહેવાલોમાં જણાવાયું છે કે આ એર ઇન્ડિયાના વિમાનની વિગતવાર જાળવણી તપાસ પણ જૂન 2023માં કરવામાં આવી હતી અને તેની આગામી તપાસ આ વર્ષે ડિસેમ્બરમાં સુનિશ્ચિત કરવામાં આવી હતી. એપ્રિલમાં, એર ઇન્ડિયાએ બોઇંગ 787-8 ડ્રીમલાઇનર માટે વીમા કવર 750 કરોડ રૂપિયાથી વધારીને 850 કરોડ રૂપિયા કર્યું હતું. અમદાવાદમાં થયેલો અકસ્માત એક દાયકા કરતાં વધુ સમયમાં દેશમાં થયેલા સૌથી ખરાબ હવાઈ અકસ્માતોમાંનો એક છે. આ દુર્ઘટનાથી ઉડ્ડયન વીમા ક્ષેત્રમાં ખળભળાટ મચી જવાની ધારણા છે અને કુલ દાવો દેશમાં સૌથી મોંઘો હોવાનો અંદાજ છે, જે લગભગ 3,000 કરોડ રૂપિયા છે.
ગત 12 જૂને અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પરથી ઉડાન ભર્યાના થોડી મિનિટો પછી, વિમાન નંબર AI 171 મેઘાણી નગરમાં એક મેડિકલ હોસ્ટેલ બિલ્ડિંગ સાથે અથડાયું, જેમાં 241 મુસાફરો સહિત લગભગ 270 લોકો માર્યા ગયા. ભારતીય મૂળના બ્રિટિશ નાગરિક રમેશ વિશ્વાસ કુમાર આ અકસ્માતમાં એકમાત્ર બચી ગયા છે.
એર ઇન્ડિયાનું વિમાન જમીન પર પડતાની સાથે જ જોરદાર વિસ્ફોટ થયો અને ભયંકર આગ લાગી. અકસ્માત પછી, વિમાનના કાટમાળમાંથી કાઢવામાં આવેલા મૃતદેહો ખરાબ રીતે બળી ગયા હતા, જેના કારણે ડીએનએ મેચિંગ પછી તેમની ઓળખ કરવામાં આવી રહી છે. આ અકસ્માતમાં ગુજરાતના ભૂતપૂર્વ મુખ્યમંત્રી વિજય રૂપાણીનું પણ નિધન થયું હતું.
અમદાવાદ અકસ્માત પછી, DGCA એ એર ઇન્ડિયાના બોઇંગ ડ્રીમલાઇનર વિમાન માટે માર્ગદર્શિકા જારી કરી છે અને આવા વિમાનોની સઘન તપાસ માટે આદેશો આપવામાં આવ્યા છે. આ ઉપરાંત, કેન્દ્ર સરકાર દ્વારા અકસ્માતની તપાસ માટે કેન્દ્રીય ગૃહ સચિવની અધ્યક્ષતામાં એક ઉચ્ચ સ્તરીય સમિતિની રચના કરવામાં આવી છે, જે ત્રણ મહિનામાં તેનો અહેવાલ રજૂ કરશે.
એરલાઇને એક નિવેદનમાં જણાવ્યું હતું કે એર ઇન્ડિયા DGCA ની માર્ગદર્શિકા પર સલામતી તપાસ પૂર્ણ કરવાની પ્રક્રિયામાં છે. આ તપાસ બોઇંગ 787 કાફલા પર કરવામાં આવી રહી છે કારણ કે તે ભારત પરત ફરી રહ્યા છે, ત્યારબાદ તેમને આગામી કામગીરી માટે મંજૂરી આપવામાં આવશે. એર ઇન્ડિયાએ બોઇંગ 787 વિમાનોમાંથી નવ પર આવી તપાસ પૂર્ણ કરી છે અને DGCA દ્વારા આપવામાં આવેલી સમયમર્યાદામાં બાકીના 24 વિમાનો માટે આ પ્રક્રિયા ટૂંક સમયમાં પૂર્ણ કરવામાં આવશે.
આ પણ વાંચો--<a href="https://www.benefitnews24.com/gujarati/gujarat/plane-crash-survivor-vishwas-kumar-discharged/14139" target="_blank" rel="noopener"> Plane Crash : બચી ગયેલા વિશ્વાસ કુમાર ક્યાં ...?</a>

અમદાવાદથી લંડન જતું આ વિમાન ટેકઓફ થયાની થોડી મિનિટો પછી ક્રેશ થયું હતું

June 18, 2025 | 17:41 IST