સુરતમાં 27 વર્ષીય યુવાનનું મોત, પાણી પીતા પેહલાં દુકાનમાં ઢળી પડ્યો

સુરતમાં 27 વર્ષીય યુવાન કાપડ વેપારીનું દુકાનમાં જ હાર્ટ એટેક આવતાં મૃત્યુ થયું.  રાજસ્થાનના રહેવાસી ઋષભ ગાંધી હાલ પર્વત પાટિયા વિસ્તારમાં પોતાની બહેન સાથે રહેતો હતો. પિતા-માતા વતનમાં રહે છે. ઋષભે 2 વર્ષ પહેલાં પોતાના મિત્રો અને સગાં-સંબંધીઓ સાથે મળીને સુરતની પદ્માવતી ટેક્સટાઈલ માર્કેટમાં દુકાન શરૂ કરી હતી. 5 દિવસ પહેલાં જ તેની સગાઈ થઈ હતી, જેથી પરિવારમાં ખુશીનો માહોલ હતો.

ગત રોજ સાંજના સમયે તે પોતાના બનેવી અને મિત્રો સાથે દુકાનમાં હતો. જ્યારે તે પાણીની બોટલ લઇ ઢાંકણ ખોલી રહ્યો હતો ત્યારે અચાનક ઢળી પડ્યો. ત્યારબાદ બનેવી અને અન્ય મિત્રો દ્વારા તાત્કાલિક CPR આપવાનો પ્રયાસ કરવામાં આવ્યો હતો, પરંતુ કોઈ હલન-ચલન ન જોઈ તેને તાત્કાલિક હોસ્પિટલ ખસેડવામાં આવ્યો હતો.

હોસ્પિટલમાં તબીબે જાહેર કર્યો મૃત

ઋષભનું વજન આશરે 100 કિલો હતું, જેના કારણે તેને સીધું ઊંચકીને લઈ જવાની સ્થિતિ ન હતી. તેથી તેને ખુરસીમાં બેસાડીને લિફ્ટ મારફતે પાર્કિંગ સુધી લઈ જઈ ખાનગી કાર મારફતે હોસ્પિટલ લઈ જવામાં આવ્યો હતો, પરંતુ ત્યાં ફરજ પરના તબીબે તેને મૃત જાહેર કર્યો હતો.

હાર્ટ એટેકની આશંકા

પ્રાથમિક તારણમાં આ ઘટના હાર્ટ એટેકથી મૃત્યુ થયાનું માનવામાં આવી રહ્યું છે. ઘટના બાદ ઋષભના પરિવારજનો વતન રાજસ્થાનથી સુરત પહોંચ્યા અને મૃતદેહને વતન લઈ જવામાં આવ્યો. ટેક્સટાઈલ માર્કેટમાં પણ દુઃખની લાગણી જોવા મળી હતી કારણ કે, ઋષભ બહોળા વ્યવહારી યુવાન તરીકે ઓળખાતો હતો.